Mahabharata · Chapter 3.253

bhoḥ suyodhana rājendra bharatānāṃ kulodvaha /
śūraiḥ parivṛto nityaṃ tathaiva ca mahātmabhiḥ //

akārṣīḥ sāhasamidaṃ kasmātprāyopaveśanam /
ātmatyāgī hyadho yāti vācyatāṃ cāyaśaskarīm //

na hi kāryaviruddheṣu bahupāpeṣu karmasu /
mūlaghātiṣu sajjante buddhimanto bhavadvidhāḥ //

niyacchaināṃ matiṃ rājandharmārthasukhanāśinīm /
yaśaḥpratāpavīryaghnīṃ śatrūṇāṃ harṣavardhanīm //

śrūyatāṃ tu prabho tattvaṃ divyatāṃ cātmano nṛpa /
nirmāṇaṃ ca raśarīrasya tato dhairyamavāpnuhi //

purā tva tapasā'smābhirlabdho rājanmaheśvarāt /
pūrvakāyaśca te sarvo nirmito vajrasañcayaiḥ //

astrairabhedyaḥ śastraiścāpyadhaḥkāyaśca te'nagha /
kṛtaḥ puṣpamayo devyā rūpatastrīmanoharaḥ //

evamīśvarasaṃyuktastava deho nṛpottama /
devyā ca rājaśārdūla divyastvaṃ hi na mānuṣaḥ //

kṣatriyāśca mahāvīryā bhagadattapurogamāḥ /
divyāstraviduṣaḥ śūrāḥ kṣapayiṣyanti te ripūn //

tadalaṃ te viṣādena bhayaṃ tava na vidyate /
sahāyārthaṃ ca te vīrāḥ sambhūtā buvi dānavāḥ //

bhīṣmadroṇakṛpādīṃśca pravekṣyantyapare'surāḥ /
yairāviṣṭā ghṛṇāṃ tyaktvā yotsyante tava vairibhiḥ //

naiva putrānna ca bhrātṝnna pitṝnna ca bāndhavān / naiva śiṣyānna ca jñātīnna bālāntyavirānna ca /
yudhi samprahariṣyanto mokṣyanti kurusattama //

niḥsnehā dānavāviṣṭāḥ samākrānte'ntarātmani /
prahariṣyanti bandhubhyaḥ snehamutsṛjya dūrataḥ //

hṛṣṭāḥ puruṣaśārdūlāḥ kaluṣīkṛtamānasāḥ / anabhijñātamūlāśca daivācca vidhinirmitāt /
vyābhāṣamāṇāścānyonyaṃ na me jīvanvimokṣyase //

sarve śastrāstramokṣeṇa pauruṣe samavasthitāḥ /
ślāghamānāḥ kuruśreṣṭha kariṣyanti janakṣayam //

tepi pañca mahātmānaḥ pratiyotsanti pāṇḍavāḥ /
vadhaṃ caiṣāṃ kariṣyanti daivayuktā mahābalāḥ //

daityarakṣogaṇāścaiva sambhūtāḥ kṣatrayoniṣu /
yotsyanti yudhi vikramya śatrubhistava pārthiva //

gadābhirmusalaiḥ śūlaiḥ śastrairuccāvacaistathā /
prahariṣyanati te vīrāstavāriṣu mahābalāḥ //

yacca te'ntargataṃ vīra bhayamarjunasambhavam /
tatrāpi vihito'smābhirvadhopāyo'rjunasya vai //

hatasya narakasyātmā karṇamūrtimupāśritaḥ /
tadvairaṃ saṃsmaranvīra yotsyate keśavārjunau //

sa te vikramaśauṇḍīro raṇe pārthaṃ vijeṣyati /
karṇaḥ praharatāṃśreṣṭhaḥ sarvāṃścārīnmahārathaḥ //

jñātvaitacchadmanā vajrī rakṣārthaṃ savyasācinaḥ /
kuṇḍale kavacaṃ caiva karṇasyāpahariṣyati //

tasmādasmābhirapyatra daityāḥ śatasahasraśaḥ / niyuktā rākṣasāścaiva ye te saṃśaptakā iti /
prakhyātāste'rjunaṃ vīraṃ yudhi hiṃsyanti mā śucaḥ //

asapatnā tvayā hīyaṃ bhoktavyā vasudhā nṛpa /
mā viṣādaṃ gamastasmānnaitattvayyupapadyate //

vinaṣṭe tvayi cāsmākaṃ pakṣo hīyeta kaurava / gaccha vīra na te buddhiranyā kāryā kathañcana /
tvamasmākaṃ gatirnityaṃ devatānāṃ ca pāṇḍavāḥ //
vaiśampāyana uvāca /

evamuktvā pariṣvajya daityāstaṃ rājakuñjaram /
samāśvāsya ca durdharṣaṃ putravaddānavarṣabhāḥ //

sthirāṃ kṛtvā buddhimasya priyāṇyuktvā ca bhārata /
gamyatāmityanujñāya jayamāpnuhi cetyatha //

tairvisṛṣṭaṃ mahābāhuṃ kṛtyā saivānayatpuraḥ /
tameva deśaṃ yatrāsau tadā prāyamupāviśat //

pratinikṣipyataṃ vīraṃ kṛtyā samabhipūjya ca /
anujñātā ca rājñā sā tatraivāntaradhīyata //

gatāyāmatha tasyāṃ tu rājā duryodhanastadā /
svapnabhūtamidaṃ sarvamacintayata bhārata //

sammṛśya tāni vākyāni dānavoktāni durmateḥ /
vijeṣyāmi raṇe pāṇḍūniti cāsyābhavanamatiḥ //

karṇaṃ saṃśaptakāṃścaiva pārthasyāmitraghātinaḥ /
amanyata vadhe yuktānsamarthāṃśca suyodhanaḥ //

evamāśā dṛḍhā tas dhārtarāṣṭras durmateḥ /
vinirjaye pāṇḍavānāmabhavadbharatarṣabha //

karṇo'pyāviṣṭacittātmā narakasyāntarātmanā /
arjunasya vadhe krūrāṃ karoti sma tadā matim //

saṃśaptakāśca te vīrā rākṣasāviṣṭacetasaḥ /
rajastamobhyāmākrāntāḥ phālgunasya vadhaiṣiṇaḥ //

bhīṣmadroṇakṛpādyāśca dānavākrāntacetasaḥ /
na tathā pāṇḍuputrāṇāṃ snehavanto'bhavaṃstadā //

na cācacakṣe kasmaicidetadrājā suyodhanaḥ /
kṛtyayā'nāyyakathitaṃ yadasya niśi dānavaiḥ //

duryodhanaṃ niśante ca karṇo vaikartano'bravīt /
smayannivāñjaliṃ kṛtvā pārthivaṃ hetumadvacaḥ //

na mṛto jayate śatrūñjīvanbhadrāṇi paśyati /
mṛtasya bhadrāṇi kutaḥ kauraveya kuto jayaḥ //

na kālā'dya viṣādasya bhayasya maraṇasya vā /
pariṣvajyābravīccaivanaṃ bhujābhyāṃ sa mahābhujaḥ //

uttiṣṭha rājankiṃ śeṣe kasmācchocasi śatruhan /
śatrūnpratāpya vīryeṇa sa kathaṃ martumarhasi //

athavā te bhayaṃ jātaṃ dṛṣṭvā'rjunaparākramam /
satyante pratijānāmi vadhiṣyāmi raṇe'rjunam //

gate trayodaśe varṣe satyenāyudhamālabhe /
ānayiṣyāmyahaṃ pārtānvaśaṃ tava janādhipa //

evamuktastu karṇena daityānāṃ vacanāttathā /
praṇipātena cāpyeṣāmudatiṣṭhatsuyodhanaḥ //

daityānāṃ tadvacaḥ śrutvā hṛdi kṛtvā sthirāṃ matim / tato manujaśārdūlo yojayāmāsa vāhinīm /
rathanāgāśvaphalilāṃ padātijanasankulām //

gaṅgaughapratimā cāsya prayāṇe śuśubhe camūḥ //

śvetacchatraiḥ patākābhiścāmaraiśca supāṇḍuraiḥ /
rathairnāgaiḥ padātaiśca śuśubhe'tīva sankulā //

vyapetābhraghane kāle dyaurivāsīttu śāradī /
haṃsapaṅktisamākīrṇā bhramatsārasaśobhitā //

jayāśīrbhirdvijendraiḥ sa stūyamāno'dhirājavat /
gṛhṇannañjalimālāśca dhārtarāṣṭro janādhipaḥ //

suyodhano yayāvagre śriyā paramayā jvalam /
karṇena sārdhaṃ rājendra saubalena ca devinā //

duḥśāsanādayaścāsya bhrātaraḥ sarva eva te /
bhūriśravāḥ somadatto mārājaśca bāhlikaḥ //

rathairnānāvidhākārairhayairgajavaraistathā /
prayāntaṃ nṛpasiṃhaṃ tamanujagmuḥ kurūdvahāḥ //

prahṛṣṭamanasaḥ sarve duryodhanapurogamāḥ // kālenālpena rājendra svapuraṃ viviśustadā //