Mahabharata · Chapter 3.20

ānartanagaraṃ muktaṃ tato'hamagamaṃ tadā /
mahākratau rājasūye nivṛtte nṛpate tava //

apaśyaṃ dvārakāṃ cāhaṃ mahārāja hatatviṣam /
niḥsvādhyāyavaṣaṭkārāṃ nirbhūṣaṇavarastriyam //

anabhijñeyarūpāṇi dvārakopavanāni ca /
dṛṣṭvā śaṅkopapanno'hamapṛcchaṃ hṛdikātmajam //

asvasthanaranārīkamidaṃ vṛṣṇikulaṃ bhṛśam /
kimidaṃ naraśārdūla śrotumicchāmi tattvataḥ //

evamuktaḥ sa tu mayā vistareṇedamabravīt /
rodhaṃ mokṣaṃ ca sālvena hārdikyo rājasattama //

tato'haṃ bharataśreṣṭha śrutvā sarvamaśeṣataḥ /
vināśe sālvarājasya tadaivākaravaṃ matim //

tato'haṃ bharataśreṣṭha samāśvāsya pure janam //
rājānamāhukaṃ caiva tathaivākanadundubhim //

sarvānvṛṣṇipravīrāṃśca harṣayannabruvaṃ tadā /
apramādaḥ sadā kāryo nagare yādavarṣabhāḥ //

sālvarājavināśāya prayātaṃ māṃ nibodhata /
nāhatvā taṃ nivartiṣye purīṃ dvāravatīṃ prati //

sasālvaṃ saubhanagaraṃ hatvā draṣṭāsmi vaḥ punaḥ /
triḥsāmā hanyatāmeṣā dundubhiḥ śatrubhīṣaṇā //

te mayā'śvāsitā vīrā yathāvadbharatarṣabha /
sarve māmabruvanhṛṣṭāḥ prayāhi jahiśātravān //

taiḥ prahṛṣṭātmabhirvīrairāśīrbhirabhinanditaḥ /
vācayitvā dvijaśreṣṭhānpraṇamya śirasā bhavam //

śaibyasugrīvayuktena rathenānādayandiśaḥ /
pradhmāya śaṅkhapravaraṃ pāñcajanyamahaṃ nṛpa //

prayātosmi naravyāghra balena mahatā vṛtaḥ /
klṛptena caturaṅgeṇa yattena jitakāśinā //

samatītya bahūndeśāngirīṃśca bahupādapān /
sarāṃsi saritaścaiva mārtikāvatamāsadam //

tatrāśrauṣaṃ naravyāghra sālvaṃ sāgaramantikāt /
prayāntaṃ saubhamāsthāya tamahaṃ pṛṣṭhato'nvagām //

dṛṣṭavānasmi rājendra sālvarājamathāntike / tataḥ sāgaramāsādya kukṣau tasya mahormiṇaḥ /
samudranābhyāṃ sālvo'bhūtsaubhamāsthāya śatruhan //

sa māmālokya sahasā senāṃ svāṃ prāhiṇonmṛdhe / madbāhunā ca senāyāṃ śiṣṭāyāṃ kiñcideva ca

sa samālokya sahasā smayanniva yudhiṣṭhira /
āhvayāmāsa duṣṭātmā yuddhāyaiva muhurmuhuḥ //

tasya śārṅgavinirmuktairbahubhirmarmabhedibhiḥ /
puraṃ nāsādyata śaraistato māṃ roṣa āviśat //

sa cāpi pāpaprakṛtirdaiteyāpaśado nṛpa /
mayyavarṣata durdharṣaḥ śaradhārāḥ sahasraśaḥ //

sainikānmama sūtaṃ ca hayāṃśca sa samākirat /
acintayantastu śarānvayaṃ yudhyāma bhārata //

tataḥ śatasahasrāṇi śarāṇāṃ nataparvaṇām /
cikṣipuḥ samare vīrā mayi sālvapadānugāḥ //

te hayāṃśca rathaṃ caiva dhvajaṃ dārukameva ca /
chādayāmāsurasurāstairbāṇairmarmabhedibhiḥ //

na hayā na ratho vīra na dhvajo na ca dārukaḥ /
adṛśyanta śaraiśchannāstathā'haṃ sainikāśca me //

tato'hamapi kaunteya śarāṇāmayutānbahūn /
āmantritānāṃ dhanuṣā divyena vidhinā'kṣipam //

na tatraviṣayastvāsīnmama sainyasya bhārata /
khe viṣaktaṃ hi tatsaubhaṃ krośamātra ivābhavat //

tataste prekṣakāḥ sarve devā vai divamāsthitāḥ /
harṣayāmāsuruccairmāṃ siṃhanādatalasvanaiḥ //

matkārmukavinirmuktā dānavānāṃ mahāraṇe /
aṅgeṣu rudhirāktāste viviśuḥ śalabhā iva //

tato halahalāśabdaḥ saubhamadhye vyavardhata /
vadhyatāṃ viśikhaistīkṣṇaiḥ patatāṃ ca mahārṇave //

te nikṛttabhujaskandhāḥ kabandhākṛtidarśanāḥ / nadanto bhairavānnādānnipatanti sma dānavāḥ /
patitāste'pi bhakṣyante samudrāmbhonivāsibhiḥ //

tato gokṣīrakundendumṛṇālarajataprabham /
jalajaṃ pāñcajanyaṃ vai prāṇenāhamapūrayam //

tāndṛṣṭvā patitāṃstatra sālvaḥ saubhapatistataḥ /
māyāyuddhena mahatā yodhayāmāsa māṃ yudhi //

tato gadā halāḥ prāsāḥ śūlaśaktiparaścathāḥ / asayaḥ śaktikuliśapāśarṣṭikanapāḥ śarāḥ /
paṭṭasāśca bhuśuṇḍyaśca prapatantyaniśaṃ mayi //

tāmahaṃ māyayaivāśu pratigṛhya vyanāśayam /
tasyāṃ hatāyāṃ māyāyāṃ giriśṛṅgairayodhayat //

tato'bhavattama iva prakāśa iva cābhavat /
durdinaṃ sudinaṃ caiva śītamuṣṇaṃ ca bhārata //

aṅgārapāṃsuvarṣaṃ ca śastravarṣaṃ ca bhārata /
evaṃ māyāṃ prakurvāṇo yodhayāmāsa māṃ ripuḥ //

vijñāya tadahaṃ sarvaṃ māyayaiva vyanāśayam /
yathākālaṃ tu yuddhena vyadhamaṃ sarvataḥ śaraiḥ //

tato hatāyāṃ ca mayā māyāyāṃ yudhi dānavaḥ / māyāmanyāṃ mahārāja cakāra matimohinīm //

tato vyoma mahārāja śatasūryamivābhavat /
śatacandraṃ ca kaunteya sahasrāyutatārakam //

tato nājñāyata tadā divārātraṃ tathā diśaḥ /
tato'haṃ mohamāpannaḥ prajñāstraṃ samayojayam //

tadastramastamastreṇa vidhūtaṃ śaratūlavat / tathā tadabhavadyuddhaṃ tumulaṃ romaharṣaṇam /
labdhālokastu rājendra punaḥ śatrumayodhayam //