Mahabharata · Chapter 3.172

tato nivātakavacāḥ sarvevegena bhārata /
abhyadravanmāṃ sahitāḥ pragṛhītāyudhā raṇe //

ācchādya rathapanthānamutkrośanto mahārathāḥ /
avṛtya sarvataste māṃ śaravarṣairavākiran //

tato'pare mahāvīryāḥ śūlapaṭṭasapāṇayaḥ /
śūlāni ca bhuśuṇḍīśca mumucurdānavā mayi //

sumahattumulaṃ varṣaṃ gadāśaktisamākulam /
aniśaṃ sṛjyamānaṃ tairapatanmadrathopari //

anye māmabhyadhāvanta nivātakavacā sudhi /
śitaśastrāyudhā raudrāḥ kālarūpāḥ prahāriṇaḥ //

tānahaṃ vividhairbāṇairvegavadbhirajihmagaiḥ /
gāṇḍīvamuktairabhyaghnamekaikaṃ daśabhirmṛdhe //

te kṛtā vimukhāḥ sarve matprayuktaiḥ śilāśitaiḥ /
tato mātalinā tūrṇaṃ hayāste samprayoditāḥ //

atha mārgānbahūstatra vicerurvātaraṃhasaḥ /
susaṃyatā mātalinā prāmathnanta diteḥsutān //

śataṃ śatāste harayastasminyuktā mahārathe /
tadā mātalinā yathtā vyacarannalpakā iva //

teṣāṃ caraṇapātena rathanemisvanena ca /
mama bāṇanipātaiśca hatāste śataśo'surāḥ //

gatāsavastathaivānye dānavāḥ pāṇḍavarṣabha /
hatasārathayastatra vyakṛṣyanta turangamaiḥ //

te diśo vidiśaḥ sarve pratirudhya prahāriṇaḥ /
abhyaghnanvividhaiḥ śastraistato me vyathitaṃ manaḥ //

tato'haṃ mātalervīryamadbhutaṃ samadarśayam /
aśvāṃstathā vegavato yadayatnādadhārayat //

tato'haṃ laghubhiścitrairastraistānasurānraṇe /
ciccheda sāyudhānrājañchataśo'tha sahasraśaḥ //

evaṃ me caratastatra sarvayatnena śatruhan /
prītimānabhavadvīro mātaliḥ śakrasārathiḥ //

vadhyamānāstatastaistu hayaistena rathena ca /
agamanprakṣayaṃ kecinnyavartanta tathā'pare //

spardhamānā ivāsmābhirnivātakavacā raṇe /
śaravarṣaiḥ śarārtaṃ māṃ mahadbhiḥ pratyavārayan //

śaravegairnihatyāhamastraiḥ śaravighātibhiḥ /
jvaladbhiḥ paramaiḥ śīghraistānavidhyaṃ sahasraśaḥ //

tataḥ sampīḍyamānāste krodhāviṣṭā mahāsurāḥ /
apīḍayanmāṃ sahitāḥ śaktiśūlāsivṛṣṭibhiḥ //

tato'hamastraṃ prāyuñjaṃ gāndharvaṃ nāma bhārata /
dayitaṃ devarājas mādhavaṃ nāma bhārata //

tataḥ khaṅgāṃstriśūlāṃśca tomarāṃśac sahasraśaḥ /
astravīryeṇa śatadhā tairmuktānahamacchidam //

chittvā praharaṇānyeṣāṃ tatastānapi sarvaśaḥ /
pratyavidhyamahaṃ roṣāddaśabhirdaśabhiḥ śaraiḥ //

gāṇḍīvāddhi tadā saṅkhye yathā bhramarapaṅktayaḥ /
niṣpatanti mahābāṇāstanmātalirapūjayat //

teṣāmapi tu bāṇāste bahutvācchalabhā iva /
avākiranmāṃ balavattānahaṃ vyadhamaṃ śaraiḥ //

vadhyamānāstataste tu nivātakavacāḥ punaḥ /
śaravarṣairmahadbhirmāṃ samantātparyavārayan //

śaravegānnihatyāhamastrairastravighātibhiḥ /
jvaladbhiḥ paramaiḥ śīghraistānavidhyaṃ sahasraśaḥ //

teṣāṃ chinnāni gātrāṇi visṛjantisma śoṇitam /
prāvṛṣīvābhivṛṣṭāni śṛṅgāṇyatha dharābhṛtām //

indrāśanisamasparśairvegavadbhirajihmagaiḥ /
madvāṇairvadhyamānāste samudvigrāḥ sma dānavāḥ //

śatadhā bhinnadehāste kṣīṇapraharaṇaujasaḥ / tato nivātakavacā māmayudhyanta māyayā //