Mahabharata · Chapter 3.170

kṛtāstramativiśvastamatha māṃ harivāhanaḥ /
rasaṃspṛśya mūrdhni pāṇibyāmidaṃ vacanamabravīt //

na tvamadya yudhā jetuṃ śakyaḥ suragaṇairapi /
kiṃ punarmānuṣe loke mānuṣairakṛtātmabhiḥ //

aprameyo'pradhṛṣyaśca yuddheṣvapratimastathā /
ajeyastvaṃ hi saṅgrāme sarvairapisurāsuraiḥ //

athābravītpunardevaḥ samprahṛṣṭatanūruhaḥ /
astrayuddhe samo vīra na te kaścidbhaviṣyati //

apramattaḥ sadā dakṣaḥ satyavādī jitendriyaḥ /
brahmaṇyaścāstraviccāsi śūraścāsi kurūdvaha //

astrāṇi samavāptāni tvayā daśa ca pañca ca /
pañcabhirvidhibhiḥ pārtha vidyate na tvayā samaḥ //

prayogamupasaṃhāramāvṛttiṃ ca dhanañjaya /
prāyaścittaṃ ca vettha tvaṃ pratīghātaṃ ca sarvaśaḥ //

tava gurvarthakālo'yaṃ samutpannaḥ parantapa /
pratijānīṣva taṃ kartuṃ tato vetsyāmyahaṃ param //

tato'hamabravaṃ rājandevarājamidaṃ vacaḥ /
viṣahyaṃ yanmayā kartuṃ kṛtameva nibodha tat //

tato māmabravīdrājanprahasanbalavṛtrahā /
nāvipahyaṃ tavādyāsti triṣu lokeṣu kiñcana //

nivātakavacā nāma dānavā mama śatravaḥ /
samudrakukṣimāśritya durge prativasantyuta //

tisraḥ koṭyaḥ samākhyātāstulyarūpabalaprabhāḥ /
tāṃstatrajahi kaunteya gurvarthaste bhaviṣyati //

tato mātalisaṃyuktaṃ mayūrasamaromabhiḥ /
hayairupetaṃ prādānme rathaṃ divyaṃ mahāprabham //

babandha caiva me mūrdhni kirīṭamidamuttamam /
svarūpasadṛśaṃ caiva prādādaṅgavibhūṣaṇam //

abhedyaṃ kavacaṃ cedaṃ sparsarūpavaduttamam /
ajarāṃ jyāmimāṃ cāpi gāṇḍīve samayojayat //

tataḥ prāyāmahaṃ tena syandanena virājatā /
yenājayaddevapatirbaliṃ vairocaniṃ purā //

tato devāḥ sarva eva tena ghoṣeṇa bodhitāḥ /
manvānā devarājaṃ māṃ samājagmurviśāmpate //

dṛṣṭvā ca māmapṛcchanta kiṃ kariṣyasi phalguna /
tānabruvaṃ yathābhūtamidaṃ kartā'smi saṃyuge //

nivātakavacānāṃ tu prasthitaṃ māṃ tadhaipiṇam /
nibodhata mahābhāgā śivaṃ cāśāsta me'naghāḥ //

tato vāgbhiḥ praśastābhistridaśāḥ pṛthivīpate /
tuṣṭuvurmāṃ prasannāste yathā devaṃ purandaram //

rathenānena maghavā jitavāñśambaraṃ yudhi /
namuciṃ balavṛtrau ca prahlādanarakāvapi //

bahūni ca sahasrāṇi prayutānyarbudānyapi /
rathenānena daityānāṃ jitavānmaghavā yudhi //

nvamapyanena kaunteya nibātakavacānraṇe /
vijetā yudhi vikramya pureva maghavā vaśī //

ayañca śaṅkhapravaro yena jetāsi dānavān /
anena vijitā lokā śakreṇāpi mahātmanā //

pradīyamānaṃ devaistaṃ devadattaṃ jalodbhavam /
pratyagṛhṇāṃ jayāyainaṃ stūyamānastadā'maraiḥ //

sa śaṅkhī kavacī vāṇī pragṛhītaśarāsanaḥ / dānavālayamatyugraṃ prayātosmi yuyutsayā //