Mahabharata · Chapter 3.208

tato yudhiṣṭhiro rājā mārkaṇḍeyaṃ mahādyutim /
prapaccha bharataśreṣṭha dharmapraśnaṃ sa durvacam //

śrotumicchāmi bhagavanstrīṇāṃ māhātamyamuttamam /
kathyamānaṃ tvayā vipra sūkṣmaṃ dharmyaṃ ca tattvataḥ //

pratyakṣamiha viprarṣe devā dṛśyanti sattama /
sūryācandramasau vāyuḥ pṛthivī vahnireva ca //

pitā mātā ca bhagavāngāva eva ca sattama /
yaccānyadeva vihitaṃ taccāpi bhṛgunandana //

manye'haṃ guruvatsarvamekapatnyastathā striyaḥ / pativratānāṃ śuśrūṣā duṣkarā pratibhāti me /
pativratānāṃ mahātmyaṃ vaktumarhasi naḥ prabho //

nirudhya cendriyagrāmaṃ manaḥ saṃrudhya cānagha /
patiṃ daivatavaccāpi cintayantya sthitā hi yā //

bhagavanduṣkaraṃ tvetatpratibhāti mama prabho /
mātāpitrośca śuśrūṣā strīṇāṃ bhartari ca dvija //

strīṇāṃ dharmātsughorāddhi nānyaṃ paśyāmi duṣkaram /
sādhvācārāḥ striyo brhamankurvantīha sadādṛtāḥ //

duṣkaraṃ khalu kurvanti pitaro mātaraśca vai /
ekapatnyaśca yā nāryo yāś satyaṃ vadantyuta //

kukṣiṇā daśamāsāṃśca garbhaṃ sandhārayanti yāḥ /
nāryaḥ kālena sambūya kimadbhutataraṃ tataḥ //

saṃśayaṃ paramaṃ prāpya vedanāmatulāmapi /
prajāyante sutānnāryo duḥkhena mahatā vibho //

puṣṇanti cāpi mahatā snehena dvijapuṅgava /
cintayanti tataścāpi kiṃśīlo'yambhaviṣyati //

yāśca krūreṣu sarveṣu vartamānā jugupsitāḥ /
svakarma kurvanti sadā duṣkaraṃ tacca me matam //

kṣatradharmasamācāratattvaṃ vyākhyāhi me dvija /
dharmaḥ sudurlabho vipra nṛśaṃsena mahātmanā //

etadicchāmi bhagavanpraśnaṃ praśnavidāṃvara /
śrotuṃ bhṛgukulaśreṣṭha śuśrūṣe tava suvrata //
mārkaṇḍeya uvāca /

hanta te'haṃ samākhyāsye praśnametaṃ sudurvacam /
tattvena bharataśreṣṭha gadatastannibodha me //

mātaraṃśreyasīṃ tāta pitṛnanye tu menire /
duṣkaraṃ kurute mātā vivardhayati yā prajāḥ //

tapasā devatejyābhirvandanena titikṣayā /
supraśastairupāyaiścāpīhante pitaraḥ sutān //

evaṃ kṛcchreṇa mahatā putraṃ prāpya sudurlabham /
cintayanti sadā vīra kīdṛśo'yaṃ bhaviṣyati //

āśaṃsate hi putreṣu pitā mātā ca bhārata /
yaśaḥ kīrtimathaiśvaryaṃ tejo dharmaṃ tathaiva ca //

mātuḥ pituśca rājendra satataṃ hitakāriṇṇoḥ /
tayorāśāṃ tu saphalāṃ yaḥ karoti sa dharmavit //

pitā mātā ca rājendra tuṣyato yas nityaśaḥ /
iha pretya ca tasyātha kīrtirdharmaśra śāśvataḥ //

naiva yajñakriyāḥ kāścinna śrāddhaṃ nopavāsakam /
yā tu bhartari śuśrūṣā tayā svargaṃ jayatyuta //

etatprakaraṇaṃ rājannadhikṛtya yudhiṣṭhira / pativratānāṃ niyataṃ dharmaṃ cāvāhitaḥ śṛṇu //