Mahabharata · Chapter 3.233

bhagavañśrotumicchāmi nāmāni ca mahātmanaḥ /
tariṣu lokeṣu yānyasya vikhyātāni dvijottama //
vaiśampāyana uvāca /

ityuktaḥ pāṇḍaveyena mahātmā ṛṣisannidhau /
uvāca bhagavāṃstatra mārkaṇḍeyo mahātapāḥ //

āgeyaścaiva skanadaśca dīptakīrtiranāmayaḥ /
mayūraketurdharmātmā bhūteśo mahiṣārdanaḥ //

kāmajitkāmadaḥ kāntaḥ satyavāgbhuvaneśvaraḥ /
śiśuḥ śīghraḥ śuciścaṇḍo dīptavarṇaḥ śubhānanaḥ //

amoghastvanagho raudraḥ priyaścandrānanastathā /
dīptaśaktiḥ praśāntātmā nadrakukkuṭamohanaḥ //

ṣaṣṭhīpriyaśca dharmātmā pavitro mātṛvatsalaḥ /
kanyābhartā vibhaktaśca svāheyo revatīsutaḥ //

prabhurnetā viśākhaśca naigameyaḥ suduścaraḥ /
suvrato lalitaścaivabālakrīḍanakapriyaḥ //

khacārī brahmacārī ca śūraḥ śaravaṇodbhavaḥ / viśvāmitrapriyaścaiva devasenāpriyastathā /
vāsudevapriyaścaiva priyaḥ priyakṛdeva tu //

nāmānyetāni divyāni kārtikeyasya yaḥ paṭhet /
svargaṃ kīrtiṃ dhanaṃ caiva sa labhennātra saṃśayaḥ //
mārkaṇḍeya uvāca /

stoṣyāmi devairṛṣibhiśca juṣṭaṃ śaktyā guhannāmabhiraprameyam /
ṣaḍānanaṃ śaktidharaṃ suvīraṃ nibodha caitāni kurupravīra //

brahmaṇyo vai brahamajo brahmavicca brahmeśayo brahmavatāṃvariṣṭhaḥ /
brahmapriyo brāhmaṇasarvamantrī tvaṃ brahmaṇāṃ brāhmaṇānāñca netā //

svāhā svadhā tvamparamaṃ pavitraṃ mantrastutastvamprathitaḥ ṣaḍarciḥ /
saṃvatsarastvamṛtavaśca ṣaḍvai māsārdhamāsāścadinaṃ diśaśca //

tvampuṣkarākṣastvaravindavakraḥ sahasracakṣosi sahasrabāhuḥ /
tvaṃ lokapālaḥ paramaṃ haviśca tvaṃ bhāvanaḥ sarvasurāsurāṇām //

tvameva senādhipatiḥ pracaṇḍaḥ prabhurvibhuścāpyatha śakrajetā /
sahasrapāttvaṃ dharaṇī tvameva sahasratuṣṭiśca sahasrabhukva //

sahasraśīrṣastvamanantarūpaḥ / sahasrapāttvandaśaśaktidhārī /
gaṅgāsutastvaṃ svamatena deva svāhāmahīkṛttikānāṃ tathaiva //

tvaṃ krīḍase ṣaṇmukha kukkuṭena yatheṣṭanānāvidhakāmarūpī /
dīkṣā'si somo marutaḥ sadaiva dharmo'si vāyuracalendra indraḥ //

sanātanānāmapi śāśvatastvaṃ prabhuḥ prabhūṇāmapi cogradhanvā /
ṛtasya kartā ditijāntakastvaṃ jatā ripūṇāṃ pravaraḥ surāṇām //

sūkṣmaṃ tapastatparamaṃ tvameva parāvarajñosi parāvarastvam /
dharmasya kāmasya parasya caiva tvattejasā katsnamidaṃ mahātman //

vyāptaṃ jagatsarvasurapravīra śaktyā mayā saṃstuta lokanātha /
namostu te dvādaśanetrabāho ataḥ paraṃ vedmi gatiṃ na te'ham //

skandasya ya idaṃ vipraḥ paṭhejjanma samāhitaḥ /
śrāvayedbrāhmaṇebhyo yaḥ śṛṇuyādvā dvijeritam //

dhanamāyuryaśo dīptaṃ putrāñśatrujayaṃ tathā / sa puṣṭituṣṭī samprāpya skandasālokyamāpnuyāt //