Mahabharata · Chapter 3.174

adṛśyamānāste daityā yodhayanti sma māyayā /
adṛśyanāstravīryeṇa tānapyahamayodhayam //

gāṇḍīvamuktā viśikhāḥ samyagastrapracoditāḥ /
acchindannuttamāṅgāni yatrayatra sma te'bhavan //

tato nivātakavacā vadhyamānā mayā yudhi /
saṃhṛtya ramāyāṃ sahasā prāviśanpuramātmanaḥ //

vyapayāteṣu daityeṣu prādurbhūte ca darśane /
apaśyaṃ dānavāṃstatra hatāñśatasahasraśaḥ //

viniṣpiṣṭāni tatraiṣāṃ śastrāṇyābharaṇāni ca /
śataśaḥ sma pradṛśyante gātrāṇi kavacāni ca //

hayānāṃ nāntaraṃ hyāsītpadādvicalituṃ padam /
utpatya sahasā tasthurantarikṣagamāstataḥ //

tato nivātakavacā vyoma sañchādya kevalam /
adṛśyā hyabhyavartanta visṛjantaḥ śiloccayān //

antarbhūmigatāścānye hayānāṃ caraṇānatha /
vyagṛhṇandānavā ghorā rathacakre ca bhārata //

vinigṛhya hayāṃścānye rathaṃ ca mama yudhyataḥ /
sarvato māmavidhyanta sarathaṃ dharaṇīdharaiḥ //

parvatairupacīyadbhiḥ patadbhiśca tathā'paraiḥ /
sa deśo yatravartāmi guheva samapadyata //

parvataiścādyamāno'haṃ nigṛhītaiśca vājibhiḥ /
agacchaṃ paramāmārtiṃ mātalistadalakṣayat //

lakṣayitvā ca māṃ bhītamidaṃ vacanamabravīt /
ārjunārjuna mā bhaistvaṃ vajramastramudīraya //

tato'haṃ tasya tadvākyaṃ śrutvā vajramudīrayam /
devarājas dayitaṃ vajramastraṃ narādhipa //

acalaṃ sthānamāsādya gāṇḍīvamanumantrya ca /
amuñcaṃ vajrasaṃsparśānāyatānniśitāñsarān //

tato māyāś tāḥ sarvā nivātakavacāṃśca tān /
te vajracoditā bāṇā vajrabhūtāḥ rasamāviśan //

te vajravegavihatā dānavāḥ parvatopamāḥ /
itaretaramāśliṣya nyapatanpṛthivītale //

antarbhūmau ca ye'gṛhṇandānavā rathavājinaḥ /
anupraviśya tānvāṇāḥ prāhiṇvanyamasādanam //

hatairnivātakavacairnirastaiḥ parvatopamaiḥ /
samācchādyata deśaḥ sa vikīrṇairiva parvataiḥ //

na hayānāṃ kṣatiḥ kācinna rathas na mātaleḥ /
mama cādṛśyata tadā tadadbhutamivābhavat //

tato māṃ prahasanrājanmātaliḥ pratyabhāṣata /
naitadarjuna deveṣu tvayi vīryaṃ yadīkṣyate //

hateṣvasurasaṅgheṣu dārāsteṣāṃ tu sarvaśaḥ /
prākrośannagare tasminyathā śaradi lakṣmaṇāḥ //

tato mātalinā sārdhamahaṃ tatpuramabhyayām /
trāsayanrathaghoṣeṇa nivātakavacastriyaḥ //

tāndṛṣṭvā daśasāhasrānmayūrasadṛśānhayān /
rathaṃ ca ravisankāśaṃ prādravangaṇaśaḥ striyaḥ //

tābhirābharaṇaiḥ śabdastrāsitābhiḥ samīritaḥ /
śilānāmiva śaileṣu patantīnāmabhūttadā //

vitrastā daityanāryastāḥ svāni veśmānyathāviśan /
bahuratnavicitrāṇi śātakumbhamayāni ca //

tadadbhutākāramahaṃ dṛṣṭvā nagaramuttamam /
viśiṣṭaṃ devanagarādapṛcchaṃ mātaliṃ tataḥ //

idamevaṃvidhaṃ kasmāddevatā na viśantyuta /
purandarapurāddhīdaṃ viśiṣṭamiti lakṣaye //
mātaliruvāca /

āsīdidaṃ purā pārtha devarājasya naḥ puram /
tato nivātakavacairitaḥ pracyāvitāḥ surāḥ //

tapastaptvā mahattīvraṃ prasādya ca pitāmaham /
idaṃ vṛtaṃ nivāsāya devebhyaścābhayaṃ yudhi //

tataḥ śakreṇa bhagavānsvayambhūrabhicoditaḥ /
vidhattāṃ bhagavānatretyātmano hitakāmyayā //

tata ukto bhagavatā diṣṭamatreti bhārata /
bhavitāntastvamapyeṣāṃ dehenānyena vṛtrahan //

tata eṣāṃ vadhārthāya śakro'strāṇi dadau tava /
na hi śakyāḥ surairhantuṃ ya ete nihatāstvayā //

kālasya pariṇāmena tatastvamiha bhārata /
eṣāmantakaraḥ prāptastattvayā ca kṛtaṃ tathā //

dānavānāṃ vināśārthaṃ mahāstrāṇāṃ mahadbalam /
grāhitastvaṃ mahendreṇa puruṣendra taduttamam //
urjuna uvāca /

tataḥ praśāmya nagaraṃ dānavāṃśca nihatya tān / punarmātalinā sārdhamagamaṃ devasadma tat //