Mahabharata · Chapter 3.181

sa bhīmasenastejasvī tadā sarpavaśaṃ gataḥ /
cintayāmāsa sarpasya vīryamatyadbhutaṃ mahat //

uvāca ca mahāsarpaṃ kāmayābrūhi pannaga /
kastvaṃ bho bhujagaśreṣṭha kiṃ mayā ca kariṣyasi //

pāṇḍavo bhīmaseno'haṃ dharmarājādanantaraḥ /
nāgāyutasamaprāṇastvayā nītaḥ kathaṃ vaśam //

siṃhāḥ kesariṇo vyāghrā mahiṣā vāraṇāstathā /
samāgatāśca bahuśo nihatāśca mayā yudhi //

rākṣasāśca piśācāśca pannagāśca mahābalāḥ /
bhujavegamaśaktā me soḍhuṃ pannagasattama //

kinnu vidyābalaṃ kinnu varadānamatho tava /
udyogamapi kurvāṇo vaśagosmi kṛtastvayā //

anutyo vikramo nṝṇāmiti me dhīyate matiḥ /
yathedaṃ me tvayā nāga balaṃ pratihataṃ mahat //

ityevaṃvādinaṃ vīraṃ bhīmamakliṣṭakāriṇam /
bhogena mahatā gṛhya samantātparyaveṣṭayat //

nigṛhyainaṃ mahābāhuṃ tataḥ sa bhujagastadā /
vimucyāsya bhujau pīnāvidaṃ vacanamabravīt //

diṣṭastvaṃ kṣudhitasyādya devairbhakṣo mahābhuja /
diṣṭyā kālasya mahataḥ priyāḥ prāṇā hi dehināṃ //

yathā tvidaṃ mayā prāptaṃ bhujaṅgatvamarindama /
tadavaśyaṃ tvayā mattaḥ śrotavyaṃ śṛṇu yanmama //

imāmavasthāṃ samprāpto hyahaṃ kopānmaharṣiṇā /
śāpasyāntaṃ pariprepsuḥ sarvas kathayāmi tat //

nahuṣo nāma rājarṣirvyaktaṃ te śrotramāgataḥ /
tavaiva pūrvaḥ pūrveṣāmāyorvaṃśadharaḥ sutaḥ //

sohaṃ śāpādagastyasya brāhmaṇānavamatya ca /
imāmavasthāmāpannaḥ paśya daivamidaṃ mama //

tvāṃ cedavadhyamāyāntamatīva priyadarśanam /
ahamadyopayokṣyāmi vidhānaṃ paśya yādṛśam //

na hi me mucyate kaścitkathañcitpragrahaṃ gataḥ /
gacajovā mahiṣo vā'pi ṣaṣṭhe kāle narottama //

nāsi kevalasarpeṇa tiryagyoniṣu vartatā /
gṛhītaḥ kauravaśreṣṭha varadānamidaṃ mama //

patatā hi vimānāgrānmayā śakrāsanāddrutam /
kuru śāpāntamityukto bhagavānmunisattamaḥ //

yastvayā veṣṭito rājanmohameti mahābalaḥ /
mokṣaste bhavitā rājankasmāccitkālaparyayāt //

tatosmi patito bhūmau na ca māmajahātsmṛtiḥ /
smārtamasti purāṇaṃ me yathaivādhigataṃ tathā //

yastu te vyāhṛtānpraśnānpratibrūyādvibhāgavit /
sa tvāṃ mokṣayitā śāpāditi māmabravīdṛṣiḥ //

gṛhītasya tvayā rājanprāṇinopi balīyasaḥ /
satvabhraṃśo'dhikasyāpi sarvasyāśu bhaviṣyati //

iticāpyahamaśrauṣaṃ vacasteṣāṃ dayāvatām /
mayi sañjātahārdānāmatha te'ntarhitā dvijāḥ //

sohaṃ paramaduṣkarmā vasāmi niraye'śucau /
sarpayonimimāṃ prāpyakālākāṅkṣī mahādyute //

tamuvāca mahābāhurbhīmaseno bhujaṅgamam /
na te kupye mahāsarpa nātmane dvijasattama //

yasmādabhāvī bhāvī vā manuṣyaḥ sukhaduḥkhayoḥ /
āgame yadi vā'pāye na tatra glapayenmanaḥ //

daivaṃ puruṣakāreṇa ko vañcayitumarhati /
daivameva paraṃ manye pauruṣaṃ tu nirarthakam //

paśya daivopaghātāddhi bhujavīryavyapāśrayam /
imāmavasthāṃ samprāptamanimittamihādya mām //

kintu nādyānuśocāmi tathā'tmānaṃ vināśitam /
tathā tu vipine nyastānbhrātṝnrājyaparicyutān //

himavāṃśca sudurgo'yaṃ yakṣarākṣasasankulaḥ /
māṃ samudvīkṣamāṇāste prayatiṣyanti vihvalāḥ //

vinaṣṭamatha māṃ śrutvā bhaviṣyanti nirudyamāḥ /
dharmaśīlā mayā te hi bādhyante rājyagṛddhinā //

athavā nārjuno dhīmānviṣādamupayāsyati /
sarvāstravidanādhṛṣyo devagandharvarākṣasaiḥ //

samarthaḥ sa mahābāhurekāṅnā sumahābalaḥ /
devarājamapi sthānātpracyāvayitumañjasā //

kiṃ punardhṛtarāṣṭras putraṃ durdyūtadevinam /
vidviṣṭaṃ sarvalokasya dambhamohaparāyaṇam //

mātaraṃ caiva śocāmi kṛpaṇāṃ putragṛddhinīm /
yā'smākaṃ nityamāśāste mahattvamadhikaṃ paraiḥ //

tasyāḥ kathaṃ tvanāthāyā madvināśādbhujaṅgam /
saphalāste bhaviṣyanti mayi sarve manorathāḥ //

nakulaḥ sahadevaśca yamau ca guruvartinau /
madvāhubalasanguptau nityaṃ puruṣamāninau //

bhaviṣyato nirutsāhau bhraṣṭavīryaparākramau /
madvināśātparidyūnāviti me vartate matiḥ //

evaṃvidhaṃ bahu tadā vilalāpa vṛkodaraḥ /
bhujaṅgabhogasaṃruddho nāśakacca viceṣṭitum //

yudhiṣṭhirastu kaunteyo babhūvāsvastacetanaḥ /
aniṣṭadarśanānghorānutpātānparicintayan //

dāruṇaṃ hyaśivaṃ nādaṃ śivā dakṣiṇataḥ sthitā /
dīptāyāṃ diśi vitrastā rauti tasyāśramasya ha //

ekapakṣākṣicaraṇā vartikā ghoradarśanā /
raktaṃ vamantī dadṛśe pratyādityamabhāsurā //

pravavau cānilo rūkṣaścaṇḍaḥ sarkarakarṣaṇaḥ /
apasavyāni sarvāṇi mṛgapakṣirutāni ca //

pṛṣṭhato vāyasaḥ kṛṣṇo yāhiyāhīti vāśati /
muhurmuhuḥ sphurati ca dakṣiṇo'sya bhujastathā //

hṛdayaṃ caraṇaścāpi vāmo'sya paritapyati /
savyasyākṣṇao vikāraścāpyaniṣṭaḥ samapadyata //

dharmarājopi medhāvī śaṅkamāno mahadbhayam /
draupadīṃ paripapraccha kva bhīma iti bhārata //

śaṃsa tasmai pāñcālī cirayātaṃ vṛkodaram /
sa pratasthe mahābāhurdhaumyena sahito nṛpaḥ //

draupadyā rakṣaṇaṃ kāryamityuvāca dhanañjayam /
nakulaṃ sahadevaṃ ca vyādideśa dvijānprati //

sa tasya padamunnīya tasmādevāśramātprabhuḥ /
mṛgayāmāsa kaunteyo bhīmasenaṃ mahāvane //

sa prācīṃ diśamāsthāya mahato gajayūthapān /
dadarśa pṛthivīṃ cihnairbhīmasya paricihnitām //

tato mṛgasahasrāṇi mṛgenadrāṇāṃ śatāni ca /
patitāni vane dṛṣṭvā mārgaṃ tasyāviśannṛpaḥ //

dhāvatastasya vīras mṛgārthaṃ vātaraṃhasaḥ /
ūruvātavinirbhagnāndrumānvyāvarjitānpathiḥ //

sa gatvā taistadā cihnairdadarśa girigahvare /
[rūkṣamārutabhūyiṣṭhe niṣpatradrumasankule //

īriṇe nirjale deśe kaṇṭakidrumasankule / aśmasthāṇukṣupākīrṇe sudurge viṣamotkaṭe.]
gṛhītaṃ bhujagendreṇa niśceṣṭamanujaṃ tadā //