Mahabharata · Chapter 3.19

evamuktastu kaunteya sūtaputrastato mṛdhe /
pradyumnamabravīcchlakṣṇaṃ madhuraṃ vākyamañjasā //

na me bhayaṃ raukmiṇeya sangrāme yacchato hayān /
yuddhajñosmi ca vṛṣṇīnāṃ nātra kiñcidato'nyathā //

āyuṣmannupadeśastu sārathye vartatāṃ smṛtaḥ /
sarvārtheṣu rathī rakṣyastvaṃ cāpi bhṛśapīḍitaḥ //

tvaṃ hi sālvaprayuktena śareṇābhihato bhṛśam /
kaśmalābhihato vīra tato'hamapayātavān //

satvaṃ sātvatamukhyādya labdhasañjño yadṛcchayā /
paśya me hayasaṃyāne śikṣāṃ keśavanandana //

dārukeṇāhamutpanno yathāvaccaiva śikṣitaḥ /
vītabhīḥ praviśāmyetāṃ sālvasya mahatīṃ camūm //
vāsudeva uvāca /

evamuktvā tato vīro hayānsañcodya sangare /
raśmibhistu samudyamya javenābhyapatattadā //

maṇḍalāni vicitrāṇi yamakānītarāṇi ca /
savyāni ca vicitrāṇi dakṣiṇāni ca sarvaśaḥ //

pratodenāhatā rājanraśmibhiśca samudyatāḥ /
utpatanta ivākāśaṃ vibabhuste hayottamāḥ //

te hastalāghavopetaṃ vijñāya nṛpa dārukim /
uhyamānā iva tadā nāspṛśaṃścaraṇairmahīm //

sopasavyāṃ camūṃ tasya sālvasya bharatarṣabha /
cakāra nātiyatnena tadadbhutamivābhavat //

amṛṣyamāṇopasavyaṃ sālvaḥ samitidāruṇaḥ /
yantāramasya sahasā tribhirbāṇaiḥ samārdayat //

dārukasya sutastaṃ tu bāṇavegamacintayan /
bhūya eva mahābāho prayayāvapasavyataḥ //

tato bāṇānbahuvidhānpunareva sa saubharāṭ /
mumoca tanaye vīra mama rukmiṇinandane //

tānaprāptāñśitairbrāṇaiściccheda paravīrahā /
raukmiṇeyaḥ smitaṃ kṛtvā darśayanhastalāghavaṃ //

chinnāndṛṣṭvā tu tānbāṇānpradyumnena ca saubharāṭ /
āsurīṃ dāruṇīṃ māyāmāsthāya vyasṛjaccharān //

prayujyamānamājñāya daiteyāstraṃ mahābalam /
brahmāstreṇāntarā cchittvāmumocānyanpatastriṇaḥ //

te tadastraṃ vidhūyāśu vivyadhū rudhirāśanāḥ /
śirasyurasi vakre ca sa mumoha papāta ca //

tasminnipatite kṣudre sālve bāṇaprapīḍite /
raukmiṇeyo'paraṃ bāṇaṃ sandadhe śatratāpanaḥ //

tamarcitaṃ sarvadāśārhapūgai- rāśīrbhirarkajvalanaprakāśam /
dṛṣṭvā śaraṃ jyāmabhinīyamānaṃ babhūva hāhākṛtamantarikṣam //

tato devagaṇāḥ sarve sendrāḥ sahadhaneśvarāḥ /
nāradaṃ preṣayāmāsu- śvasanaṃ ca manojavam //

tau raukmiṇeyamāgamya vaco'brūtāṃ divaukasām /
naiva vadhyastvayā vīra sālvarājaḥ kathañcana //

saṃharasva punarbāṇamavadhyo'yaṃ tvayā raṇe /
etasya ca śarasyājau nāvadhyosti pumānkvacit //

mṛtyurasya mahābāho raṇe devakinandanaḥ /
kṛṣṇaḥ sankalpito dhātrā tanmithyā na bhavediti //

tataḥ paramasaṃhṛṣṭaḥ pradyumnaḥ śaramuttamam /
sañjahāra dhanuḥśreṣṭhāttūṇe caiva nyaveśayat //

tata utthāya rājendra sālvaḥ paramadurmanāḥ /
vyapāyātsabalastūrṇaṃ pradyumnaśarapīḍitaḥ //

sa dvārakāṃ parityajya sālvo vṛṣṇibhirārditaḥ / saubhamāsthāya rājendra divamācakrame tadā //