Mahabharata · Chapter 3.242

tataste sahitāḥ sarve duryādhanamupāgaman /
abruvaṃśca mahārāja yadūcuḥ kauravaṃ prati //

gandharvairvārite sainye dhārtarāṣṭraḥ pratāpavān /
amarṣapūrṇaḥ sainyāni pratyabhāṣata bhārata //

śāsatainānadharmajñānmama vipriyakāriṇaḥ / yadi prakrīḍate sarvairdevaiḥ saha śacīpatiḥ /
vayamatra yathā prītā krīḍiṣyāmo niraṅkuśaṃ //

duryodhanavacaḥ śrutvā dhārtarāṣṭrā mahābalāḥ /
sarva evābhisannaddhā yodhāścāpi sahasraśaḥ //

tataḥ pramathya sarvāṃstāṃstadvanaṃ viviśurbalāt /
siṃhanādena mahatā pūrayanto diśo daśa //

tato'parairavāryanta gandharvaiḥ kurusainikāḥ /
sāmnaiva ratatra vikrāntā mā sāhasamiti prabho //

te vāryamāṇā gandharvaiḥ sāmnaiva vasudhāyipa /
tānanādṛtya gandharvāṃstadvanaṃ viviśurmahat //

yadi vātā na tiṣṭhanti dhārtarāṣṭrāḥ sarājakāḥ /
tataste khecarāḥ sarve citrasene nyavedayan //

gandharvarājastānsarvānabravītkauravānprati /
anāryāñśāsatetyetāṃścitraseno'tyamarṣaṇaḥ //

anujñātāśca gandharvāścitrasenena bhārata /
pragṛhītāyudhāḥ sarve dhārtarāṣṭrānabhidravan //

tāndṛṣṭvā'patataḥ śīghrāngandharvānudyatāyudhān /
prādravaṃste diśaḥ sarve dhārtarāṣṭrasya paśyataḥ //

tāndṛṣṭvā dravataḥ sarvāndhārtarāṣṭrānparāṅmukhān /
rādheyastu tadā vīro nāsīttatraparāṅmukhaḥ //

āpatantīṃ tu samprekṣya gandharvāṇāṃ mahācamūm /
mahatā śaravarṣeṇa rādheyaḥ pratyavārayat //

kṣuraprairviśikhairbhallairvatsadantaistathā'yasaiḥ /
gandharvāñśataśo'bhighnam̐llaghutvātsūtanandanaḥ //

pātayannuttamāṅgāni gandharvāṇāṃ mahārathaḥ /
kṣaṇaena vyadhamatsarvāṃ citrasenasya vāhinīm //

te vadhyamānā gandharvāḥ sūtaputreṇa dhīmatā /
bhūya evābhyavartanta śatataśo'tha sahasraśaḥ //

gandharvabhūtā pṛthivī kṣaṇena samapadyata /
āpatadbhirmahāvegaiścitrasenasya sainikaiḥ //

atha duryodhano rājā śakuniścāpi saubalaḥ / duḥśāsano vikarṇaśca ye cānye dhṛtarāṣṭrajāḥ /
nyahanaṃstattadā sainyaṃ rathairgaruḍaniḥkhanaiḥ //

sainyamāyodhitaṃ dṛṣṭvākarṇo rājanna mṛṣyata //

mahatā rathasaṅghena rathacāreṇa cāpyuta / vaikartanaṃ parīpsanto gandharvāḥ pratyavārayan /
tataḥ sannyapatansarve gandharvāḥ kauravaṃ prati //

tadā sutumulaṃ yuddhamabhavadromaharṣaṇam /
tataste mṛdavo'bhūvanagandharvāḥ śarapīḍitāḥ //

uccukruśuśca kauravyāgandharvānprekṣya pīḍitān //

gandharvāṃstrāsitāndṛṣṭvā citraseno hyamarṣaṇaḥ /
utpapātāsanātkruddho vadhe teṣāṃ samāhitaḥ //

tato māyāstramāsthāya yuyudhe citramārgavit /
viyatsañchādayāmāsa na vavau tatra mārutaḥ //

hastyārohā hatāḥ peturhastibhiḥ saha bhārata /
hayārohāḥ saha hayai rathaiśca rathinastadā //

pattayaśca tathāpeturviśastāḥ śaravṛṣṭibhiḥ /
tayā'muhyanta kauravyāścitrasenasya māyayā //

ekaiko hi tadā yodho dhārtāraṣṭrasya bhārata /
paryavāryata gandharvairdaśabhirdaśabhiryudhi //

tataḥ sampīḍyamānāste balena mahatā tadā /
prādravanta raṇe bhītā yatrarājā yudhiṣṭhiraḥ //

bhajyamāneṣvanīkeṣu dhārtarāṣṭreṣu sarvaśaḥ /
karṇo vaikartano rājaṃstasthau giririvācalaḥ //

duryodhanaśca tejasvī śakuniścāpi saubalaḥ /
gandharvānyodhayāmāsuḥ samare bhṛśavikṣatāḥ //

sarva eva tu gandharvāḥ śataśo'tha sahasraśaḥ /
jighāṃsamānāḥ saṃrabdhāḥ karṇamabhyadravatraṇe //

asibhiḥ paṭṭasaiḥ śūlairgadābhiśca mahābalāḥ /
sūtaputraṃ jighāṃsantaḥ samantātparyavārayan //

anye'sya yugamacchindandhvajamanye nyapātayan /
īṣāmanye hayānanye sūtamanye nyapātayan //

anye cchatraṃ varūthaṃ ca bandhuraṃ ca tathā pare / anye sañcūrṇayāmāsuśchatre cākṣau tathā pare //

gandharvā bahusāhasrāstilaśo vyadhamanratham // tato rathādavaplutya sūtaputro'sicarmabhṛt /

aṃsāvalambitadhanurdhāvamāno mahābalaḥ / vikarṇarathamāsthāya mokṣāyāśvānacodayat //