Mahabharata · Chapter 3.180

kathaṃ nāgāyutaprāṇo bhīmo bhīmaparākramaḥ /
bhayamāhārayattīvraṃ tasmādajagarānmune //

paulastyaṃ dhanadaṃ yudde ya āhvayati darpitaḥ /
nalinyāṃ kadanaṃ kṛtvā nihantā yakṣarakṣasām //

taṃ saṃsasi bhayāviṣṭamāpannamarisūdanam /
etadicchāmyahaṃ śrotuṃ paraṃ kautūhalaṃ hi me //
vaiśampāyana uvāca /

bahvāścarye vane teṣāṃ vasatāmugradhanvinām /
prāptānāmāśramaṃ rājanrājarṣervṛṣaparvaṇaḥ //

yadṛcchayā dhanuṣpāṇirbaddhakhaṅgo vṛkodaraḥ /
dadarśa tadvanaṃ ramyaṃ devagandharvasevitam //

sa dadarśa śubhāndeśāngirerhimavatastadā /
devarṣisiddhacaritānapsarogaṇasevitān //

cakorairupacakraiśac pakṣibhirjīvajīvakaiḥ /
kokilairbhṛṅgarājaiśca tatra tatra nināditān //

nityapuṣpaphalairvṛkṣairhimasaṃsparśakomalaiḥ /
upetānbahulacchāyairmanonayananandanaiḥ //

sa sampaśyangirinadīrvaiḍūryamaṇisannibhaiḥ /
salilairhimasankāśairhaṃsakāraṇḍavāyutaiḥ //

vanāni devadārūṇāṃ meghānāmiva vāgurāḥ /
haricandanamiśrāṇi tuṅgakālīyakānyapi //

mṛgayāṃ paridhāvansa sameṣu marudhanvasu /
vidhyanmṛgāñśaraiḥ śuddhaiścacāra sa mahābalaḥ //

bhīmasenastu vikhyāto mahāntaṃ daṃṣṭriṇaṃ balāt /
nighnannāgaśataprāṇo vane tasminmahābalaḥ //

mṛgāṇāṃ savarāhāṇāṃ mahiṣāṇāṃ mahābhujaḥ /
vinighnaṃstatratatraiva bhīmo bhīmaparākramaḥ //

sa mātaṅgaśataprāṇo manuṣyaśatavāraṇaḥ /
siṃhaśārdūlavikrānto vane tasminmahābalaḥ //

vṛkṣānutpāṭayāmāsa tarasā vai babhañja ca /
pṛthivyāśca pradeśānvai nādayaṃstu vanāni ca //

parvatāgrāṇi vai mṛdgannādayānaśca vijvaraḥ /
prakṣipanpādapāṃścāpi nādenāpūrayanmahīm //

vegena nyapatadbhīmo nirbhayaśca punaḥ punaḥ / āsphoṭayankṣveḍayaṃśca talatālāṃśca vādayan /
cirasambaddhadarpastu bhīmaseno vane tadā //

gajenadrāśca mahāsatvā mṛgendrāśca mahābalāḥ /
bhīmasenasya nādena vyamuñcanta guhā bhayāt //

kvacitpradhāvaṃstiṣṭhaṃśca kvaciccopaviśaṃstathā /
mṛgaprepsurmahāraudre vane carati nirbhayaḥ //

sa tatramanujavyāghro vane vanacaropamaḥ /
padbhyāmabhisamāpede bhīmaseno mahābalaḥ //

sa praviṣṭo mahāraṇye nādānnadati cādbhutān /
trāsayansarvabhūtāni mahāsatvaparākramaḥ //

tato bhīmasya śabdena bhītāḥ sarpā guhāśayāḥ / atikrāntāstu vegena jagāmānusṛtaḥ śanaiḥ /
tato'maravaraprakhyo bhīmaseno mahābalaḥ //

sa dadarśa mahākāyaṃ bhujaṅgaṃ romaharṣaṇam /
giridurge samāpannaṃ kāyenāvṛtya kandaram //

parvatābhogavarṣmāṇaṃ bhogaiścandrārkamaṇḍalaiḥ /
citrāṅgamaṅgajaiścitrairharidrāsadṛśacchavim //

guhākāreṇa vakreṇa caturdaṃṣṭreṇa rājatā /
dīptākṣeṇātitāmreṇa lihānaṃ sṛkviṇī muhuḥ //

trāsanaṃ sarvabhūtānāṃ kālāntakayamopamam /
niḥśvāsakṣveḍanādena bhartsayantamiva sthitam //

sa bhīmaṃ sahasā'bhyetya pṛdākuḥ kṣudhito bhṛśam /
jagrāhājagaro grāho bhujayorubhayorbalāt //

tena saṃspṛṣṭagātrasya bhīmasenasya vai tadā /
sañjñā mumoha sahasā varadānena tasya hi //

daśanāgasahasrāṇi dhārayanti hi yadbalam /
idralaṃ bhīmasenasya bhujayorasamaṃ paraiḥ //

sa tejasvī tathā tena bhujagena vaśīkṛtaḥ /
vimphurañśanakairbhīmo na śaśāka viceṣṭitum //

nāgāyutasamaprāṇaḥ siṃhaskandho mahābhujaḥ /
gṛhīto vyajahātsatvaṃ varadānavimohitaḥ //

sa hi prayatnamakarottīvramātmavimokṣaṇe / na cainamaśakadvīraḥ kathañcitpratibādhitum //