Mahabharata · Chapter 3.255

tataḥ karṇo maheṣvāso balena mahatā vṛtaḥ /
drupadasya puraṃ ramyaṃ rurodha bharatarṣabha //

yuddhena mahatā cainaṃ cakre vīraṃ vaśānugam / suvarṇaṃ rajataṃ cāpi ratnāni vividhāni ca /
karaṃ ca dāpayāmmāsa drupadaṃ nṛpasattama //

taṃ vinirjitya rājendra rājānastasya ye'nugāḥ /
tānsarvānvaśagāṃścakre karaṃ cainānadāpayat //

athottarāṃ diśaṃ gatvā vaśe cakre narādhipān /
bhagadattaṃ ca nirjitya rādheyo girimāruhat //

himavantaṃ mahāśailaṃ yudhyamānaśca śatrubhiḥ /
prayayau ca diśaḥ sarvānnṛpatīnvaśamānayat //

sa haimavatikāñjitvā karaṃ sarvānadāpayat /
nepālaviṣaye ye ca rājānastānavājayat //

avatīrya tataḥ śailātpūrvāṃ diśamabhidrutaḥ /
aṅgānvaṅgānkaliṅgāṃśca śuṇḍikānmithilānatha //

māgadhānkarkakhaṇḍāṃśca niveśya viṣaye'tmanaḥ /
āvaśīrāṃśca yodhyāṃśca ahikṣatrāṃśca so'jayat //

pūrvāṃ diśaṃ vinirjitya vatsabhūmiṃ tathā'gamat //

vatsabhūmiṃ vinirjitya kevalāṃ mṛttikāvatīm /
mohanaṃ pattanaṃ caiva tripurīṃ kosalāṃ tathā //

etānsarvānvinirjitya karamādāya sarvaśaḥ / dakṣiṇāṃ diśamāsthāya karṇo jitvā mahārathān /
rukmiṇaṃ dākṣiṇātyeṣu yodhayāmāsa sūtajaḥ //

sa yuddhaṃ tumulaṃ kṛtvā rukmī provāca sūtajam /
prītosmi tava rājendra vikrameṇa balena ca //

na te vighnaṃ kariṣyāmi pratijñāṃ samapālayam /
prītyā cāhaṃ prayacchāmi hiraṇyaṃ yāvadicchasi //

sametya rukmiṇā karṇaḥ pāṇḍyaṃ śailaṃ ca sogamat //

sa kevalaṃ raṇae caiva nīlaṃ cāpi mahīpatim / veṇudārisutaṃ caiva ye cānye nṛpasattamāḥ /
dakṣiṇasyāṃ diśi nṛpānkarānsarvānadāpayat //

śaiśupāliṃ tato gatvā vijigye sūtanandanaḥ /
pārśvasthāṃścāpi nṛpatīnvaśe cakre mahābalaḥ //

āvantyāṃśca vaśe kṛtvā sāmnā ca bharatarṣabha /
vṛṣṇibhiḥ saha sammya paścimāmapi nirjayat //

vāruṇīṃ diśamāgamya yāvanānvarbarāṃstathā /
nṛpānpaścimabhūmisthāndāpayāmāsa vai karān //

vijitya pṛthivīṃ sarvāṃ sapūrvāparadakṣiṇām /
samlecchāṭavikānvīraḥ saparvatanivāsinaḥ //

bhadrānrohitakāṃścaiva āgreyānmālavānapi /
gaṇānsarvānvinirjitya nītikṛtprahasanniva //

śaśakānyavanāṃścaiva vijigye sūtanandanaḥ /
nagnajitpramukhāṃścaiva gaṇāñjitvā mahārathān //

evaṃ sa pṛthivīṃ sarvāṃ vaśe kṛtvā mahārathaḥ /
vijitya puruṣavyāghro nāgasāhvayamāgamat //

tamāgataṃ maheṣvāsaṃ dhārtarāṣṭro janādhipaḥ /
pratyudgatya mahārāja sabhrātṛpitṛbāndhavaḥ //

arcayāmāsa vidhinā karṇamāhavaśobhinam /
āśrāvayacca tatkarma prīyamāṇo janeśvaraḥ //

yanna bhīṣmānna ca droṇānna kṛpānna ca vāhlikāt /
prāptavānasmi bhadraṃ te tvattaḥprāptaṃ mayā hi tat //

bahunā ca kimuktena śṛṇu karṇa vaco mama /
sanāthosmi mahābāho tvayā nāthena sattama //

na hi te pāṇḍavāḥ sarve kalāmarhanti ṣoḍaśīm /
anyevā puruṣavyāghra rājāno'bhyuditoditāḥ //

sa bhavāndhṛtarāṣṭraṃ taṃ gāndhārīṃ ca yaśasvinīm /
paśya karṇa maheṣvāsa aditiṃ vajrabhṛdyathā //

tato halahalāśabdaḥ prādurāsīdviśāmpate /
hāhākārāśca bahavo nagare nāgasāhvaye //

rakecidenaṃ praśaṃsanti nindanti sma tathā pare /
tūṣṇīmāsaṃstathā cānye nṛpāstatra janādhipa //

evaṃ vijitya rājendra karṇaḥ śastrabhṛtāṃvaraḥ /
saparvatavanākāśāṃ sasamudrāṃ sanuṣkuṭām //

deśairuccāvacaiḥ pūrṇāṃ pattanairnagarairapi /
dvīpaiścānūpasampūrṇaiḥ pṛthivīṃ pṛthivīpate //

kālena nātidīrgheṇa vaśe kṛtvā tu pārthivān /
akṣayaṃ dhanamādāya sūtajo nṛpamabhyayāt //

praviśya ca gṛhaṃ rājannabhyantaramarindama /
gāndhārīsahitaṃ vīro dhṛtarāṣṭraṃ dadarśa saḥ //

putravacca naravyāghra pādau jagrāha dharmavit /
dhṛtarāṣṭreṇa cāśliṣya premṇā cāpi visarjitaḥ //

tadāprabhṛti rājā ca śakuniścāpi saubalaḥ / jānāte nirjitānpārthānkarṇena yudhi bhārata //