Mahabharata · Chapter 3.173

tato'śmavarṣaṃ sumahatprādurāsītsamantataḥ /
nagamātraiḥ śilākhaṇḍaistanmāṃ dṛḍhamapīḍayat //

tadahaṃ vajrasankāśaiḥ śarairinadrāstracoditaiḥ /
acūrṇayaṃ vegavadbhiḥ śatadhaikaikamāhave //

cūrṇyamāne'śmavarṣe tu yāvakaḥ samajāyata /
tatrāśmacūrṇā nyapatanpāvakaprakarā iva //

tato'śmavarṣe vihate jalavarṣaṃ mahattaram /
dhārābhirakṣamātrābhiḥ prādurāsīnamamāntike //

nabhasa pracyutā dhārāstigmavīryāḥ sahasraśaḥ /
āvṛṇvansarvato vyoma diśaścopadiśastathā //

dhārāṇāṃ ca nipātena vāyorviṣphūrjitena ca /
garjitena ca meghānāṃ na prājñāyata kiñcana //

dhārā divi ca sambaddhā vasudhāyāṃ ca sarvaśaḥ /
vyāmohayanta māṃ tatranipatantyo'niśaṃ bhuvi //

tatropadiṣṭamindreṇa divyamastraṃ viśoṣaṇam /
dīptaṃ prāhiṇavaṃ ghoramaśupyattena tajjalam //

hate'śmavarṣe ca mayā jalavarṣe ca śoṣite /
mumucurdānavā māyāmagniṃ vāyuṃ ca bhārata //

tato'hamagniṃ vyadhamaṃ salilāstreṇa sarvaśaḥ /
śailena ca mahāstreṇa vāyoravegamadhārayam //

tasyāṃ pratihatāyāṃ te dānavā yuddhadurmadāḥ /
prākurvanvividhāṃ māyāṃ yaugapadyena bhārata //

tato varṣaṃ prādurabhūtsumahadromaharṣaṇam /
astrāṇāṃ ghorarūpāṇāmagnervāyostathā'śmanām //

sā tu māyāmayī vṛṣṭiḥ pīḍayāmāsa māṃ yudhi /
atha ghoraṃ tamastīvraṃ prādurāsītsamantataḥ //

tamasā saṃvṛteloke ghoreṇa paruṣeṇa ca /
harayo vimukhāścāsanprāskhalaccāpi mātaliḥ //

hastāddhiraṇmayaścāsya pratodaḥ prāpatadbhuvi /
asakṛccāha māṃ bhītaḥ kiṃ kariṣyāva ityapi //

māṃ ca bhīrāviśattīvrā tasminvigatacetasi /
sa ca māṃ vigatajñānaḥ santrastamidamabravīt //

surāṇāmasurāṇāṃ ca sangrāmaḥ sumahānabhūt /
amṛtārthaṃ purā pārta sa ca dṛṣṭo mayā'nagha //

śambarasya vadhe ghoraḥ sangrāmaḥ sumahānabhūt /
sārathyaṃ devarājasya tatrāpi kṛtavānaham //

tathaiva vṛtrasya vadhe sangṛhītā hayā mayā /
vairocanermayā yuddhaṃ dṛṣṭaṃ cāpi sudāruṇam //

ete mayā mahāghoraḥ sangrāmāḥ paryupāsitāḥ /
na cāpi vigatajñāno bhūtapūrvosmi pāṇḍava //

pitāmahena saṃhāraḥ prajānāṃ vihito dhruvam /
na hi yuddhamidaṃ yuktamanyatra jagataḥ kṣayāt //

tasya tadvacanaṃ śrutvā saṃstabhyātmānamātmanā /
mohayiṣyandānavānāmahaṃ māyābalaṃ mahat //

abruvaṃ mātaliṃ bhītaṃ paśya me bujayorbalam /
astrāṇāṃ ca prabhāvaṃ vai dhanuṣo gāṇḍivasya ca //

adyāstramāyayaitaiṣāṃ māyāmetāṃ sudāruṇām /
vinihanmi tamaścograṃ mā bhaiḥ sūta stiro bhava //

evamuktvāhamasṛjamastramāyāṃ narādhipa /
mohanīṃ sarvabhūtānāṃ hitāya tridivaukasām //

pīḍyamānāsu māyāsu tāsu tāsvasurottamāḥ /
punarbahuvidhā māyāḥ prākurvannamitaujasaḥ //

punaḥ prakāśamabhavattamasā grasyate punaḥ /
bhavatyadarśano lokaḥ punarapsu nimajjati //

susangṛhītairharibhiḥ prakāśe sati mātaliḥ /
vyacaratsyandanāgryeṇa sangrāme romaharṣaṇe //

tataḥ paryapatannugrā nivātakavacā mayi /
tānahaṃ vivaraṃ dṛṣṭvā prāhaṇvaṃ yamasādanam //

vartamāne tathā yuddhe nivātakavacāntake /
nāpaśyaṃ sahasā sarvāndānavānmāyayā vṛtān //