Mahabharata · Chapter 3.212

sa tu vipramathovāca dharmavyādho yudhiṣṭhira /
yadahaṃ hyācare karma ghorametadasaṃśayam //

vidhistu balavānbrahmandustaraṃ hi purā kṛtam /
purā kṛtas pāpasya karmadoṣo bhavatyayam //

dopasyaitasya vai brahmanvighāte yatnavānaham /
vidhinā hi hate pūrvaṃ nimittaṃ ghātako bhavet //

nimittabhūtā hi vayaṃ karmaṇo'sya dvijottama //

yeṣāṃ hatānāṃ māṃsāni vikrīṇīmo vayaṃ dvija / teṣāmapi bhaveddharma upayogena bhakṣaṇāt /
devatātithibhṛtyānāṃ pitṛṇāṃ cāpi pūjanāt //

oṣadhyo vīrudhaścaiva paśavo mṛgapakṣiṇaḥ /
annādyabhūtā lokasya ityapi śrūyate śrutiḥ //

ātmamāṃsaprasādena śibirauśīnaro nṛpaḥ /
svargaṃ sudurlabhaṃ prāptaḥ kṣamāvāndvijasattama //

rājño mahānase pūrvaṃ rantidevasya vai dvija / [dve sahasre tu pacchete paśūnāmanvahaṃ tadā.]
ahanyahani pacyete dve sahasre gavāṃ tathā //

sa māsaṃ dadato hyannaṃ rantidevasya nityaśaḥ /
atulā kīrtirabhavannṛpasya dvijasattama //

cāturmāsye ca paśavo vadhyanta iti nityaśaḥ /
agnayo māṃsakāmāścaityapi śrūyate śrutiḥ //

yajñeṣu paśavo brahmanvadhyante satataṃ dvijaiḥ /
saṃskṛtāḥ kila mantraiśca te'pi svargamavāpnuvan //

yadi naivāgnayo brahmanmāṃsakāmā'bhavanpurā /
bhakṣyaṃ naivābhavanmāṃsaṃ kasyaciddvijasattama //

atrāpi vidhiruktaś munibhirmāṃsabhakṣaṇe //

devatānāṃ pitṛṇāṃ ca śuṅkte dattvā'piyaḥ sadā /
yathāvidhi yathāśraddhaṃ na sa duṣyeta bhakṣaṇāt //

amāṃsāśī bhavatyevamityapi śrūyate śrutiḥ /
bhāryāṃ gacchanbrahmacārī ṛtau bhavati brāhmaṇaḥ //

satyānṛte viniścitya atrāpi vidhirucyate / saudāsena tadā rājñā mānuṣā bhakṣitā dvija /
śāpābhibhūtena bhṛśamatra kiṃ pratibhāti te //

svadharma itikṛtvā tu na tyajāmi dvijottama /
purā kṛtamiti jñātvā rajīvāmyetena karmaṇā //

svadharmaṃ tyajato brahmannadharma iha dṛśyate /
svakarmanirato yastu dharmaḥ sa iti niścayaḥ //

kule hi vihitaṃ karma dehī taṃ na vimuñcati /
dhātrā vidhirayaṃ dṛṣṭo bahudhā karmanirmaye //

draṣṭavyastu bhavedbrahmandharmo dharmaviniścaye /
kathaṃ karma śubhaṃ kuryāṃ kathaṃ mucye parābhavāt //

karmaṇastasya ghoras vasudhā nirṇayo bhavet / dāne ca satyavākye ca guruśuśrūṇe tathā /
dvijātipūjane cāhaṃ dharme ca nirataḥ sadā //

atimānātivādābhyāṃ nivṛttosmi dvijottama /
kṛṣiṃ sādhvīti manyante tatra hiṃsā parā smṛtā //

karṣanto lāṅgalairurvīṃ ghnanti bhūmiśayānbahūn /
jīvānanyāṃśca bahuśastatrakiṃ pratibhāti te //

dhānyabījāni yānyāhurvrīhyādīni dvijottama /
sarvāṇyetāni jīvā hi tatra kiṃ pratibhāti te //

adhyākram paśūṃścāpi ghnanti vai bhakṣayanti ca /
vṛkṣāṃstathauṣadhīścāpi chindanti puruṣā dvija //

jīvā hi bahavo brahmanvṛkṣeṣu ca phaleṣu ca /
udake bahavaścāpi tatrakiṃ pratibhāti te //

sarvaṃ vyāptamidaṃ brahmanprāṇibhiḥ prāṇijīvanaiḥ /
matsyāngrasante matsyāśca tatrakiṃ pratibhāti te //

satvaiḥ satvāni jīvanti bahudhā dvijasattama /
prāṇino'nyonyabhakṣāśca tatrakiṃ pratibhāti te //

caṅkramyamāṇā jīvāṃśca dharaṇīsaṃśritānbahūn /
padbhyāṃ ghnanti narā vipra tatra kiṃ pratibhāti te //

upaviṣṭāḥ śayānāśca ghnanti jīvānanekaśaḥ /
ajñānādathavā jñānāttatrakiṃ pratibhāti te //

jīvairgrastamidaṃ sarvamākāśaṃ pṛthivī tathā /
avijñānācca hiṃsanti tatra kiṃ pratibhāti te //

ahiṃseti yaduktaṃ hi puruṣairvismitaiḥ purā /
ke na hiṃsanti jīvānvai loke'smindvijasattam //

bahu sañcintya iha vai nāsti kaścidahiṃsakaḥ //

ahiṃyāsāṃ tu niratā yatayo dvijasattama /
kurvantyeva hi hiṃsāṃ te yatnādalpatarā bhavet //

ālakṣyāścaiva puruṣāḥ kule jātā mahāguṇāḥ /
mahāghorāṇi karmāṇi kṛtvā lajjanti vai na ca //

suhṛdaḥ suhṛdo'nyāṃsca durhṛdaścāpi durhṛdaḥ /
samyakpravṛttānpuruṣānana samyaganupaśyati //

samṛddhaiścana nandanti bāndhavā bāndhavairapi /
gurūṃścaiva vinidanti mūḍhā niścitamāninaḥ //

bahu loke viparyastaṃ dṛśyate dvijasattama /
dharmayuktamadharmaṃ ca tatra kiṃ pratibhāti te //

vaktuṃ bahuvidhaṃ śakyaṃ dharmādharmeṣu karmasu / svakarmanirato yo hi sa yaśaḥ prāpnuyānmahat //