Mahabharata · Chapter 3.252

prāyopaviṣṭaṃ rājānaṃ duryodhanamamarṣaṇam /
uvāca sāntvayanrājañśakuniḥ saubalastadā //

samyaguktaṃ hi karṇena tacchrutaṃ kaurava tvayā /
mayā hṛtāṃ śriyaṃ sphītāṃ tāṃ mohādapahāsi kim //

tvamabuddhyā nṛpavara prāṇānutsraṣṭumicchasi /
adya vā'pyavaganchāmi na vṛddhāḥ sevitāstvayā //

yaḥ samutpatitaṃ harṣaṃ dainyaṃ vā na niyacchati /
sa naśyati śriyaṃ prāpya pātramāmamivāmbhasi //

atibhīruṃ mṛduṃ klībaṃ dīrghasūtraṃ pramādinam /
vyasanādviṣayākrāntaṃ na bhajanti nṛpaṃ śritāḥ //

satkṛtasya hi te śoko viparīte kathaṃ bhavet /
mā kṛtaṃ śobhanaṃ pārthaiḥ śokamālambya nāśaya //

yatra harṣastvayā kāryaḥ satkartavyāśca pāṇḍavāḥ /
tatra śocasi rājendraviparītamidaṃ tava //

prasīdamā tyajātmānaṃ tuṣṭaśca sukṛtaṃ smara / kaprayaccha rājyaṃ pārthānāṃ yaśo dharmamavāpnuhi /
kriyāmetāṃ samājñāya kṛtaghno na bhaviṣyasi //

saubhrātraṃ pāṇḍavaiḥ kṛtvā samavastāpya caiva tān /
pitryaṃ rājyaṃ prayacchaiṣāṃ tataḥ sukhamavāpsyasi //
vaiśampāyana uvāca /

śakunestu vacaḥ śrutvā duḥśāsanamavekṣya ca /
pādayoḥ patitaṃ vīraṃ vikṛtaṃ bhrātṛsauhṛdāt //

bāhubhyāṃ sādhujātābhyāṃ duḥśāsanamarindamam /
utthāpya sampariṣvajya prītyā'jighrata mūrdhani //

karṇasaubalayoścāpi saṃśrutya vacanānyasau / nirvedaṃ paramaṃ gatvā rājā duryodhanastadā /
vrīḍayā'bhiparītātmā nairāśyamagamatparam //

suhṛdāṃ caiva tacchrutvā samanyuridamabravīt /
na dharmadhanasaukhyena naiśvaryeṇa na cājñayā //

naiva bhogaiśca me kāryaṃ mā vihanyata gacchata /
niściteyaṃ mama matiḥ sthitā prāyopaveśane //

gacchadhvaṃ nagaraṃ sarve pūjyāśca guravo mama /
ta evamuktāḥ pratyūc rājānamarimardanam //

yā gatistava rājendra sā'smākamapi bhārata /
kathaṃ vā sampravekṣyāmastvadvihīnāḥ puraṃ vayam //
vaiśampāyana uvāca /

sa suhṛdbhiramātyaiśca bhātṛbhiḥ svajanena ca /
bahuprakāramapyukto niścayānna vyacālyata //

darbhāstaraṇamāstīrya niścayāddhṛtarāṣṭrajaḥ /
saṃspṛśyāpaḥ śucirbhūtvā bhūtale samupasthitaḥ //

kuśacīrāmbaradharaḥ paraṃ niyamamāsthitaḥ /
vāgyato rājaśārdūlaḥ sa svargagatikāmyayā //

manasopacitiṃ kṛtvā niras ca bahiḥkriyāḥ /
tasthauprāyopaveśe'thamatiṃ kṛtvā suniścayām //

atha taṃ niścayaṃ tasya buddhvā daiteyadānavāḥ /
pātālavāsino raudrāḥ pūrvaṃ devairvinirjitāḥ //

te svapakṣakṣayaṃ taṃ tu jñātvā duryodhanasya vai /
āhvānāya tadā cakruḥ karma vaitānasambhavam //

bṛhaspatyuśanoktaiśca mantrairmantraviśāradāḥ / atharvavedaproktaiśca yāścaupaniṣadāḥ kriyāḥ /
mantrajapyasamāyuktāstāstadā samavartayan //

juhvatyagnau haviḥ kṣīraṃ mantravatsusamāhitāḥ /
brāhmaṇā vedavedāṅgapāragāḥ sudṛḍhavratāḥ //

adhvaryavo dānavānāṃ karma prāvartayaṃstataḥ //

karmasiddhau tadā tatra jṛmbhamāṇā mahādbhutā /
kṛtyā samutthitā rājankiṃ karomīti cābravīt //

āhurdaityāśca tāṃ tatra suprītenāntarātmanā /
prāyopaviṣṭaṃ rājānaṃ dhārtarāṣṭramihānaya //

tatheti ca pratiśrutya sā kṛtyā prayayau tadā /
nimeṣādagamaccāpi yatra rājā suyodhanaḥ //

samādāya ca rājānaṃ praviveśa rasātalam /
dānavānāṃ muhūrtācca puratastaṃ nyavedayat //

tamānītaṃ nṛpaṃ dṛṣṭvā rātrau sangatya dānavāḥ /
prahṛṣṭamanasaḥ sarve kiñcidutphullalocanāḥ //

dṛḍhamenaṃ pariṣyajya dṛṣṭvā ca kuśalaṃ tadā / sābhimānamidaṃ vākyaṃ duryodhanamathābruvan //