Mahabharata · Chapter 3.245

yudhiṣṭhiravacaḥ śrutvā bhīmasenapurogamāḥ /
prahṛṣṭavadanāḥ sarve samuttasthurnararṣabhāḥ //

abhedyāni tataḥ sarve samanahyanta bhārata / jāmbūnadavicitrāṇi kavacāni mahārathāḥ /
āyudhāni ca divyāni vividhāni samādadhuḥ //

te daṃśitā rathaiḥ sarve dhvajinaḥ saśarāsanāḥ /
pāṇḍavāḥ pratyadṛśyanta jvalitā ivapāvakāḥ //

tānrathānsādhusampannānsaṃyuktāñjavanairhayaiḥ /
āsthāya rathaśārdūlāḥ śīghrameva yayustataḥ //

tataḥ kauravasainyānāṃ prādurāsīnmahāsvanaḥ /
prayātānsahitāndṛṣṭvā pāṇḍuputrānmahārathān //

jitakāśinaśca svacarāstvaritāśca mahārathāḥ /
kṣaṇenaiva vane tasminsamājagmurabhītavat //

nyavartanta tataḥ sarve gandharvā jitakāśinaḥ /
dṛṣṭvā rathagatānvīrānpāṇḍavāṃścaturo raṇe //

tāṃstu vibhrājitāndṛṣṭvā lokapālānivodyatān /
vyūḍhānīkā vyatiṣṭhanta gandhamādanavāsinaḥ //

rājñastu vacanaṃ śrutvā dharmaputrasya dhīmataḥ /
krameṇa mṛdunā yuddhamupakrāntaṃ ca bhārata //

na tu gandharvarājasya sainikā mandacetasaḥ /
śakyante mṛdunā śreyaḥ pratipādayituṃ tadā //

tatastānyudhi durdharṣānsavyasācī parantapaḥ /
sāntvapūrvamidaṃ vākyamuvāca khacarānraṇe //

naitadgandharvarājasya yuktaṃ karma jugupsitam /
paradārābhimarśaśca mānuṣaiśca samāgamaḥ //

utsṛjadhvaṃ mahāvīryāndhṛtarāṣṭrasutānimān /
dārāṃścaiṣāṃ pramuñcadhvaṃ dharmarājasya śāsanāt //

ta evamuktā gandharvāḥ pāṇḍavena yaśasvinā /
utsmayantastadā pārthamidaṃ vacanamabruvan //

ekasyaiva vayaṃ tāta kuryāma vacanaṃ bhuvi /
yasya śāsanamājñāya carāmo vigatajvarāḥ //

tenaikena rakayathādiṣṭaṃ tathā vartāma bhārata /
na śāstā vidyate'smākamanyastasmātsureśvarāt //

evamuktaḥ sa gandharvaiḥ kuntīputro dhanañjayaḥ /
gandharvānpunarevaitānvacanaṃ pratyabhāṣata //

yadi sāmnā na muñcadhvaṃ gandharvā dhṛtarāṣṭrajān /
mokṣayiṣyāmi vikramya svayameva suyodhanam //

evamuktvā tataḥ pārthaḥ savyasācī dhanañjayaḥ /
sasarja niśitānbāṇānkhacarānkhacarānprati //

tathaiva śaravarṣeṇa gandharvāste balotkāṭāḥ /
pāṇḍavānabhyavartanta pāṇḍavāśca divaukasaḥ //

tataḥ sutumulaṃ yuddhaṃ gandharvāṇāṃ tarasvinām / babhūva bhīmavegānāṃ ca bhāta //