Mahabharata · Chapter 3.179

nagottamaṃ prasravaṇairupetaṃ diśāṃ gajaiḥ kinnarapakṣibhiśca /
sukhaṃ nivāsaṃ jahatāṃ hi teṣāṃ na prītirāsīdbharatarṣabhāṇām //

tatastu teṣāṃ punareva harṣaḥ kailāsamālokya mahānbabhūva /
kuberakāntaṃ bharatarṣabhāṇāṃ mahīdharaṃ vāridharaprakāśam //

samucchrayānparvatasannirodhān goṣṭhānharīṇāṃ girigahvarāṇi /
bahuprakārāṇi samīkṣyavīrāḥ sthalāni nimnāni ca tatra tatra //

tathaiva cānyāni mahāvanāni mṛgadvijānekapasevitāni /
ālokayanto'bhiyayuḥ pratītā- ste dhanvināḥ khaṅgadharā narāgryāḥ //

vanāni ramyāṇi nadīḥ sarāṃsi guhā girīṇāṃ girigahvarāṇi
ete nivāsāḥ satataṃ babhūvu- rniśāmukhaṃ prāpya nararṣabhāṇām //

te durgavāsaṃ bahudhā niruṣya vyatītya kailāsamacintyarūpam /
āseduratyarthamanoramaṃ te tamāśramāgryaṃ vṛṣaparvaṇastu //

sametya rājñā vṛṣaparvaṇā te pratyarcitāstena ca vītamohāḥ /
śaśaṃsire vistaraśaḥ pravāsaṃ śivaṃ yathāvadvṛṣaparvaṇaste //

sukhoṣitāstasya ta ekarātraṃ puṇyāśrame devamaharṣijuṣṭe /
abhyāyayuste badarīṃ viśālāṃ sukhena vīrāḥ punareva vāsam //

ūṣustatastatra mahānubhāvā nārāyaṇasthānagatāḥ samagrāḥ /
kuberakāntāṃ nalinīṃ viśokāḥ sampaśyamānāḥ surasiddhajuṣṭām //

tāṃ cātha dṛṣṭvā nalinīṃ viśokāḥ pāṇḍoḥ sutāḥ sarvanarapradhānāḥ /
te remire nandanavāsametya dvijarṣayo vītamalā yathaiva //

tataḥ krameṇopayayurnṛvīrā yathāgatenaiva pathā samagrāḥ /
vihṛtya māsaṃ sukhino badaryāṃ kirātarājño viṣayaṃ subāhoḥ //

cīnāṃstuṣārāndaradāṃśca sarvān deśānkulindasya ca bhūriramyān /
atītya durgaṃ himavatpradeśaṃ puraṃ subāhordadṛśurnṛvīrāḥ //

śrutvā ca tānpārthiva putrapautrā- nprāptānsubāhurviṣaye samagrān /
pratyudyayau prītiyutaḥ sa rājā taṃ cābhyanandanvṛṣabhāḥ kurūṇām //

sametya rājñā tu subāhunā te sutairviśokapramukhaiśca sarve /
sahenadrasenaiḥ paricārakaiśca paurogavairye ca ramahānasasthāḥ //

sukhopitāstatrata ekarātraṃ sūtānsamādāya rathāṃśca sarvān /
ghaṭotkacaṃ sānucaraṃ visṛjya tato'bhyayuryāmunamadrirājam //

tasmingirau prasravaṇopapanna- himottarīyāruṇapāṇḍusānau /
viśākhayūpaṃ samupetya cakru- stadā nivāsaṃ puruṣapravīrāḥ //

varāhanānāmṛgapakṣijuṣṭaṃ mahāvanaṃ caitrarathaprakāśam /
śivena yātvā mṛgayāpradhānāḥ saṃvatsaraṃ tatravane vijahruḥ //

tatrāsasādātibalaṃ bhujaṅgaṃ kṣudhārditaṃ mṛtyumivograrūpam /
vṛkodaraḥ parvatakandarāyāṃ viṣādamohavyathitāntarātmā //

dvīpo'bhavadyatra vṛkodarasya yudhiṣṭhiro dharmabhṛtāṃ variṣṭhaḥ /
amokṣayadyastamanantatejā grāheṇa saṃveṣṭitasarvagātram //

te dvādaśaṃ varṣamathopayāntaṃ vane vihurtuṃ kuravaḥ pratītāḥ /
tasmādvanāccaitrarathaprakāśā- cchriyā jvalantastapasā ca yuktāḥ //

tataśca yātvā marudhanvapārśvaṃ sadā dhanurvedaratipradhānāḥ /
sarasvatīmetya nivāsakāmāḥ sarastato dvaitavanaṃ pratīyuḥ //

samīkṣ tāndvaitavane niviṣṭā- nnivāsinastatratato'bhijagmuḥ /
tapodamācārasamādhiyuktā- stṛṇodapātrāvaraṇāśmakuṭṭāḥ //

plakṣākṣarauhītakavetasāśca tathā badaryaḥ khadirāḥ śirīṣāḥ /
bilveṅgudāḥ pīluśamīkarīrāḥ sarasvatītīraruhā babhūvuḥ //

tāṃ yakṣagandharvamaharṣikāntā- māvāsabhūtāmiva devatānām /
sarasvatīṃ prītiyutāścarantaḥ sukhaṃ vijahrurnaradevaputrāḥ //