Mahabharata · Chapter 3.244

asmānabhigatāṃstāta bhayārtāñcharaṇaiṣiṇaḥ /
kauravānviṣamaprāptānkathaṃ brūyāstvamīdṛśam //

bhavanti bhedā jñātīnāṃ kalahāśca vṛkodara /
prasaktāni ca vairāṇi jñātidharmo na naśyati //

yadā tu kaścijjñātīnāṃ bāhyaḥ prārthayate kulam /
na marṣayanti tatsanto bāhyenābhipradharṣaṇam //

jānātyeṣa hi durbuddhirasmāniha ciroṣitān /
sa evaṃ paribhūyāsmānakārṣīdidamapriyam //

duryodhanasya grahaṇādgandharveṇa balādraṇe /
strīṇāṃ bāhyābhimarśācca hataṃ bhavati naḥ kulam //

ścaraṇaṃ ca prapannānāṃ trāṇārthaṃ ca kulasya ca /
uttiṣṭhadhvaṃ naravyāghrāḥ sajjībhavata mā ciram //

arjunaśca yamau caiva tvaṃ ca bhīmāparājitaḥ /
mokṣayadhvaṃ naravyāghrā hriyamāṇaṃ suyodhanam //

ete rathā naravyāghrāḥ sarvaśastrasamanvitāḥ /
dhṛtarāṣṭrasya putrāṇāṃ vimalā kāñcanadhvajāḥ //

sasvanānadhirohadhvaṃ nityasajjānimānrathān /
indrasenādibhiḥ sūtaiḥ kṛtaśastrairadhiṣṭhitān //

etānāsthāya vai yattā gandharvānyoddhumāhave /
suyodhanasya mokṣāya prayatadhvamatanadritāḥ //

paraiḥ paribhave prāpte vayaṃ pañcottaraṃ śatam / parasparavirodhe tu vayaṃ pañcaiva te śatam //

ya eva kaścidrājanyaḥ śaraṇārthamihāgatam /
paraṃ śaktyābhirakṣeta kiṃ punastvaṃ vṛkodara //

evamuktastu kaunteyaḥ punarvākyamabhāṣata /
kopasaṃraktanayanaḥ pūrvavairamanusmaran //

purā jatugṛhe'nena dagdhumasmānyudhiṣṭhira /
durbuddhirhi kṛtā vīra tadā daivena rakṣitāḥ //

kālakūṭaviṣaṃ tīkṣṇaṃ bhojane mama bhārata /
uptvā gaṅgāṃ latāpāśairvaiddhvā ca prākṣipatprabho //

rasātalaṃ ca samprāpya tadā vāsukimañjasā /
tatra dṛṣṭvā tu rājendrapunaḥ prāpto mahītalam //

dyūtakāle'pikaunteya vṛjināni kṛtani vai / draupadyāśca parābharśaḥ keśagrahaṇameva ca /
vastrāpaharaṇaṃ caiva sabhāmadhye kṛtāni vai //

rājyaṃ cācchidya rājendra uktavānparuṣāṇi naḥ /
purā kṛtānāṃ pāpānāṃ phalaṃ bhuṅkte suyodhanaḥ //

asmābirevakartavyaṃ dhārtarāṣṭrasya nigraham / anyena tu kṛtaṃ tadvai maitryamasmākamicchatā /
upakārī tu gandharvo mā rājanvimanā bhava //
vaiśampāyana uvāca /

etasminnantare rājaṃścitrasenena vai hṛtaḥ /
vilalāpa suduḥkhārto nīyamānaḥ suyodhanaḥ //

yudhiṣṭhira mahābāho sarvadharmabhṛtāṃvara /
saputrānsahadārāṃśca gandharveṇa hṛtānbalāt //

pāṇḍuputra mahābāho kauravāṇāṃ yaśaskara sarvadharmabhṛtāṃ śreṣṭha gandharveṇa hṛtaṃ balāt /
rakṣasva puruṣavyāghra yudhiṣṭhira mahāyaśaḥ //

bhrātaraṃ te mahābāho baddhvā nayati māmayam /
duśśāsanaṃ durviṣahaṃ durmukhaṃ durjayaṃ tathā //

baddhvā haranti gandharvā asmāndārāṃśca sarvaśaḥ /
anudhāvata māṃ kṣipraṃ rakṣadhvaṃ puruṣottamāḥ //

yamau māmanudhāvetāṃ rakṣārthaṃ mama sāyudhau / kuruvaṃśasya sumahadayaśaḥ prāptamīdṛśam /
vyapohayadhvaṃ gandharvāñjitvā vīryeṇa pāṇḍavāḥ //

evaṃ vilapamānasya kauravasyārtayā girā /
śrutvā vilāpaṃ sambhrānto ghṛṇayā'bhipariplutaḥ //

yudhiṣṭhiraḥ punarvākyaṃ bhīmasenamathābravīt /
suyodhanasya mokṣāya prayatadhvamatandritāḥ //

ka ivāryo dayetprāṇānabhidhāveti coditaḥ /
prāñjalaṃ śaraṇāpannaṃ dṛṣṭvā śatrumapi dhruvam //

varapradānaṃ rājyaṃ ca putrajanma ca pāṇḍavāḥ /
śatrośca mokṣaṇaṃ kleśāstrīṇi caikaṃ ca tatsamam //

na hyastyadhikametasmādyadāpannaḥ suyodhanaḥ /
tvadbāhubalamāśritya jīvitaṃ parimārgate //

svayameva pradhāveyaṃ yadi na syādvṛkodara /
vitato me kraturvīra na hi me'tra vicāraṇā //

sāmnaiva tu yathā bhīma mokṣayethāḥ suyodhanam /
tathā sarvairupāyaistvaṃ yatethāḥ kurunandana //

na sāmnā pratipadyeta yadi gandharvarāḍasau /
parākrameṇa mṛdunā mokṣayethāḥ suyodhanam //

athāsau mṛduyuddhena na muñcedbhīma kauravān /
sarvopāyairpimocyāste nigṛhya paripanthinaḥ //

etāvaddhi mayā śakyaṃ sandeṣṭuṃ vai vṛkodara / vaitāne karmaṇi tate vartamāne ca bhārata /
varapradānaṃ sumahadyācakasya prakīrtitam //
vaiśampāyana uvāca /

ajātasatrorvacanaṃ tacchrutvā tu dhanañjayaḥ /
pratijajñe gurorvākyaṃ kauravāṇāṃ vimokṣaṇam //
arjuna uvāca /

yadi kakasāmnā na mokṣyanti gandharvā dhṛtarāṣṭrajān /
adya gandharvarājasya bhūmiḥ pāsyati śoṇitam //

arjunasya tu tāṃ śrutvā pratijñāṃ satyavādinaḥ / kauravāṇāṃ tadā rājanpunaḥ pratyāgataṃ manaḥ //