Mahabharata · Chapter 3.214

evamuktastu vipreṇa dharmavyādho yudhiṣṭhira /
pratyuvāca yathā vipraṃ tacchṛṇuṣva narādhipa //
vyādha uvāca /

vijñānārthaṃ manuṣyāṇāṃ manaḥ pūrvaṃ pravartate /
tatprāpya kāmaṃ bhajatekrodhaṃ ca dvijasattama //

tatastadarthaṃ yatate karma cārabhate mahat /
iṣṭānāṃ rūpagandhānāmabhyāsaṃ ca niṣevate //

tato rāgaḥ prabhavati dveṣaśca tadanantaram /
tato lobhaḥ prabhavati mohaśca tadanantaram //

tas lobhābhibhūtasya rāgadveṣahatasya ca /
na dharme jāyate buddhirvyājāddharmaṃ karoti ca //

vyājena carate dharmamarthaṃ vyājena rocate /
vyājena sidhyamāneṣu dhaneṣu dvijasattama //

tatraiva ramate buddhistataḥ pāpaṃ cikīrṣati /
suhṛdbhirvāryamāṇaśca paṇḍitaiśca dvijottama //

uttaraṃ śrutisambaddhaṃ bravītyaśrutiyojitam /
adharmastrividhastasya vartate rāgadoṣajaḥ //

pāpaṃ cintayate caiva bravīti ca karoti ca /
tasyādharmapravṛttasya guṇā naśyanti sādhavaḥ //

ekaśīlāśca mitratvaṃ bhajante pāpakarmiṇaḥ /
sa tena duḥkhamāpnoti paratra ca vipadyate //

pāpātmā bhavati hyevaṃ dharmalābhaṃ tu me śṛṇu /
yastvetānprajñāyā doṣānpūrvamevānupaśyati //

kuśalaḥ sukhaduḥkheṣu sāndhūṃścāpyupasevate /
tasya sādhusamārambhādbuddhridharmeṣu rājate //
brāhmaṇa uvāca /

bravīṣi sūnṛtandharmaṃ yasya vaktā na vidyate /
divyaprabhāvaḥ sumahānṛṣireva matosi me //
vyādha uvāca /

brāhmaṇā vai mahābhāgāḥ pitaro'grabhujaḥ sadā /
teṣāṃ sarvātmanā kāryaṃ priyaṃ loke manīṣiṇā //

yatteṣāṃ ca priyaṃ tatte vakṣyāmi dvijasattama /
namaskṛtvā brāhmaṇebhyo brāhmīṃ vidyāṃ nibodha me //

idaṃ viśvaṃ jagatsarvamajagaccāpi sarvaśaḥ /
mahābhūtātmakaṃ brahmannātaḥ parataraṃ bhavet //

mahābhūtāni khaṃ vāyuragnirāpastathā ca bhūḥ /
śabdaḥ sparśaśca rūpaṃ ca raso gandhaś tadguṇāḥ //

teṣāmapi guṇāḥ sarve guṇavṛttiḥ parasparam /
pūrvapūrvaguṇāḥ sarve kramaśo guṇiṣu triṣu //

ṣaṣṭhī tu cetanā nāma mana ityabhidhīyate /
saptamī tu bhavedbuddhirahankārastataḥ param //

indriyāṇi ca pañcātmā rajaḥ satvaṃ tamastathā /
ityeṣa saptadaśako rāśiravyaktasañjñakaḥ //

sarvairihendriyārthaistu vyaktāvyaktaiḥ susaṃvṛtaiḥ / caturviṃsaka ityeṣa vyakatvāvyaktamayo guṇaḥ /
etatte sarvamākhyātaṃ kiṃ bhūyaḥ śrotumicchasi //