Mahabharata · Chapter 3.213

dharmavyādhastu nipuṇaṃ punareva yudhiṣṭhira /
viprarṣabhamuvācedaṃ sarvadharmabhṛtāṃvara //

śrutipramāṇo dharmo'yamiti vṛddhānuśāsanam /
sūkṣmā gatirhi dharmas bahuśākhā hyanantikā //

prāṇāntike vivāhe ca vaktavyamanṛtaṃ bhavet /
anṛtena bhavetsatyaṃ satyenaivānṛtaṃ bhavet //

yadbhūtahitamatyantaṃ tatsatyamiti dhāraṇā /
viparyayakṛto'dharmaḥ paśya dharmasya sūkṣmatām //

yatkarotyaśubhaṃ karma śubhaṃ vā yadi sattama /
avaśyaṃ tatsamāpnoti puruṣo nātra saṃśayaḥ //

viṣamāṃ ca daśāṃ prāpto devāngarhati vai bhṛśam /
ātmṛnaḥ karmadoṣeṇa na vijānātyapaṇḍitaḥ //

mūḍho naikṛtikaścāpi capalaśca dvijottama /
na śubhaṃ karma badhnāti puruṣaṃ pāṣaniścayam //

sukhaduḥkhaviparyāso yadā samupapadyate /
nainaṃ prajñā sunītaṃ vā trāyate naiva pauruṣam //

yo yamicchedyathā kāmaṃ taṃ taṃ kāmaṃ sa āpnuyāt /
yadi syādaparādhīnaṃ pauruṣas kriyāphalam //

saṃyatāścāpi dakṣāśca matimantaśca mānavāḥ /
dṛśyante niṣphalāḥ santaḥ prahīṇāḥ sarvakarmabhiḥ //

bhūtānāmaparaḥ kaściddhiṃsāyāṃ satatotthitaḥ /
vañcanāyāṃ ca lokasya sa sukhenaiva yujyate //

aceṣṭamapi cāsīnaṃ śrīḥ kañcidupatiṣṭhati /
kaścitkarmāṇi kurvanhi na prāpyamadhigacchati //

devāniṣṭvā tapastaptvā kṛpaṇaiḥ putragṛdhnubhiḥ /
daśamāsadhṛtā garbhā jāyante kulapāṃsanāḥ //

apare dhanadhānyaiśca bhogaiśca pitṛsañcitaiḥ /
vipulairabhijāyante labdhāstaireva maṅgalaiḥ //

na dehajā manuṣyāṇāṃ vyādhayo dvijasattama /
karmajā hi manuṣyāṇāṃ rogā nāstyatra saṃśayaḥ //

ādhibhiścaiva bādhyante vyālaiḥ kṣudramṛgā iva /
vyādhayo vinivāryante mṛgā vyādhairiva dvija //

yeṣāmasti ca bhoktavyaṃ grahaṇīrogapīḍitāḥ /
na śaknuvanti te bhoktuṃ ceṣṭitaṃ pūrvakarmayā //

apare bāhubalinaḥ kliśyanti bahavo janāḥ /
duḥkhena cādhigacchanati bhojanaṃ dvijasattama //

iti lokamanākrandaṃ dehaśaṅkāpariplutam /
srotasā'sakṛdākṣiptaṃ hriyamāṇaṃ balīyasā //

na mriyeyurna jīryaiyuḥ sarve syuḥ sarvakāmikāḥ /
nāpriyaṃ pratipaśyeyurvidhiśca yadi no bhavet //

uparyupari lokasya sarvo gantuṃ samīhate /
yatate ca yathāthakti na ca tadvartate tathā //

bahavaḥ sampradṛśyante tulyanakṣatramaṅgalāḥ /
mahattu phalavaiṣamyaṃ dṛśyate karmasiddhiṣu //

na kecidīśate brahmansvayangrāhyasya sattama /
karmaṇāṃ prākṛtānāṃ vai iha siddhiḥ pradṛśyate //

tathā śrutiriyambrahmañjīvaḥ kila sanātanaḥ /
śarīramadhruvaṃ loke sarveṣāṃ prāṇināmiha //

vadhyamāne śarīre tu dehanāśo bhavatyuta /
jīvaḥ sankramate'nyatrakarmabanadhanibandhanaḥ //
brāhmaṇa uvāca /

kathaṃ dharmavidāṃśreṣṭha jīvo bhavati śāśvataḥ /
etadicchāmyahaṃ jñātuṃ tattvena vadatāṃvara //
vyādha uvāca /

na jīvanāśosti hi dehabhede mithyaitadāhurmriyatīti mūḍhāḥ /
jīvastu dehāntaritaḥ prayāti daśārdhataivās śarīrabhedaḥ //

anyo hi nāśnāti kṛtaṃ hi karma manuṣyaloke manujas kaścit /
yattena kiñciddhi kṛtaṃhi karma tadaśnute nāsti kṛtasya nāśaḥ //

supuṇyaśīlā hi bhavanti puṇyā narādhamāḥ pāpakṛto bhavanti /
naro'nuyātastviha karmabhiḥ svai- stataḥ samutpadyati bhāvitastaiḥ //
brāhmaṇa uvāca /

kathaṃ sambhavate yonau kathaṃ vā puṇyapāpayoḥ /
jātīḥ puṇyā hyapuṇyāś kathaṃ gacchati sattama //
vyādha uvāca /

garbhādhānasamāyuktaṃ karmedaṃ sampradṛśyate /
samāsena tu te kṣipraṃ pravakṣyāmi dvijottama //

yathā sambhṛtasambhāraḥ punareva prajāyate /
śubhakṛcchubhayonīṣu pāpakṛtpāpayoniṣu //

śubhaiḥ prayogairdevatvaṃvyāmiśrairmānuṣo bhavet /
mohanīyairviyonīṣu tvadhogāmī ca kilbiṣaiḥ //

jātimṛtyujarāduḥkhaiḥ satataṃ samabhidrutaḥ /
saṃsāre pacyamānaśca doṣairātmakṛtairnaraḥ //

tiryagyonisahasrāṇi gatvā narakameva ca /
jīvāḥ samparivartante karmabandhanibandhanāḥ //

jantustu karmabhistaistaiḥ svakṛtaiḥ pretya duḥkhitaḥ /
tadduḥkhapratighātārthamapuṇyāṃ yonimāpnute //

tataḥ karma samādatte punaranyannavaṃ bahu /
pacyate tu punastena bhuktvā'pathyamivāturaḥ //

ajasrameva duḥkhārto'duḥkhitaḥ sukhisañjñitaḥ /
tato nivṛttabandhatvātkarmaṇāmudayādapi //

parikrāmati saṃsāre cakravadbahuvedanaḥ /
sa cennivṛttabandhastu viśuddhaścāpi karmabhiḥ //

tapoyogasamārambhaṃ kurute dvijasattama /
karmabhirbahubhiścāpi lokānaśnāti karmabhiḥ //

[sa cennivṛttabandhastu viśuddhaścāpi karmabhiḥ.] prāpnoti sukṛtām̐llokānyatragatvā na śocati //

pāpaṃ kurvanapuṇyavṛttaḥ puṇyasyāntaṃ na gacchati / puṇyaṃ kurvanpuṇyavṛttaḥ puṇyasyāntaṃ na gacchati /
tasmātpuṇyaṃ yatetkartuṃ varjayīta ca pāpakam //

anasūyuḥ kṛtajñaśca kalyāṇānyeva sevate /
sukhāni dharmamarthaṃ ca svargaṃ ca labhate naraḥ //

saṃskṛtasya ca dāntas niyatasya yatātmanaḥ /
prājñāsyānantarā vṛttirihi loke paratra ca //

satāṃ dhaṟmeṇa varteta kriyāṃ śiṣṭavadācaret /
asankleśena lokasya vṛttiṃ lipseta vai dvijaḥ //

santi hyāgamavijñānāḥ śiṣṭāḥ śāstre vicakṣaṇāḥ /
svadharmeṇa kriyā loke kurvāṇāste hyasankarāḥ //

prājño dharmeṇa ramate dharmaṃ caivopajīvati /
tasmāddharmādavāptena dhanana dvijasattama //

tasyaiva siñcate mūlaṃ guṇānpaśyati yatra vai / dharmātmā bhavati hyevaṃ cittaṃ cāsya prasīdati /
sa mitrajanasantuṣṭa iha pretya ca nandati //

śabdaṃ sparśaṃ tathā rūpaṃ gandhāniṣṭāṃsca sattama /
prabhutvaṃ labhate cāpi dharmasyaitatphalaṃ viduḥ //

dharamasya ca palaṃ labdhvā na tuṣyati mahādvija /
atuṣyamāṇo nirvedamādatte jñānacakṣuṣā //

prajñācakṣurnara iha doṣaṃ naivānurudhyate /
virajye yathākāmaṃ na ca dharmaṃ vimuñcati //

phalatyāge ca yatate dṛṣṭvā lokaṃ kriyātmakam /
tato mokṣe prayatate nānupāyādupāyataḥ //

evaṃ nirvedamādatte pāpaṃ karma jahāti ca /
dhārmikaścāpi bhavati mokṣaṃ ca labhate param //

tapo niḥśreyasaṃ jantostasya mūlaṃ śamo damaḥ /
tena sarvānavāpnoti kāmānyānmanasecchati //

indriyāṇāṃ nirodhena satyena ca damena ca /
brahmaṇaḥ padamāpnoti yatparaṃ dvijasattama //
brāhmaṇa uvāca /

indriyāṇīti yānyāhuḥ kāni tāni yatavrata /
nigrahaśca kathaṃ kāryo nigrahasya ca kiṃ phalam //

kathaṃ ca phalamāpnoti teṣāṃ dharmabhṛtāṃvara / etadicchāmi tattvena dharmaṃ jñātuṃ sudhārmika //