Mahabharata · Chapter 3.206

sa evamukto rājarṣirudaṅkenāparājitaḥ /
udaṅkaṃ kauravaśreṣṭha kṛtāñjalithābravīt //

na hi me gamanaṃ brahmanmoghametadbhaviṣyati /
putro mamāyaṃ bhagavankuvalāśva iti smṛtaḥ //

dhṛtimānkṣiprakārī ca vīryeṇāpratimo bhuvi /
priyaṃ ca te sarvametatkariṣyati na saṃśayaḥ //

putraiḥ parivṛtaḥ sarvaiḥ śūraiḥ parighabāhubhiḥ / haniṣyati mahābāhustaṃ vai dhundhuṃ mahā'suram /
visarjayasva māṃ brahmannyastaśastrosmi sāmpratam //

tathā'stviti ca tenokto muninā'mitatejasā / sa tamādiśya tanayamudaṅkāya mahātmane /
kriyatāmiti rājarṣirjagāma vanamuttamam //
yudhiṣṭhira uvāca /

ka eṣa bhagavandaityo mahāvīryastapodhana /
kasya putro'tha naptā vā etadicchāmi veditum //

evaṃ mahābalo daityo na śruto me tapodhana /
yasya niśvāsavātena kampate bhūḥ saparvatā //

etadicchāmi bhagavanyāthātathyena veditum /
sarvameva mahāprājña vistareṇa tapodhana //
mārkaṇḍeya uvāca /

śṛṇu rājananidaṃ sarvaṃ yathāvṛttaṃ narādhipa /
kathyamānaṃ mahāprājña vistareṇa yathātatham //

ekārṇave nirāloke naṣṭe sthāvarajaṅgame /
pranaṣṭeṣu ca bhūteṣu sarveṣu bharatarṣabha //

prabhavaṃ lokakartāraṃ viṣṇuṃ śāśvatamavyayam / yamāhurmunayaḥ siddhāḥ sarvalokamaheśvaram /
caturbhujamudārāṅgaṃ dṛṣṭavānasmi bhārata //

suṣvāpa bhagavānviṣṇurapśayyāmeka eva hi /
nāgas bhoge mahati śepasyāmitatejasaḥ //

lokakartā mahābhāga bhagavānacyuto hariḥ /
nāgabhagena mahatā parirabhya mahīmimām //

svapatastasya devasya padmaṃ sūryasamaprabham /
nābhyā viniḥsṛtaṃ divyaṃ tatrotpannaḥ pitāmahaḥ //

sākṣāllokagururbrahmā padme sūryasamaprabhaḥ /
caturvedaścaturmūrtiścaturvargaścaturmukhaḥ //

svaprabhāvāddurādharṣo mahābalaparākramaḥ /
kasyacittvatha kālasya dānavau vīryavattamau //

madhuśca kaiṭabhaścaiva dṛṣṭavantau hariṃ prabhum /
śayānaṃ śayane divye nāgabhoge mahādyutim //

bahuyojanavistīrṇe bahuyojanamāyate /
kirīṭakaustubhadharaṃ pītakauśeyavāsasam //

dīpyamānaṃ śriyā rājaṃstejasā vapupā tathā /
sahasrasūryapratimamadbhutopamadarśanam //

vismaya sumahānāsīnmadhukaiṭabhayostadā //

dṛṣṭvā pitāmahaṃ cāpi padme padmanibhekṣaṇam /
vitrāsayetāmatha tau brahmāṇamamitaujasam //

vitrāsyamāno bahudhā brahmā tābhyāṃ mahāyaśāḥ /
akampayatpadmanālaṃ tato'budhyata keśavaḥ //

athāpaśta govindo dānavau vīryavattarau //

dṛṣṭvā tāvabravīddevaḥ svāgataṃ vāṃ mahābalau /
dadāmi vāṃ varaṃ śreṣṭhaṃ raprītirhi mama jāyate //

tau prahasya hṛṣīkeśaṃ mahādarpau mahābalau /
pratyabrūtāṃ mahārāja sahitau madhusūdanam //

āvāṃ varaya deva tvaṃ varadau svaḥ surottama /
dātārau svo varaṃ tubhyaṃ tadbravīhyavicārayan //
bhagavānuvāca /

pratigṛhṇe varaṃ vīrāvīpsitaśca varo mama /
yuvāṃ hi vīryasampannau na vāmasti samaḥ pumān //

vadhyatvamupagacchetāṃ mama satyaparākramau /
etadicchāmyahaṃ kāmaṃ prāptuṃ lokahitāya vai //
madhukaiṭabhāvūcatuḥ /

anṛtannoktapūrvaṃ nau svaireṣvapi kuto'nyathā /
satye dharme ca niratau viddhyāvāṃ puruṣottama //

bale rūpe ca śaurye ca śame na ca samosti nau /
dharme tapasi dāne ca śīlasatvadameṣu ca //

upaplavo mahānasmānupāvartata keśava /
uktaṃ pratikuruṣva tvaṃ kālo hi duratikramaḥ //

āvāmicchāvahe deva kṛtamekaṃ tvayā vibho /
ānāvṛte'vakāśe tvaṃ jahyāvāṃ surasattama //

putratvamadhigacchāva tava cāpi sulocana /
vara eṣa vṛtodeva tadviddhi surasattama //

anṛtaṃ mā bhaveddeva yaddhi nau saṃśrutaṃ tadā //
bhagavānuvāca /

bāḍhamevaṃ kariṣyāmi sarvametadbhaviṣyati //

savicintyātha govindo nāpaśyadyadanāvṛtam /
avakāśampṛthivyāṃ vā divi vā madhusūdanaḥ //

svakāvanāvṛtāvūrū dṛṣṭvā devavarastadā / madhukaiṭabhayo rājañśirasī madhusūdanaḥ /
cakreṇa śitadhāreṇa nyakṛntata mahāyaśāḥ //