Mahabharata · Chapter 3.229

tataḥ prakalpya putratve skandaṃ mātṛgaṇo'gamat / kākī ca halimā caiva mātā cātha halī tathā /
āryā bālā ca dhātrī ca saptaitā śiśumātaraḥ //

etāsāṃ vīryasampannaḥ śiśurnāmātidāruṇaḥ /
skandaprasādajaḥ putro lohitākṣo bhayankaraḥ //

eṣa vīro'ṣṭamaḥ proktaḥ skando mātṛgaṇodbhavaḥ /
chāgavakreṇa sahito navamaḥ parikīrtyate //

ṣaṣṭhaṃ chāgamayaṃ vakraṃ skandasyaiveti viddhi tam /
ṣaṭ्śirobhyantaraṃ rājannityaṃ mātṛgaṇārcitam //

ṣaṇṇāṃ tu pravaraṃ tasya śīrṣāṇāmiha śabdyate /
śaktiṃ yenāsṛjaddivyāṃ bhadraśākha iti sma ha //

ityetaddvividhākāraṃ vṛttaṃ śuklasya pañcamīm /
tatra yuddhaṃ mahāghoraṃ vṛttaṃ ṣaṣṭhyāṃ janādhipa //

upaviṣṭaṃ tu taṃ skandamāmuktakavacasrajam /
hiraṇyacūḍamukuṭaṃ hiraṇyānkṣaṃ mahāprabham //

lohitāmbarasaṃvītaṃ tīkṣṇadaṃṣṭraṃ manoramam /
sarvalakṣaṇasampannaṃ trailokyasyāpi supriyam //

tatastaṃ varadaṃ śūraṃ yuvānaṃ mṛṣṭakuṇḍalam /
abhajatpadmarūpā śrīḥ svayameva śarīriṇī //

śriyā juṣṭaḥ pṛthuyaśāḥ sa kumāro varastadā /
niṣaṇṇo dṛśyate bhūtaiḥ paurṇamāsyāṃ yathā śaśī //

apūjayanmahātmāno brāhmaṇāstaṃ mahābalam //

idamāhustadā caiva skandaṃ tatra maharṣayaḥ //

hiraṇyavarṇa bhadraṃ te lokānāṃ śankaro bhava /
tvayā ṣaḍrātrajātena sarve lokā vaśīkṛtāḥ //

abhayañca punardattaṃ tvayaivaiṣāṃ surottama /
tasmādindro bhavānastu trailokyasyābhayankaraḥ //
skanda uvāca /

kimindraḥ sarvalokānāṃ karotīha tapodhanāḥ /
kathaṃ devagaṇāṃścaiva pāti nityaṃ sureśvaraḥ //
ṛṣaya ūcuḥ /

indro dadhāti bhūtānāṃ balaṃ tejaḥ prajāḥ sukham /
tuṣṭaḥ prayacchati tathā sarvānkāmānsureśvaraḥ //

durvṛttānāṃ saṃharati vratasthānāṃ prayacchati /
anuśāsti ca bhūtāni kāryeṣu balasūdanaḥ //

asūrye ca bhavetsūryastathā'canad्re ca candramāḥ /
bhavatyagniśca vāyuśca pṛthivyāpaśca svaṃ tathā //

etadindreṇa kartavyamindre hi vipulaṃ balam /
tvaṃ ca vīra balī śreṣṭhastasmādindro bhavasva na //
śakra uvāca /

bhavasvendro mahābāho sarveṣāṃ naḥ sukhāvahaḥ /
abhiṣicyasva caivādya prāptarūpo'si sattama //
skanda uvāca /

śādhi tvameva trailokyamavyāgre nijaye rataḥ /
ahaṃ te kinkaraḥ śakra na mamendratvamīpsitam //
śakra uvāca /

balantavādbhutaṃ vīra tvaṃ devānāmarīñjahi /
avajñāsyanti māṃ lokā vīryaṇa tava vismitāḥ //

indratve tu sthitaṃ vīra balahīnaṃ parājitam /
tvattejasā'vamaṃsyanti lokā māṃ surasattama //

āvayośca mitho bhede prayatiṣyantyatandritāḥ /
bhedite ca tvayi vibho loko dvaidhamupeṣyati //

dvidhābhūteṣu lokeṣu niściteṣvāvayostathā /
vigrahaḥ sampravarteta bhūtabhedānmahābala //

tatra tvaṃ māṃ raṇe tāta yathāśraddhaṃ vijeṣyasi /
tasmādindro bhavāneva bhavitā mā vicāraya //
skanda uvāca /

tvameva rājā bhadraṃ te trailokyasya mamaiva ca /
karomi kiṃ ca teśakra śāsanāttadbravīhi me //
indra uvāca /

ahamindro bhaviṣyāmi tava vākyānmahābala /
yadi satyamidaṃ vākyaṃ niścayādbhāṣitaṃ tvayā //

yadi vā śāsanaṃ skanda kartumicchasi me śṛṇu /
abhiṣicyasva devānāṃ saināpatye mahābala //
skanda uvāca /

dānavānāṃ vināśāya devānāmarthasiddhaye /
gobrāhmaṇahitārthāya saināpatye'bhiṣiñca mām //
mārkaṇḍeya uvāca /

so'bhiṣikto maghavatā sarvairdevagaṇaiḥ saha /
atīva śuśubhe tatra pūjyamāno maharṣibhiḥ //

tatra tatkāñcanaṃ chatraṃ dhriyamāṇaṃ vyarocata /
tathaiva susamiddhasya pāvakasyātmamaṇḍalam //

viśvakarmakṛtā cāsya divyā mālā hiraṇmayī /
ābaddhā tripuraghnena svayameva yaśasvinā //

āgamya manujavyāghra saha devyā parantapa /
arcayāmāsa suprīto bhagavāngovṛṣadhvajaḥ //

rudramagniṃ dvijāḥ prāhū rudrasūnustatastu saḥ /
kīrtyate sumahātejāḥ kumāro'dbhutadarśanaḥ //

rudreṇa śukramutsṛṣṭaṃ tacchvetaḥ parvato'bhavat /
pāvakasyenadriyaṃ śvete kṛttikābhiḥ kṛtaṃ nage //

pūjyamānaṃ tu rudreṇa dṛṣṭvā sarvedivaukasaḥ /
rudrasūnuṃ tataḥ prāhurguhaṃ guṇavatāṃvaram //

anupraviśya rudreṇa vahniṃ jāto hyayaṃ śiśuḥ /
tatra jātastataḥ skando rudrasūnustato'bhavat //

rudrasya vahneḥ svāhāyāḥ ṣaṇṇāṃ strīṇāṃ ca tejasā /
jātaḥ skandaḥ suraśreṣṭho rudrasūnustato'bhavat //

araje vāsasī rakte vasānaḥ pāvakātmajaḥ /
bhāti dīptavapuḥ śramānraktābhrābhyāmivāṃśumān //

kukkuṭaścāgninā dattastas keturalankṛtaḥ /
rathe samucchito bhāti kālāgnirava lohitaḥ //

yā ceṣṭā sarvabhūtānāṃ prabhā śaktirbalaṃ tathā /
agratastasya sā śaktirdevānāṃ jayavardhanī //

viveśa kavacaṃ cāsya śarīraṃ sahajaṃ tathā /
yudhyamānasya devasya prādurbhavati tatsadā //

śaktirdharmo balaṃ tejaḥ kāntatvaṃ satyamunnatiḥ /
brahmaṇyatvamasammoho bhaktānāṃ parirakṣaṇam //

nikṛntanaṃ ca śatrūṇāṃ lokānāṃ cābhirakṣaṇam /
skandena saha jātāni sarvāṇyeva janādhipa //

evaṃ devagaṇaiḥ sarvaiḥ so'bhiṣiktaḥ svalankṛtaḥ /
babhau pratītaḥ sumanāḥ paripūrṇendudarśanaḥ //

iṣṭaiḥ svādhyāyaghoṣaiśca devatūryavarairapi /
devagandharvagītaiśca sarvairapsarasāṃ gaṇaiḥ //

etaiścānyaiśca bahubhistuṣṭairhṛṣṭaiḥ svalankṛtaḥ / [susaṃvṛtaḥ piśācānāṃ gaṇairdevagaṇaistathā.]
krīḍanbhāti tadā devairabhiṣiktaśca pāvakiḥ //

abhiṣiktaṃ mahāsenamapaśyanta divaukasaḥ /
vinihatya tamaḥ sūryaṃ yathaivābhyuditaṃ tathā //

athainamabhyayuḥ sarvā devasenāḥ sahasraśaḥ /
asmākaṃ tvaṃ patiriti bruvāṇāḥ sarvato diśaḥ //

tāḥ samāsādya bhagavānsarvabhūtagaṇairvṛtaḥ /
arcitastu stutaścaiva sāntvayāmāsa tā api //

śatakratuścābhiṣicya skandaṃ senāpatiṃ tadā /
sasmāra tāṃ devasenāṃ yā sā tena vimokṣitā //

ayaṃ tasyāḥ patirnūnaṃ vihito brahmaṇā svayam /
sañcintya tvānayāmāsa devasenāṃ hyalankṛtām //

skandaṃ provāca balabhidiyaṃ kanyā surottama /
ajāte tvayi nirdiṣṭā tava patnī svayambhuvā //

tasmāttvamasyā vidhivatpāṇiṃ mantrapuraskṛtam /
gṛhāṇa dakṣiṇaṃ devyāḥ pāṇinā padmavarcasā //

evamuktaḥ sa jagrāha tasyāḥ pāṇiṃ yathāvidhi /
bṛhaspatirmantraviddhi jajāpa ca juhāva ca //

evaṃ skandasya mahiṣīṃ devasenāṃ vidurjanāḥ /
ṣaṣṭhīṃ yāṃ brāhmaṇāḥ prāhurlakṣmīmāsāṃ sukhapradām //

sinībālīṃ kuhūṃ caiva sadvṛttimaparājitām /
ityevamādibhirdevī nāmabhiḥ parikīrtyate //

yadā skandaḥ patirlabdhaḥ śāśvato devasenayā /
tadā tamāśrayallakṣmīḥ svayaṃ devī śarīriṇī //

śrījuṣṭaḥ pañcamīskandastasmācchrīḥ pañcamī smṛtā / ṣaṣṭhyāṃ kṛtārtho'bhūdyasthāttasmātṣaṣṭhī mahātidhiḥ //