Mahabharata · Chapter 3.257

tatastu śilpinaḥ sarvaṃ kṛtamūrcurnarādhipam /
viduraśca mahāprājño dhṛtarāṣṭre nyavedayat //

sajjaṃ kratuvaraṃ rājankālaprāptaṃ ca bhārata /
sauvarṇaṃ ca kṛtaṃ sarvaṃ lāṅgalaṃ ca mahādhanam //

evacchrutvā nṛpaśreṣṭho dhṛtarāṣṭro viśampate /
ājñāpayāmāsa nṛpaḥ kraturājapravartanam //

tataḥ pravavṛte yajñaḥ prabhūtārthaḥ susaṃskṛtaḥ /
dīkṣitaścāpi gāndhāriryathāśāstraṃ yathākramam //

prahṛṣṭo dhṛtarāṣṭraśca viduraśca mahāyaśāḥ /
bhīṣmo droṇaḥ kṛpaḥ karṇo gāndhārī ca yaśasvinī //

nimantraṇārthaṃ dūrtāṃśca preṣayāmāsa śīghragān /
pārthivānāṃ ca rājendra brāhmaṇānāṃ tathaiva ca //

te prayātā yathoddiṣṭā dūtāstvaritavāhanāḥ /
tatra kacitprayāntaṃ tu dūtaṃ duḥśāsano'bravīt //

gaccha dvaitavanaṃ śīghraṃ pāṇḍavānpāpapūruṣān /
nimantraya yathānyāyaṃ viprāṃsta sminvane tadā //

sa gatvā pāṇḍavānsarvānuvācābhipraṇamya ca /
duryodhano mahārāja yajate nṛpasattamaḥ //

svavīryārjitamarthaughamavāpya kurusattamaḥ /
tatra gacchanti rājāno brāhmaṇāśca tatastataḥ //

ahaṃ tu preṣito rājankauraveṇa mahātmanā / āmantrayati vo rājā dhārtarāṣṭro janeśvaraḥ /
manobhilaṣitaṃ rājñastaṃ kratuṃ draṣṭumarhatha //

tato yudhiṣṭhiro rājā tacchrutvā dūtabhāṣitam / abravīnnṛpaśārdūlo diṣṭyā rājā suyodhanaḥ /
yajate kratumukhyena pūrveṣāṃ kīrtivardhanaḥ //

vayamapyupayāsyāmo na tvidānīṃ kathañcana /
samayaḥ paripālyo no yāvadvarṣaṃ trayodaśam //

śrutvaitaddharmarājasya bhīmo vacanamabravīt /
tadā tu nṛpatirgantā dharmarājo yudhiṣṭhiraḥ //

astraśastrapradīpte'gnau yadā taṃ pātayiṣyati /
varṣātrayodaśādūrdhvaṃ raṇasatre narādhipaḥ //

yadā krodhahavirmoktā dhārtarāṣṭreṣu pāṇḍavaḥ /
āgantārastadā smeti vācyaste sa suyodhanaḥ //

śeṣāstu pāṇḍavā rājannaivocuḥ kiñcidapriyam /
dūtaścāpi yathāvṛttaṃ dhārtarāṣṭre nyavedayat //

athājagmurnaraśreṣṭhā nānājanapadeśvarāḥ /
brāhmaṇāśca mahābhāga dhārtarāṣṭrapuraṃ prati //

te tvarcitā yathāśāstraṃ yathāvidhi yathākramam /
mudā paramayā yuktāḥ prītāścāpi nareśvarāḥ //

dhṛtarāṣṭro'pi rājendra saṃvṛtaḥ sarvakauravaiḥ /
harṣeṇa mahatā yukto viduraṃ pratyabhāṣata //

yathā sukhī janaḥ sarvaḥ kṣattaḥ syādannasaṃyutaḥ /
tuṣyettu yajñasadane tathā nītirvidhīyatām //

vidurastu tadājñāya sarvavarṇānarindama /
yathā pramāṇato vidvānpūjayāmāsa dharmavit //

bhakṣyapeyānnapānena mālyaiścāpi sugandhibhiḥ /
vāsobhirvividhaiścaiva yojayāmāsa hṛṣṭavat //

kṛtvā hyavabhṛthaṃ vīro yathāśāstraṃ yathākramam / sāntvayitvā ca rājendro dattvā ca vividhaṃ vasu /
visarjayāmāsa napānbrāhmaṇāṃśca sahasraśaḥ //

visṛjyaca nṛpānsarvānbhrātṛbhiḥ parivāritaḥ / viveśa hāstinapuraṃ sahitaḥ karṇasaubalaiḥ //