Mahabharata · Chapter 3.234

upāsīneṣu vipreṣu pāṇḍaveṣu ca bhārata /
draupadī satyabhāmā ca viviśāte tadā samam //

praviśya cāśramaṃ puṇyamubhe te paramastriyau /
jāhasyamāne suprīte sukhaṃ tatra niṣīdatuḥ //

ciras dṛṣṭvā rājendra te'nyonyasya priyaṃvade /
kathayāmāsatuścitrāḥ kathāḥ kuruyadūcitāḥ //

athābravītsatyabhāmā kṛṣṇas mahiṣī priyā /
sātrājitī yājñasenīṃ rahasīdaṃ sumadhyamā //

kena draupadi vṛttena pāṇḍavānadhitiṣṭhasi /
lokapālopamānvīrānnūnaṃ paramasammatān //

kathaṃ ca vaśagastubhyaṃ na kupyanti ca te śubhe /
tava vaśyā hi satata pāṇḍavāḥ priyadarśane //

na cānyonyamasūyante kathaṃ vā te sumadhyame /
mukhaprekṣāśca te sarve tattvametadbravīhi me //

vratacaryā tapo vā'pi snānamantrauṣadhāni vā /
vidyāvīryaṃ mūlavīryañjapahomāgadāstathā //

mamādyācakṣvapāñcāli yaśasyaṃ bhagavetanam /
yena kṛṣṇe bhavennityaṃ mama kṛṣṇo vaśānugaḥ //

evamuktvāsatyabhāmā virarāma yaśasvinī /
pativratā mahābhāgā draupadī pratyuvāca tām //

asatstrīṇāṃ samācaraṃ satye māmanupṛcchasi /
asadācarite mārge kathaṃ syādanukīrtanam //

anupraśnaḥ saṃśayo vā naiṣa tvayyupapadyate /
kathaṃ hyupetā buddhyā tvankṛṣṇas mahiṣī priyā //

yadaiva bhartā jānīyānamantramūlaparāṃ striyam /
udvijeta tadaivāsyāḥ sarpādveśmagatādiva //

udvignasya kutaḥ śāntiraśāntasya kutaḥ sukham /
na jātu vaśago bhartā striyāḥ syānmantrakāraṇāt //

kimatraprahitāścāpi gadāḥ paramadāruṇāḥ / mūlapravādairhi viṣaṃ prayacchanti jighāṃsavaḥ baba

jihvayā yāni puruṣastvacā vāpyupasevate /
tatra cūrṇāni dattāni hanyuḥ kṣipramasaṃśayam //

jalodarasamāyuktāḥ śvitriṇaḥ palitāstathā /
apumāṃsaḥ kṛtāḥ strībhirjaḍāndhavadhirāstathā //

pāpānugāstu pāpāstāḥ patīnupasṛjantyuta /
na jātu vipriyaṃ bhartuḥ striyā kāryaṃ kathañcana //

vartāmyahaṃ tu yāṃ vṛttiṃ pāṇḍaveṣu mahātmasu /
tāṃ sarvāṃ śṛṇu me satyāṃ satyabhāme yaśasvini //

ahankāraṃ vihāyāhaṃ kāmakrodhau ca sarvadā /
sadārānpāṇḍavānnityaṃ prayatopacarāmyaham //

praṇayaṃ pratisaṃhṛtya nidhāyātmānamātmani /
śuśrūṣurnirabhīmānā patīnāṃ cittarakṣiṇī //

durvyāhṛtācchaṅkamānā dusthitādduravekṣitāt /
durāsitāddurvrajitādiṅgitādhyāsitādapi //

sūryavaiśvānarasamānsomakalpānmahārathān /
seve cakṣurhaṇaḥ pārthānugravīryapratāpinaḥ //

devo manuṣyo gandharvo yuvā cāpi svalankṛtaḥ /
dravyavānabhirūpo vā na me'nyaḥ puruṣo mataḥ //

na bhuktavati na snāte nāsaṃviṣṭe ca bhartari /
na saṃviśāmi nāśnāmi na snāye karma kurvatī //

kṣetrādvanādvā grāmādvā bhartāraṃ guhamāgatam /
abhyutthāyābhinandāmi āsanenodakena ca //

prasannabhāṇḍā mṛṣṭānnā kāle bhojanadāyinī /
saṃyatā guptadhānyā ca susammṛṣṭaniveśanā //

atiraskṛtasambhāṣā duḥstriyo nānusevatī /
anukūlavatī nityaṃ bhavāmyanalasā sadā //

anarma cāpi hasitaṃ dvāri sthānamabhīkṣṇaśaḥ /
avaskare cirasthānaṃ niṣkuṭeṣu ca varjaye //

atyālāpamasantoṣaṃ paravyāpārasankathāḥ /
atihāsātiroṣau ca krodhasthānaṃ ca varjaye //

niratā'haṃ sadā satye pāpānāṃ ca vivarjane /
sarvathā bharturahitaṃ na mameṣṭaṃ kathañcana //

yadā pravasate bhartā kuṭumbārthena kenacit /
sumanovarṇakāpetā bhavāmi vratacāriṇī //

yacca bhartā na pibati yacca bhartā na sevate /
yacca nāśnāti me bhartā sarvaṃ tadvarjayāmyaham //

yathopadeśaṃ niyatā vartamānā varāṅgane /
svalankṛtā suprayatā bhartuḥ priyahite ratā //

ye ca dharmāḥ kuṭumbeṣu śvaśrvāme kathitāḥ purā /
anutiṣṭhāmi tānsatye nityakālamatandritā //

bhikṣābaliśrāddhavidhisthālīpākāśca parvasu /
mānyānāṃ mānasatkārā ye cānye viditā mama //

tānsarvānanuvartāmi divārātramatandritā /
vinayānaniyamāṃścaiva sadā sarvātmanā śritā //

mṛdūnsataḥ satyaśīlānsatyadharmānupālinaḥ /
sa devaḥ sā gatirnāryāstasya kā vipriyaṃ caret //

patyāśrayo hi me dharmo mataḥ strīṇāṃ sanātanaḥ /
sa devaḥ sā gatirnāryāstasya kāvipriyaṃ caret //

ahaṃ patīnnātiśaye nātyaśne nātibhūṣaye /
nāpi śvaśrūṃ parivade sarvadā pariyantritā //

avadhānena subhage nityotthitatayaiva ca /
bhartāro vaśagā mahyaṃ guruśuśrūṣayaiva ca //

nityamāryāmahaṃ kuntīṃ vīrasūṃ satyavādinīm /
svayaṃ paricarāmyatāṃ pānācchādanabhojanaiḥ //

naitāmatiśaye jātu vastrabhūṣaṇabhojanaiḥ /
na vade cāpyativācā tāṃ pṛthāṃ pṛthivīsamām //

aṣṭāvagre brāhmaṇānāṃ sahasrāṇi sma nityadā /
bhuñjate rukmapātrīṣu yudhiṣṭhiraniveśane //

aṣṭāśītisahasrāṇi snātakā gṛhamedhinaḥ /
triṃśaddāsīka ekaiko yānvibharti yudhiṣṭhiraḥ //

daśānyāni sahasrāṇi yeṣāmannaṃ susaṃskṛtam /
hriyate rukmapātrībhiryatīnāmūrdhvaretasām //

tānsarvānagrahāreṇa brāhmaṇānvedavādinaḥ /
yathārhaṃ pūjayāmi sma pānācchādanabhojanaiḥ //

śataṃ dāsīsahasrāṇi kaunteyasya mahātmanaḥ /
kambukeyūradhāriṇyo niṣkakaṇṭhyaḥ svalankṛtāḥ //

mahārhamālyābharaṇāḥ suvarṇāścandanokṣitāḥ /
maṇīnhema ca vibhratyo nṛttagītaviśāradāḥ //

tāsāṃ nāma ca rūpañca bhojanācchādanāni ca /
sarvāsāmeva vedāhaṃ karma caiva kṛtākṛtam //

śataṃ dāsīsahasrāṇi kuntīputrasya dhīmataḥ /
pātrīpastā divārātramatithīnbhojayantyuta //

śatamaśvasahasrāṇi daśanāgāyutāni ca /
yudhiṣṭhirasyānuyātramindraprasthanivāsinaḥ //

etadāsīttadā rājño yanmahīṃ paryapālayat /
yeṣāṃ saṅkhyāvidhiṃ caiva pradiśāmi śṛṇomi ca //

antaḥpūrāṇāṃ sarveṣāṃ bhṛtyānāṃ caiva sarvaśaḥ /
āgopālāvipālebhyaḥ sarvaṃ veda kṛtākṛtam //

sarvaṃ rājñaḥ samudayamāyaṃ ca vyayameva ca /
ekā'haṃvedmi kalyāṇi pāṇḍavānāṃ yaśasvini //

mayi sarvaṃ samāsajyakuṭumbaṃ bharatarṣabhāḥ /
upāsanaratāḥ sarve ghaṭayanti varānane //

tamahaṃ bhāramāsaktamanādhṛṣyaṃ durātmabhiḥ /
sukhaṃ sarvamparityajyarātryahāni ghaṭāmi vai //

adhṛṣyaṃ varuṇasyeva nidhipūrṇamivodadhim /
ekāhaṃ vedmi kośaṃ vai patīnāṃ dharmacāriṇām //

aniśāyāṃ niśāyāṃ ca vihāya kṣutpipāsayoḥ /
ārādhayantyāḥ kauravyāṃstulyā rātrirahaśca me //

prathamaṃ pratibudhyāmi caramaṃ saṃviśāmi ca /
nityakālamahaṃ satye etatsaṃvananaṃ mama //

etajjānāmyahaṃ kartuṃ bhartṛsaṃvananaṃ mahat /
asatstrīṇāṃ samācāraṃ nāhaṃ kuryāṃ na kāmaye //
vaiśampāyana uvāca /

tacchrutvā dharmasahitaṃ vyāhṛtaṃ kṛṣṇayā tadā /
uvāca satyā satkṛtya pāñcālīṃ dharmacāriṇīṃ //

abhipannā'smi pāñcāli yājñaseni kṣamasva me / kāmakāraḥ sakhīnaṃ hi sopahāsaṃ prabhāṣitam //