Mahabharata · Chapter 3.215

evamuktaḥ sa viprastu dharmavyādhena bhārata /
kathāmakathayadbhūyo manasaḥ prītivardhanīm //
brāhmaṇa uvāca /

mahābhūtāni yānyāhuḥ pañca dharmavidāṃvara /
ekaikasya guṇānsamyakpañcānāmapi me vada //
vyādha uvāca /

bhūmirāpastathā jyotirvāyurākāśameva ca /
guṇottarāṇai sarvāṇi teṣāṃ vakṣyāmi te guṇān //

bhūmiḥ pañcaguṇā brahmananudakaṃ ca caturguṇam /
guṇāstrayastejasi ca trayaścākāśavātayoḥ //

śabdaḥ sparśaśca rūpaṃ ca raso gandhaśca pañcamaḥ /
eteguṇāḥ pañca bhūmeḥ sarvebhyo guṇavattarāḥ //

śabdaḥ sparśaśca rūpaṃ ca saraścāpi dvijottama /
apāmete guṇā brahmankīrtitāstava suvrata //

śabdaḥ sparśaśca rūpaṃ ca tejaso'tha guṇāstrayaḥ /
śabdaḥ sparśaśca vāyau tu śabdaścākāśa eva tu //

ete pañcadaśa brahmanguṇā bhūteṣu pañcasu /
vartante sarvabhūteṣu yeṣu lokāḥ pratiṣṭhitāḥ //

anyonyaṃ nātivartante samyakva bhavati dvija /
yadā tu viṣamaṃ bhāvamācaranti carācarāḥ //

tadā dehī dehamanyaṃ vyatirohati kālataḥ /
prātilomyādvinaśyanti jāyante cānupūrvaśaḥ //

tatra tatrahi dṛśyante dhātavaḥ pāñcabhautikāḥ /
yairāvṛtamidaṃ sarvaṃ jagatsthāvarajaṅgamam //

indriyairgṛhyate yadyattattadvyaktamiti smṛtam /
tadavyaktamiti jñeyaṃ liṅgagrāhyamatīndriyam //

yathāsvaṃ grāhakānyeṣāṃ śabdādīnāmimāni tu /
indriyāṇi tathā dehī dhārayanniha tapyate //

loke vitatamātmānaṃ lokaṃ cātmani paśyati /
parāparajñaḥ saktaḥ sansa tu bhūtāni paśyati //

paśyataḥ sarvabhūtāni sarvāvasthāsu sarvadā /
brahmabhūtas saṃyogo nāśubhenopapadyate //

jñānamūlātmakaṃ kleśamativṛttasya mohajam /
lokabuddhiprakāśena jñeyamārgeṇa gamyate //

anādinidhanaṃ jantumātmayoniṃ sadāvyayam /
anaupamyamamūrtaṃ ca bhagavānāha buddhimān //

tapomūlamidaṃ sarvaṃ yanmāṃ viprānupṛcchasi / tapasā hi samāpnoti yadyadevābhivāñchati /
indriyāṇyeva saṃyamya tapo bhavati nānyathā //

indriyāṇyeva tatsarvaṃyatsvarganarakāvubhau /
nigṛhītavisṛṣṭāni svargāya narakāya ca //

eṣa yogavidhiḥ kṛtsno yāvadindriyadhāraṇam /
etanmūlaṃ hi tapasaḥ svargasya narakasya ca //

indriyāṇāṃ prasaṅgena domārcchatyasaṃśayam /
sanniyamya tu tānyeva tataḥ siddhiṃ samāpnuyāt //

ṣaṇṇāmātprani yojyānāmaiśvaryaṃ yo'dhitiṣṭhati /
na sa pāpaiḥ kuto'narthairyujyate vijitendriyaḥ //

rathaḥ śarīraṃ puruṣasya dṛṣṭa- mātmā niyantendriyāṇyāhuraśvān /
tairapramattaḥ kuśalī sadaśvai- rdānta sukhaṃ yāti rathīva dhīraḥ //

ṣaṇṇāmātmaniyuktānāmindriyāṇāṃ pramāthinām /
yo dhīro dhārayedraśmīnsa syātparamasārathiḥ //

indriyāṇāṃ prasṛṣṭānāṃ hayānāmiva vartmasu /
dhṛtiṃ kurvīta sārathye dhṛtyā tāni jayeddhruvam //

indriyāṇāṃ vicaratāṃ yanmano'nuvidhīyate /
tadas harate buddhiṃ nāvaṃ vāyurivāmbhasi //

yeṣu vipratipadyante ṣaṭsvamohātphalāgamam / teṣvadhyavasitādhyāyī vindate dhyānajaṃ phalam //