Mahabharata · Chapter 3.18

sālvabāṇārdite tasminpradyumne balināṃvare /
vṛṣṇayo bhagnasankalpā vivyathuḥ pṛtanāmukhe //

hāhākṛtamabhūtsarvaṃ vṛṣṇyandhakabalaṃ tataḥ /
pradyumne mohite rājansālvaḥ pramudito'bhavat //

taṃ tathā mohitaṃ dṛṣṭvā sārathirjavanairhayaiḥ /
raṇādapāharattūrṇaṃ śikṣito dārukistadā //

nātidūrāpayāte tu rathe rathavarapraṇut /
dhanurgṛhītvā yantāraṃ labdhasajño'bravīdidam //

saute kiṃ te vyavasitaṃ kasmādyāsi parāṅmukhaḥ /
naiṣa vṛṣṇipravīrāṇāmāhave dharma ucyate //

kaccitsaute na te mohaḥ sālvaṃ dṛṣṭvā mahāhave /
viṣādo vā raṇam̐ dṛṣṭvā brūhi me tvaṃ yathātatham //
sautiruvāca /

jānārdane na me moho nāpi māṃ bhayamāviśat /
atibhāraṃ tu te manye sālvaṃ keśavanandana //

sobhiyāti śanairvīra balavāneṣa pāpakṛt /
mohitaśca raṇe śūro rakṣyaḥ sārathinā rathī //

āyuṣmaṃstvaṃ mayā nityaṃ rakṣitavyastvayā'pyaham /
rakṣitavyo raṇe nityamiti kṛtvā'payāmyaham //

ekaścāsi mahābāho bahavaścāpi dānavāḥ /
na samaṃ raukmiṇeyāhaṃ raṇae matvā'payāmi vā //
vāsudeva uvāca /

evaṃ bruvati sūte tu tadā makaraketumān /
uvāca sūtaṃ kauravya sannivartya rathaṃ punaḥ //

dārukātmaja maivaṃ tvaṃ punaḥ kārṣīḥ kathañcana /
nyapayānaṃ raṇātsaute jīvato mama karhicit //

na sa vṛṣṇikule jāto yo vai tyajati sangaram /
yo vā nipatitaṃ hanti tavāsmīti ca vādinam //

tathā striyaṃ ca yo hanti bālaṃ vṛddhaṃ tathaiva ca /
virathaṃ muktakeśaṃ ca bhagnaśastrāyudhaṃ tathā //

tvaṃ ca sūtakule jāto viditaḥ sūtakarmaṇi /
dharmajñaścāsi vṛṣṇīnāmāhaveṣvapi dāruke //

sa jānaṃścaritaṃ kṛtsnaṃ vṛṣṇīnāṃ pṛtanāmukhe /
apayānaṃ puna saute maivaṃ kārṣīḥ kathañcana //

apayātaṃ hataṃ pṛṣṭhe bhrāntaṃ raṇapalāyitam /
gadāgrajo durādharṣaḥ kiṃ māṃ vakṣyati mādhavaḥ //

keśavasyāgrajo vā'pi nīlavāsā madotkaṭaḥ /
kiṃ vakṣyati mahābāhurbaladevaḥ samāgataḥ //

kiṃ vakṣyatiśinernaptā raṇasiṃho mahārathaḥ /
apayātaṃ raṇātsūta sāmbaśca samitiñjayaḥ //

cārudeṣṇaśca durdharṣastathaiva gadasāraṇau /
akrūraśca mahābāhuḥ kiṃ māṃ vakṣyati sārathe //

śūraṃ sambhāvitaṃ śāntaṃ nityaṃ puruṣamāninam /
striyaśca vṛṣṇivīrāṇāṃ kiṃ māṃvakṣyanti sangatāḥ //

pradyumno'yamupāyāti bhītastyaktvā mahāhavam /
dhigenamiti vakṣyanti na tu vakṣyanti sādhviti //

dhigvācā parihāsopi mama vā madvidhasya vā /
mṛtyunā'bhyadhikaḥ saute sa tvaṃ māvyapayāḥ punaḥ //

bhāraṃ hi mayi sannyasya yāto madhunihā hariḥ / yajñaṃ bāratasiṃhasya na hi śakyo'dyamarṣitum /

kṛtavarmā mayā vīro niryāsyanneva vāritaḥ /
sālvaṃ nivārayiṣye'haṃ tiṣṭha tvamiti sūtaja //

sa ca sambhāvayanmāṃ vai nivṛtto hṛdikātmajaḥ /
taṃ sametya raṇaṃ tyaktvā kiṃ vakṣyāmi mahārathaṃ //

upayāntaṃ durādharṣaṃ śaṅkhacakragadādharam /
puruṣaṃ puṇḍarīkākṣaṃ kiṃ vakṣyāmi mahābhujam //

sātyakiṃ baladevaṃ ca ye cānye'ndhakavṛṣṇayaḥ /
mayā spardhanti satataṃ kiṃ nu vakṣyāmi tānahaṃ //

tyaktvā raṇamimaṃ saute pṛṣṭhato'bhyāhataḥ śaraiḥ /
tvayā'panītī vivaśo na jīveyaṃ kathañcana //

sannivarta rathenāśu punardārukanandana /
na caitadevaṃ kartavyamathāpatsu kathañcana //

na jīvitamahaṃ saute bahu manye kathañcana /
apayāto raṇādbhītaḥ pṛṣṭhato'bhyāhataḥ śaraiḥ //

kadā'pi sūtaputra tvaṃ jānīṣe māṃ bhayārditam /
apayātaṃ raṇaṃ hitvā yathā kāpuruṣaṃ tathā //

ayuktaṃ tu mayā tyaktuṃ sangrāmaṃ dārukātmaja / mayi yuddhārthini bhṛśaṃ sa tvaṃ yāhi yato raṇam //