મહાભારત · અધ્યાય 3.177

તસ્યાં રાત્ર્યાં વ્યતીતાયાં ધર્મરાજો યુધિષ્ઠિરઃ ।
ઉત્થાયાવશ્યકાર્યાણિ કૃતવાન્ભ્રાતૃભિઃ સહ ॥

તતઃ સઞ્ચોદયામાસ સોઽર્જુનં માતૃનન્દનમ્ ।
દર્શયાસ્ત્રાણિ કૌન્તેય યૈર્જિતા દાનવાસ્ત્વયા ॥

તતો ધનઞ્જયો રાજન્દેવૈર્દત્તાનિ પાણ્ડવઃ ।
અસ્ત્રાણિ તાનિ દિવ્યાનિ દર્શયામાસ ભારત ॥

યથાન્યાયં મહાતેજાઃ શૌચં પરમમાસ્થિતઃ ।
નમસ્કૃત્ય ત્રિનેત્રાય વાસવાય ચ પાણ્ડવઃ ॥

ગિરિકૂબરપાદાક્ષં શુભવેણુ ત્રિવેણુમત્ ।
પાર્થિવં રથમાસ્થાય શોભમાનો ધનઞ્જયઃ ॥

દિવ્યેન સંવૃતસ્તેન કવચેન સુવર્ચસા ।
ધનુરાદાય ગાણ્ડીવં દેવદત્તં સ વારિજમ્ ॥

શોશુભ્યમાનઃ કૌન્તેય આનુપૂર્વ્યાન્મહાભુજઃ ।
અસ્ત્રાણિ તાનિ દિવ્યાનિ દર્શનાયોપચક્રમે ॥

અથ પ્રયોક્ષ્યમાણેષુ દિવ્યેષ્વસ્ત્રેષુ તેષુ વૈ ।
સમાક્રાન્તા મહી પદ્ભ્યાં સમકમ્પત સદ્રુમા ॥

ક્ષુભિતાઃ સરિતશ્ચૈવ તથૈવ ચ મહોદધિઃ ।
શૈલાશ્ચાપિ વ્યદીર્યન્ત ન વવૌ ચ સમીરણઃ ॥

ન બભાસે સહસ્રાંશુર્ન જજ્વાલ ચ પાવકઃ ।
ન વેદાઃ પ્રતિભાન્તિ સ્મ દ્વિજાતીનાં કથઞ્ચન ॥

અન્તર્ભૂમિગતા યે ચ પ્રાણિનો જનમેજય ।
પીડ્યમાનાઃ સમુત્થાય પાણ્ડવં પર્યવારયન્ ॥

વેપમાનાઃ પ્રાઞ્જલયસ્તે સર્વે વિકૃતાનનાઃ ।
દહ્યમાનાસ્તદાઽસ્ત્રૈસ્તે યાચન્તિ સ્મ ધનઞ્જયમ્ ॥

તતો બ્રહ્મર્ષયશ્ચૈવ સિદ્ધા યે ચ મહર્ષયઃ ।
જઙ્ગમાનિ ચ ભૂતાનિ સર્વાણ્યેવાવતસ્થિરે ॥

દેવર્ષયશ્ચ પ્રવરાસ્તથૈવ ચ દિવૌકસઃ । યક્ષરાક્ષસગન્ધર્વાસ્તથૈવ ચ પતત્રિણઃ ।
ખેચરાણિ ચ ભૂતાનિ સર્વાણ્યેવાવતસ્થિરે ॥

તતઃ પિતામહશ્ચૈવ લોકપાલાશ્ચ સર્વશઃ ।
ભગવાંશ્ચ મહાદેવઃ સગણોઽભ્યાયયૌ તદા ॥

તતો વાયુર્મહારાજ દિવ્યૈર્માલ્યૈઃ સમન્વિતઃ ।
અભિતઃ પાણ્ડવઞ્ચિત્રૈરવચક્રે સમન્તતઃ ॥

જગુશ્ચ ગાથા વિવિધા ગન્ધર્વાઃ સુરચોદિતાઃ ।
નનૃતુઃ સઙ્ઘશશ્ચૈવ રાજન્નપ્સરસાં ગણાઃ ॥

તસ્મિંશ્ચ તાદૃશે કાલે નારદશ્ચોદિતઃ સુરૈઃ ।
આગમ્યાહ વચઃ પાર્થં શ્રવણીયમિદં નૃપ ॥

અર્જુનાર્જુન મા યુઙ્ક્ષ દિવ્યાન્યસ્ત્રાણિ ભારત ।
નૈતાનિ નિરધિષ્ઠાને પ્રયુજ્યન્તે કથઞ્ચન ॥

અધિષ્ઠાને ન વાઽનાર્તઃ પ્રયુઞ્જીત કદાચન ।
પ્રયોગેષુ મહાન્દોષો હ્યસ્ત્રાણાં કુરુનન્દન ॥

એતાનિ રક્ષ્યમાણાનિ ધનઞ્જય યથાગમમ્ ।
બલવન્તિ સુખાર્હાણિ ભવિષ્યન્તિ ન સંશયઃ ॥

અરક્ષ્યમાણાન્યેતાનિ ત્રૈલોક્યસ્યાપિ પાણ્ડવ ।
ભવન્તિ સ્મ વિનાશાય મૈવં ભૂયઃ કૃથાઃ ક્વચિત્ ॥

અજાતશત્રો ત્વં ચૈવ દ્રક્ષ્યસે તાનિ સંયુગે ।
યોજ્યમાનાનિ પાર્થે નદ્વિષતામવમર્દને ॥
વૈશમ્પાયન ઉવાચ ।

નિવાર્યાથ તતઃ પાર્થં સર્વે દેવા યથાગતમ્ ।
જગ્મુરન્યે ચ યે તત્ર રસમાજગ્મુર્નરર્ષભ ॥

તેષુ સર્વેષુ કૌરવ્ય પ્રતિયાતેષુ પાણ્ડવાઃ । તસ્મિનનેવ વને હૃષ્ટાસ્ત ઊષુઃ સહ કૃષ્ણયા ॥