Mahabharata · Chapter 3.243

gandharvaistu mahārāja bhagne karṇe mahārathe /
samprādravaccamūḥ sarvā dhārtarāṣṭrasya paśyataḥ //

tāndṛṣṭvā dravataḥ sarvāndhārtarāṣṭrānparāṅmukhān /
duryodhano mahārājo nāsīttatra parāṅmukhaḥ //

tāmāpatantīṃ samprekṣya gandharvāṇāṃ mahācamūm /
mahatā śaravarṣeṇa so'bhyavarṣadarindamaḥ //

acintya śaravarṣaṃ tu gandharvāstasya taṃ ratham /
duryodhanaṃ jighāṃsantaḥ samantātparyavārayan //

yugamīṣāṃ varūthaṃ ca tathaiva dhvajasārathī /
aśvāṃstriveṇumakṣaṃ ca tilaśo vyadhamañcharaiḥ //

duryodhanaṃ citrasano virathaṃ patitaṃ bhuvi /
abhidrusya mahābāhurjīvagrāhamathāgrahīt //

tasya bāhū mahārāja baddhvā rajjvā mahāratham /
āropyasa mahābāhuścitraseno nanāda ha //

tasmingṛhīte rājendra sthitaṃ duḥśāsanaṃ rathe /
paryagṛhṇanta gandharvāḥ parivārya samantataḥ //

vidhiśatiṃ citrasenamādāyānye vidudruvuḥ /
vindānuvindāvapare rājadārāṃśca sarvaśaḥ //

senāstu dhārtarāṣṭrasya gandharvaiḥ samabhidrutāḥ /
pūrvaṃ prabhagnaiḥ sahitāḥ pāṇḍavānabhyayustadā //

śakaṭāpaṇaveśāśca yānayugyaṃ ca sarvaśaḥ /
śaraṇaṃ pāṇḍavāñjagmurhiyamāṇe mahīpatau //
sainikā ūcuḥ /

priyadarśī mahābāho dhārtarāṣṭro mahābalaḥ /
gandharvairhriyate rājā pārthāstamanudhāvata //

duḥśāsano durviṣaho durmukho durmukho durjayastathā /
baddhvā hriyante gandharvai rājadārāśca sarvaśaḥ //

itiduryodhanāmātyāḥ krośanto rājagṛddhinaḥ /
ārtā dīnāstataḥ sarve yudhiṣṭhiramupāgaman //

tāṃstathā vyathitāndīnānbhikṣamāṇānyudhiṣṭhiram /
vṛddhānduryodhanāmātyānbhīmaseno'bhyabhāṣata //

mahatā hi prayatnena sannahya gajavājibhiḥ /
anyathā vartamānānāmartho jāto'yamanyathā //

asmābhiryadanuṣṭheyaṃ gandharvaistadanuṣṭhitam //

durmantritamidaṃ tāvadrājño durdyūtadevinaḥ /
dīnānduryodhanasyāsmāndraṣṭukāmasya durmateḥ //

dveṣṭāramanye klīvasya ghātayantīti naḥ śrutam /
idaṃ kṛtaṃ naḥ pratyakṣaṃ gandharvairatimānuṣam //

diṣṭyā loke pumānasti kaścidasmanpriye sthitaḥ /
yenāsmākaṃ hṛto bhāra āsīnānāṃ sukhāvahaḥ //

śītavātātapasahāṃstapasā caiva karśitān /
samastho viṣamasthānhi draṣṭumicchati durmatiḥ //

adharmacāriṇastasya kauravyasya durātmanaḥ /
ye śīlamanuvartanti te paśyanti parābhavam //

adharmo hi kṛtastena yenaitadupalakṣitam /
anṛśaṃsāstu kaunteyāstatpratyakṣaṃ bravīmi vaḥ //

evaṃ bruvāṇaṃ kaunteyaṃ bhīmasenamapasvaram / na kālaḥ paruṣasyāyamiti rājā'bhyabhāṣata //