મહાભારત · અધ્યાય 3.256

જિત્વા તુ પૃથિવીં રાજન્સૂતપુત્રો જનાધિપ ।
અબ્રવીત્પરવીરઘ્નો દુર્યોધનમિદં વચઃ ॥

દુર્યોધન નિબોધેદં યત્ત્વાં વક્ષ્યામિ કૌરવ ।
શ્રુત્વા વાચં તથા સર્વં કર્તુમર્હસ્યરિન્દમ ॥

તવાદ્ય પૃથિવી વીર નિઃસપત્ના નૃપોત્તમ ।
તાં પાલય યથા શક્રો હતશત્રુર્મહામનાઃ ॥
વૈશમ્પાયન ઉવાચ ।

એવમુક્તસ્તુ કર્ણેન કર્ણં રાજાઽબ્રવીત્પુનઃ ।
ન કિઞ્ચિદ્દુર્લભં તસ્ય યસ્ ત્વં પુરુષર્ષભ ॥

સહાયશ્ચાનુરક્તશ્ચ મદર્થં ચ સમુદ્યતઃ ।
અભિપ્રાયસ્તુ મે કશ્ચિત્તં વૈ શૃણુ યથાતથમ્ ॥

રાજસૂયં પાણ્ડવસ્ય દૃષ્ટ્વા ક્રતુવરં તદા ।
કમમ સ્પૃહા સમુત્પન્ના તાં સમ્પાદય સૂતજ ॥

એવમુક્તસ્તતઃ કર્ણો રાજાનમિદમબ્રવીત્ ।
તવાદ્ય પૃથિવીપાલા વશ્યાઃ સર્વે નૃપોત્તમ ॥

આહૂયન્તાં દ્વિજવરાઃ સમ્ભારાશ્ચ યથાવિધિ ।
સમ્ભ્રિયન્તાં કુરુશ્રેષ્ઠ યજ્ઞોપકરણાનિ ચ ॥

ઋત્વિજશ્ચ સમાહૂતા યથોક્તં વેદપારગાઃ ।
ક્રિયાં કુર્વન્તુ તે રાજન્યથાશાસ્ત્રમરિન્દમ ॥

બહ્વન્નપાનસંયુક્તઃ સુસમૃદ્ધગુણાન્વિતઃ ।
પ્રવર્તતાં મહાયજ્ઞસ્તવાપિ ભરતર્ષભ ॥

એવમુક્તસ્તુ કર્ણેન ધાર્તરાષ્ટ્રો વિશામ્પતે ।
પુરોહિતં સમાનાય્ય વચનં ચેદમબ્રવીત્ ॥

રાજસૂયં ક્રતુશ્રેષ્ઠં સમાપ્તવરદક્ષિણમ્ ।
આહરસ્વ યથાશાસ્ત્રં યથાન્યાયં યથાક્રમમ્ ॥

સ એવમુક્તો નૃપતિમુવાચ દ્વિજસત્તમઃ ॥

બ્રાહ્મણૈઃ સહિતો રાજન્યે તત્રાસન્સમાગતાઃ । ન સ શક્યઃ ક્રતુશ્રેષ્ઠો જીવમાને યુધિષ્ઠિરે ।
આહર્તું કૌરવશ્રેષ્ઠ કુલે તવ નૃપોત્તમ ॥

દીર્ઘાયુર્જીવતિ ચ તે ધૃતરાષ્ટ્રઃ પિતા નૃપ ।
અતશ્ચાપિ વિરુદ્ધસ્તે ક્રતુરેણષ નૃપોત્તમઃ ॥

અસ્તિ ત્વન્યન્મહત્સત્રં રાજસૂયસમં પ્રભો ।
તેન ત્વં યજ રાજેન્દ્ર શૃણુ ચેદં વચો મમ ॥

ય ઇમે પૃથિવીપાલાઃ કરદાસ્તવ પાર્થિવ ।
તે કરાન્સમ્પ્રયચ્છન્તુ સુવર્ણં ચ કૃતાકૃતમ્ ॥

તેન તે ક્રિયતામદ્યલાઙ્ગલં નૃપસત્તમ ।
યજ્ઞવાટસ્ તે ભૂમિઃ કૃષ્યતાં તેન ભારત ॥

તત્ર યજ્ઞો નૃપશ્રેષ્ટઃ પ્રભૂતાન્નઃ સુસંસ્કૃતઃ ।
પ્રવર્તતાં યથાન્યાયં સર્વતો હ્યનિવારિતઃ ॥

એષ તે વૈષ્ણવો નામ યજ્ઞઃ સત્પુરુષોચિતઃ ।
એતેન નેષ્ટવાન્કશ્ચિદૃતેવિષ્ણું પુરાતનમ્ ॥

રાજસૂયં ક્રતુશ્રેષ્ઠં સ્પર્ધત્યેષ મહાક્રતુઃ ।
અસ્માકં રોચતે ચૈવ શ્રેયશ્ચ તવ ભારત ॥

નિર્વિઘ્નશ્ચ ભવત્યેષ સફલા સ્યાત્સ્પૃહા તવ ।
તસ્માદેષ મહાબાહો તવ યજ્ઞઃ પ્રવર્તતામ્ ॥

એવમુકત્સ્તુ તૈર્વિપ્રૈર્ધાર્તરાષ્ટ્રો મહીપતિઃ ।
કર્ણં ચ સૌબલં ચૈવ ભ્રાતૄશ્ચૈવેદમબ્રવીત્ ॥

રોચતે મે વચઃ કૃત્સ્નં બ્રાહ્મણાનાં ન સંશયઃ ।
રોચતે યદિ યુષ્માકં તસ્માત્પ્રબ્રૂત માચિરમ્ ॥

એવમુક્તાસ્તુ તે સર્વે તથેત્યૂચુર્નરાધિપમ્ ।
સન્દિદેશ તતોરાજાવ્યાપારસ્થાન્યથાક્રમમ્ ॥

હલસ્ય કરણે ચાપિ વ્યાદિષ્ટાઃ સર્વશિલ્પિનઃ । યથોક્તં ચ નૃપશ્રેષ્ઠ કૃતં સર્વં યથાક્રમમ્ ॥