Mahabharata · Chapter 3.178

tasminkṛtāstre rathināṃ pravīre / pratyāgate bhavanādvṛtrahantuḥ /
ataḥ paraṃ kimakurvanta pārthāḥ sametya śūreṇa dhanañjayena //
vaiśampāyana uvāca /

vaneṣu teṣveva tu te narendrāḥ sahārjunenendrasamena vīrāḥ /
tasmiṃśca śailapravare suramye dhaneśvarākrīḍagatā vijahruḥ //

veśmāni tānyapratimāni paśyan krīḍāśca nānādrumasannibaddhāḥ /
cacāra dhanvī bahudhā narendraḥ so'streṣu yattaḥ satataṃ kirīṭī //

avāpya vāsaṃ naradevaputrāḥ prasādajaṃ vaiśravaṇasya rājñaḥ /
na prāṇināṃ te spṛhayanti rāja- ñśivaś kālaḥ sa babhūva teṣām //

sametya pārthena yathaikarātra- mūṣuḥ samāstatratathā catasraḥ /
pūrvāśca ṣaṭ tā daśa pāṇḍavānāṃ śivā babhūvurvasatāṃ vaneṣu //

tato'bravīdvāyusutastarasvī jiṣṇuśca rājānamupopaviśya /
yamau ca vīrau surarājakalpā- vekāntamāsthāya hitaṃ priyaṃ ca //

tava pratijñāṃ kururāja satyāṃ cikīrṣamāṇāstvadanupriyaṃ ca /
tato na gacchāma vanānyapāsya suyodhanaṃ sānucaraṃ nihantum //

ekādaśaṃ varṣamidaṃ vasāmaḥ suyodhanenāttasukhāḥ sukhārhāḥ /
taṃ vañcayitvā'dhamabuddhiśīla- majñātavāsaṃ sukhamāpnuyāma //

tavājñayā pārthiva nirviśaṅkā vihāya mānaṃ vicarāmo vanāni /
samīpavāsena vilobhitāste jñāsyanti nāsmānapakṛṣṭadeśān //

saṃvatsaraṃ tatra vihṛtya gūḍhaṃ narādhamaṃ taṃ sukhamuddharema /
niryātya vairaṃ saphalaṃ sapuṣpaṃ tasmai narendrādhamapūruṣāya //

suyodhanāyānucarairvṛtāya tato mahīṃ prāpnuhi dharmarāja /
svargopamaṃ deśamimaṃ caradbhiḥ śakyo vihantuṃ naradeva śokaḥ //

kīrtistu te bhārata puṇyagandhā naśyeddhi lokeṣu carācareṣu /
tatprāpya rājyankurupuṅgavānāṃ śakyaṃ mahatprāptumatha kriyāśca //

idaṃ tu śakyaṃ satataṃ narendra prāptuṃ tvayā yallabhase kuberāt /
kuruṣva buddhiṃ dviṣatāṃ vadhāya kṛtāgasāṃ bhārata nigrahe ca //

tejastavograṃ na saheta rājan sametya sākṣādapi vajrapāṇiḥ /
na hi vyathāṃ jātu kariṣyatastau sametya devairapi dharmarāja //

tavārthasiddhyarthamapi pravṛttau suparṇaketuśca śineśca naptā /
yathaiva kṛṣṇo'pratimo balena tathaiva rājansa śinipravīraḥ //

tavārthasiddhyarthamabhiprapanno yathaiva kṛṣṇaḥ saha yādavaistaiḥ /
tathaiva cemau naradevavarya yamau ca vīrau kṛtinau prayoge //

tvadarthayogaprabhavapradhānāḥ śamaṃ kariṣyāma parānsametya //
vaiśampāyana uvāca

tatastadājñāya mataṃ mahātmā teṣāṃ ca dharmasya suto variṣṭhaḥ /
pradakṣiṇaṃ sthānamupetya rājā paryākramadvaiśravaṇasya rājñaḥ //

āmantrya veśmāni nadīḥ sarāṃsi sarvāṇi rakṣāṃsi ca dharmarājaḥ /
yathāgataṃ mārgamavekṣamāṇaḥ punargiriṃ caiva nirīkṣamāṇaḥ / [tato mahātmā sa viśuddhabuddhiḥ samprārthayāmāsa nagendravaryam // ]

samāptakarmā sahitaḥ suhṛdbhi- rjitvā sapatnānpratilabhya rājyam /
śailendra bhūyastapase jitātmā draṣṭā tavāsmīti matiṃ cakāra //

vṛtaśca sarvairanujairdvijaiśca tenaiva mārgeṇa punarnivṛttaḥ /
uvāha caināngaṇaśastathaiva ghaṭotkacaḥ parvatanirjhareṣu //

tānprasthitānprītamanā maharṣiḥ piteva putrānanuśiṣya sarvān /
sa lomaśo divamevorjitaśrī- rjagāma teṣāṃ vijayaṃ tadoktvā //

tenārṣṭiṣeṇena tathānuśiṣṭā- stīrtāni ramyāṇi tapovanāni /
mahānti cānyāni sarāṃsi pārthāḥ kasampaśyamānāḥ prayayurnarāgryāḥ //