Mahabharata · Chapter 3.205

ikṣvākau saṃstite rājañśaśādaḥ pṛthivīmimām /
prāptaḥ paramadharmātmā so'yodhyāyāṃ nṛpo'bhavat //

śaśādasya tu dāyāda kakutstho nāma vīryavān /
anenāścāpi kākutsthaḥ pṛthuścānenasaḥ sutaḥ //

viṣvagaśvaḥ pṛthoḥ putrastasmādārdraśca jajñivān /
ārdrasya yuvanāśvastu śrāvastastasya cātmajaḥ //

jajñe śrāvastako rājā śrāvastī yena nirmitā /
śrāvastasya tu dāyādo bṛhadaśvo mahābalaḥ //

bṛhadaśvas dāyādaḥ kuvalāśva iti smṛtaḥ /
kuvalāśvasya putrāṇāṃ sahasrāṇyekaviṃsatiḥ //

sarve vidyāsu niṣṇātā balavanto durāsadāḥ /
kuvalāśvaśca pitṛtoguṇairabhyadhiko'bhavat //

samaye taṃ tadā rājye bṛhadaśvo'bhyaṣecayat /
kuvalāśvaṃ mahārāja śūramuttamadhārmikam //

putrasankrāmitaśrīstu bṛhadaśvo mahīpatiḥ /
jagāma tapase dhīmāṃstapovanamamitrahā //

atha śaśvāva rājarṣiṃ tamudaṅko narādhipa /
vanaṃ samprasthitaṃ rājanbṛhadaśvaṃ dvijottamaḥ //

tamudaṅko mahātejāḥ sarvāstraviduṣāṃvaram /
nyavārayadameyātmā samāsādya purottame //
udaṅka uvāca /

bhavatā rakṣaṇaṃ kāryaṃ tattāvatkartumarhasi /
nirudvigrā vayaṃ rājaṃstvatpradādvasemahi //

tvayā hi pṛthivī rājanrakṣyamāṇā mahātmanā /
bhaviṣyati nirudvignā nāraṇyaṃ gantumarhasi //

pālana hi mahāndharmaḥ prajānāmiha dṛśyate /
na tathā dṛśyate'raṇye mābhūtte buddhirīdṛśī //

īdṛśo na hi rājendra dharmaḥ kvacana dṛśyate /
prajānāṃ pālane yatnaḥ purā rājarṣibhiḥ kṛtaḥ //

rakṣitavyāḥ prajā rājñā tāstvaṃ rakṣitumarhasi /
nirudvignastapastaptuṃ na hi śaknomi pārthiva //

mamāśramasamīpe vai sameṣu marudhanvasu / samudravālukāpūrṇa ujjālaka iti smṛtaḥ /
bahuyojanavistīrṇo bahuyojanamāyataḥ //

tatra raudro dānavendro mahāvīryaparākramaḥ / madhukaiṭabhayoḥ putro dhundhurnāma sudāruṇaḥ /
antarbhūmigato rājanvasatyamitavikramaḥ //

taṃ nihatya mahārāja vanaṃ tvaṃ gantumarhasi //

śete lokavināśāya tapa āsthāya dāruṇam /
tridaśānāṃ vināśāya lokānāṃ cāpi pārthiva //

avadhyo daivatānāṃ hi daityānāmatha rakṣasām / nāgānāmatha yakṣāṇāṃ gandharvāṇāṃ ca sarvaśaḥ /
avāpyasa varaṃ rājansarvalokapitāmahāt //

taṃ vināśaya bhadraṃ te mā te buddhirato'nyathā /
prāpsyase mahatīṃ kīrtiṃ śāśvatīmavyayāṃ dhruvām //

krūrasya tasya svapato vālukāntarhitasya ca /
saṃvatsarasya paryante niḥśvāsaḥ sampravartate //

yadā tadā bhūścalati saśailavanakānanā /
tasya niḥśvāsavātena raja uddhūyate mahat //

ādityarathamāśritya saptāhaṃ bhūmikampanam /
savisphuliṅgaṃ sajvālaṃ dhūmamiśraṃ sudāruṇam //

tena rājanna śaknomi tasminstātuṃ svaāṃśrame //

taṃ vināśaya rājendra lokānāṃ hitakāmyayā /
lakāḥ svasthā bhaviṣyanti tasminvinihate'sure //

dhundhunāmānamatyugraṃ dānavaṃ dhoravigraham /
samare dhoratumule vināśaya maheṣuṇā //

tvaṃ hi tasya vināśāya paryāpta iti me matiḥ /
tejasā tava tejaśca viṣṇurāpyāyaviṣyati //

viṣṇunā ca varo dattaḥ pūrvaṃ mama mahīpate //

yastaṃ mahāsuraṃ raudraṃ vadhiṣyati mahīpatiḥ /
tejastadvaiṣṇavamiti pravekṣyati durāsadam //

tattejastvaṃsamādhāya rājendra bhuvi duḥsaham /
taṃ niṣūdaya sandiṣṭo daityaṃ raudraparākramam //

na hi dhundhurmahātejāstejasā'lpena śakyate / nirdagdhuṃ pṛthivīpāla sa hi varṣaśatairapi //