Mahabharata · Chapter 3.176

tato māmiviśvastaṃ saṃrūḍhaśaravikṣatam /
devarājo'nugṛhyedaṃ kāle vacanamabravīt //

divyānyastrāṇi sarvāṇi tvayi tiṣṭhanti bhārata /
na tvā'bhibhavituṃ śakto mānuṣo bhuvi kaścana //

bhīṣmo droṇaḥ kṛpaḥ karṇaḥ śakuniḥ saha rājabhiḥ /
sangrāmasthasya te putra kalāṃ nārhanti ṣoḍaśīm //

idaṃ ca me tanutrāṇaṃ prāyacchanmaghavānprabhuḥ /
abhedyaṃ kavacaṃ divyaṃ srajaṃ caiva hiraṇmayīm //

devadattaṃ ca me śaṅkhaṃ devaḥ prādānmahāravam /
divyaṃ cedaṃ kirīṭaṃ me svayamindro yuyoja ha //

tato divyāni vastrāṇi divyānyābharaṇāni ca /
prādācchakro mamaitāni rucirāṇi bṛhanti ca //

evaṃ sampūjitastatrasukhamasmyuṣito nṛpa /
indras bhavane puṇye gandharvaśiśubhiḥ saha //

tato māmabravīcchakraḥ prītimānamaraiḥ saha /
samayo'rjuna gantuṃ te bhrātaro hi smaranti te //

evamindrasya bhavane pañcavarṣāṇi bhārata /
uṣitāni mayā rājansmaratā dyūtajaṃ kalim //

tato bhavantamadrākṣaṃ bhrātṛbhiḥ parivāritam /
gandhamādanamāsādya parvatasyāsya mūrdhani //
yudhiṣṭhira uvāca /

diṣṭyā dhanañjayāstrāṇi tvayā prāptāni bhārata /
diṣṭyā cārādhito rājā devānāmīśvaraḥ prabhuḥ //

diṣṭyā ca bhagavansthāṇurdevyā saha parantapaḥ /
sākṣāddṛṣṭaḥ svayuddhena toṣitaś tvayā'nagha //

diṣṭyā ca lokapālaistvaṃ sameto bharatarṣabha /
diṣṭyā vardhāmahe pārtha diṣṭyā'si punarāgataḥ //

adya kṛtsnāmimāṃ devīṃ vijitāṃ puramālinīm / paśyāmi bhūmiṃ kaunteya tvayā me pratipāditām /
manye ca dhṛtarāṣṭrasya putrānapi vaśīkṛtān //

icchāmi tāni cāstrāṇi draṣṭuṃ divyāni bhārata /
yaistathā vīryavantaste nivātakavacā hatāḥ //
arjuna uvāca /

saḥ prabhāte bhavāndraṣṭā divyānyastrāṇi sarvaśaḥ /
nivātakavacā ghorā yairmayā vinipātitāḥ //
vaiśampāyana uvāca /

evamāgamanaṃ tatra kathayitvā dhanañjayaḥ / bhrātṛbhiḥ sahitaḥ sarvai rajanīṃ tāmuvāsa ha //