Mahabharata · Chapter 3.197
tataḥ pāṇḍavāḥ punarmārkaṇḍeyamūcuḥ //
kathitaṃ brāhmaṇamāhātmyaṃ rājanyamāhātmyamidānīṃ śuśrūṣāmaha iti tānuvāca mārkaṇḍeyo maharṣiḥ śrūyatāmidānīṃ rājanyānāṃ māhātmyamiti // kurūṇāmanyatamaḥ suhotro nāma rājā maharṣīnabhigamya nivṛtyarathasthameva rājānamauśīnaraṃ śibiṃ dadarśābhimukhaṃ tau sametya paraspareṇa yathāvayaḥ pūjāṃ prayujya guṇasāmyena paraspareṇa tulyātmānau viditvā'nyonyasya panthānaṃ na dadatustatra nāradaḥ prādurāsītkimidaṃ bhavantau parasparasya panthānamāvṛtya tiṣṭhata iti //
tāvūcaturnāradaṃ naitadbhagavanpūrvakarmakartrādibhirviśiṣṭas panthā upadiśyate samarthāya vā āvāṃ ca sakhyaṃ paraspareṇopagatau taccāvadhānato'tyutkṛṣṭamadharottaraṃ paribhraṣṭam //
nāradastvevamuktaḥ ślokatrayamapaṭhat //
krūraḥ kauravya mṛdave mṛduḥ krūre ca kaurava /
sādhuścāsādhave sādhuḥ sādhave nāpnuyātkatham //
kṛtaṃ śataguṇaṃ kuryānnāsti deveṣu nirṇayaḥ /
auśīnaraḥ sādhuśīlo bhavato vai mahīpatiḥ //
jaletkadaryaṃ dānena satyenānṛtavādinam /
kṣamayā krūrakarmāṇamasādhuṃ sādhunā jayet //
tadubhāveva bhavantāvudārau ya idānīṃ bhavadbhyāmanyatamaḥ sopasarpatu etadvai nidarśanamityuktāva tūṣṇīṃ nārado babhūva // etacchrutvā tu kauravyaḥ śibiṃ pradakṣiṇaṃ kṛtvā panthānaṃ dattvā bahukarmabhiḥ praśasya prayayau //
tadetadrājño mahābhāgyamapyuktavānnāradaḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0