Mahabharata · Chapter 3.256

jitvā tu pṛthivīṃ rājansūtaputro janādhipa /
abravītparavīraghno duryodhanamidaṃ vacaḥ //

duryodhana nibodhedaṃ yattvāṃ vakṣyāmi kaurava /
śrutvā vācaṃ tathā sarvaṃ kartumarhasyarindama //

tavādya pṛthivī vīra niḥsapatnā nṛpottama /
tāṃ pālaya yathā śakro hataśatrurmahāmanāḥ //
vaiśampāyana uvāca /

evamuktastu karṇena karṇaṃ rājā'bravītpunaḥ /
na kiñciddurlabhaṃ tasya yas tvaṃ puruṣarṣabha //

sahāyaścānuraktaśca madarthaṃ ca samudyataḥ /
abhiprāyastu me kaścittaṃ vai śṛṇu yathātatham //

rājasūyaṃ pāṇḍavasya dṛṣṭvā kratuvaraṃ tadā /
kamama spṛhā samutpannā tāṃ sampādaya sūtaja //

evamuktastataḥ karṇo rājānamidamabravīt /
tavādya pṛthivīpālā vaśyāḥ sarve nṛpottama //

āhūyantāṃ dvijavarāḥ sambhārāśca yathāvidhi /
sambhriyantāṃ kuruśreṣṭha yajñopakaraṇāni ca //

ṛtvijaśca samāhūtā yathoktaṃ vedapāragāḥ /
kriyāṃ kurvantu te rājanyathāśāstramarindama //

bahvannapānasaṃyuktaḥ susamṛddhaguṇānvitaḥ /
pravartatāṃ mahāyajñastavāpi bharatarṣabha //

evamuktastu karṇena dhārtarāṣṭro viśāmpate /
purohitaṃ samānāyya vacanaṃ cedamabravīt //

rājasūyaṃ kratuśreṣṭhaṃ samāptavaradakṣiṇam /
āharasva yathāśāstraṃ yathānyāyaṃ yathākramam //

sa evamukto nṛpatimuvāca dvijasattamaḥ //

brāhmaṇaiḥ sahito rājanye tatrāsansamāgatāḥ / na sa śakyaḥ kratuśreṣṭho jīvamāne yudhiṣṭhire /
āhartuṃ kauravaśreṣṭha kule tava nṛpottama //

dīrghāyurjīvati ca te dhṛtarāṣṭraḥ pitā nṛpa /
ataścāpi viruddhaste kratureṇaṣa nṛpottamaḥ //

asti tvanyanmahatsatraṃ rājasūyasamaṃ prabho /
tena tvaṃ yaja rājendra śṛṇu cedaṃ vaco mama //

ya ime pṛthivīpālāḥ karadāstava pārthiva /
te karānsamprayacchantu suvarṇaṃ ca kṛtākṛtam //

tena te kriyatāmadyalāṅgalaṃ nṛpasattama /
yajñavāṭas te bhūmiḥ kṛṣyatāṃ tena bhārata //

tatra yajño nṛpaśreṣṭaḥ prabhūtānnaḥ susaṃskṛtaḥ /
pravartatāṃ yathānyāyaṃ sarvato hyanivāritaḥ //

eṣa te vaiṣṇavo nāma yajñaḥ satpuruṣocitaḥ /
etena neṣṭavānkaścidṛteviṣṇuṃ purātanam //

rājasūyaṃ kratuśreṣṭhaṃ spardhatyeṣa mahākratuḥ /
asmākaṃ rocate caiva śreyaśca tava bhārata //

nirvighnaśca bhavatyeṣa saphalā syātspṛhā tava /
tasmādeṣa mahābāho tava yajñaḥ pravartatām //

evamukatstu tairviprairdhārtarāṣṭro mahīpatiḥ /
karṇaṃ ca saubalaṃ caiva bhrātṝścaivedamabravīt //

rocate me vacaḥ kṛtsnaṃ brāhmaṇānāṃ na saṃśayaḥ /
rocate yadi yuṣmākaṃ tasmātprabrūta māciram //

evamuktāstu te sarve tathetyūcurnarādhipam /
sandideśa tatorājāvyāpārasthānyathākramam //

halasya karaṇe cāpi vyādiṣṭāḥ sarvaśilpinaḥ / yathoktaṃ ca nṛpaśreṣṭha kṛtaṃ sarvaṃ yathākramam //