Mahabharata · Chapter 3.177

tasyāṃ rātryāṃ vyatītāyāṃ dharmarājo yudhiṣṭhiraḥ /
utthāyāvaśyakāryāṇi kṛtavānbhrātṛbhiḥ saha //

tataḥ sañcodayāmāsa so'rjunaṃ mātṛnandanam /
darśayāstrāṇi kaunteya yairjitā dānavāstvayā //

tato dhanañjayo rājandevairdattāni pāṇḍavaḥ /
astrāṇi tāni divyāni darśayāmāsa bhārata //

yathānyāyaṃ mahātejāḥ śaucaṃ paramamāsthitaḥ /
namaskṛtya trinetrāya vāsavāya ca pāṇḍavaḥ //

girikūbarapādākṣaṃ śubhaveṇu triveṇumat /
pārthivaṃ rathamāsthāya śobhamāno dhanañjayaḥ //

divyena saṃvṛtastena kavacena suvarcasā /
dhanurādāya gāṇḍīvaṃ devadattaṃ sa vārijam //

śośubhyamānaḥ kaunteya ānupūrvyānmahābhujaḥ /
astrāṇi tāni divyāni darśanāyopacakrame //

atha prayokṣyamāṇeṣu divyeṣvastreṣu teṣu vai /
samākrāntā mahī padbhyāṃ samakampata sadrumā //

kṣubhitāḥ saritaścaiva tathaiva ca mahodadhiḥ /
śailāścāpi vyadīryanta na vavau ca samīraṇaḥ //

na babhāse sahasrāṃśurna jajvāla ca pāvakaḥ /
na vedāḥ pratibhānti sma dvijātīnāṃ kathañcana //

antarbhūmigatā ye ca prāṇino janamejaya /
pīḍyamānāḥ samutthāya pāṇḍavaṃ paryavārayan //

vepamānāḥ prāñjalayaste sarve vikṛtānanāḥ /
dahyamānāstadā'straiste yācanti sma dhanañjayam //

tato brahmarṣayaścaiva siddhā ye ca maharṣayaḥ /
jaṅgamāni ca bhūtāni sarvāṇyevāvatasthire //

devarṣayaśca pravarāstathaiva ca divaukasaḥ / yakṣarākṣasagandharvāstathaiva ca patatriṇaḥ /
khecarāṇi ca bhūtāni sarvāṇyevāvatasthire //

tataḥ pitāmahaścaiva lokapālāśca sarvaśaḥ /
bhagavāṃśca mahādevaḥ sagaṇo'bhyāyayau tadā //

tato vāyurmahārāja divyairmālyaiḥ samanvitaḥ /
abhitaḥ pāṇḍavañcitrairavacakre samantataḥ //

jaguśca gāthā vividhā gandharvāḥ suracoditāḥ /
nanṛtuḥ saṅghaśaścaiva rājannapsarasāṃ gaṇāḥ //

tasmiṃśca tādṛśe kāle nāradaścoditaḥ suraiḥ /
āgamyāha vacaḥ pārthaṃ śravaṇīyamidaṃ nṛpa //

arjunārjuna mā yuṅkṣa divyānyastrāṇi bhārata /
naitāni niradhiṣṭhāne prayujyante kathañcana //

adhiṣṭhāne na vā'nārtaḥ prayuñjīta kadācana /
prayogeṣu mahāndoṣo hyastrāṇāṃ kurunandana //

etāni rakṣyamāṇāni dhanañjaya yathāgamam /
balavanti sukhārhāṇi bhaviṣyanti na saṃśayaḥ //

arakṣyamāṇānyetāni trailokyasyāpi pāṇḍava /
bhavanti sma vināśāya maivaṃ bhūyaḥ kṛthāḥ kvacit //

ajātaśatro tvaṃ caiva drakṣyase tāni saṃyuge /
yojyamānāni pārthe nadviṣatāmavamardane //
vaiśampāyana uvāca /

nivāryātha tataḥ pārthaṃ sarve devā yathāgatam /
jagmuranye ca ye tatra rasamājagmurnararṣabha //

teṣu sarveṣu kauravya pratiyāteṣu pāṇḍavāḥ / tasminaneva vane hṛṣṭāsta ūṣuḥ saha kṛṣṇayā //