Mahabharata · Chapter 3.169

tatastāmavasaṃ prīto rajanīṃ tatra bhārata /
prasādāddevadevasyatryambakasya mahātmanaḥ //

vyuṣito rajanīṃ cāhankṛtvāpaurvāhṇikīḥ kriyāḥ /
apaśyaṃ taṃ dvijaśreṣṭhaṃ dṛṣṭavānasmi yaṃ purā //

tasmai cāhaṃ yathāvṛttaṃ sarvameva nyavedayam /
bhagavantaṃ mahādevaṃ sametosmīti bhārata //

sa māmuvāca rājendra prīyamāṇo dvijottamaḥ /
dṛṣṭastvayā mahādevo yathā nānyena kenacit //

sametaṃ lokapālaistu sarvairvaivasvatādibhiḥ /
draṣṭāsyanagha devendraṃ sa ca te'strāṇi dāsyati //

evamuktvā sa māṃ rājannāśliṣya ca punaḥ punaḥ /
agacchatsa yathākāmaṃ brāhmaṇaḥ sūryasannibhaḥ //

athāparāhṇe tasyāhnaḥ prāvātpuṇyaḥ samīraṇaḥ /
punarnavamimaṃ lokaṃ kurvanniva sapatnahan //

divyāni caiva mālyāni sugandhīni navāni ca /
śaiśirasya gire pāde prādurāsansamīpataḥ //

vāditrāṇica divyāni sughoṣāṇi samantataḥ /
stutayaścendrasaṃyuktā aśrūyanta manoharāḥ //

gaṇāścāpsarasāṃ tatragandharvāṇāṃ tathaiva ca /
purastāddevadevasya jagurgītāni sarvaśaḥ //

marutāṃ ca gaṇāstatra devayānairupāgaman /
mahendrānucarā ye ca devasadmanivāsinaḥ //

tato marutvānaharibhiryuktairvāhaiḥ svalankṛtaiḥ /
śacīsahāyastatrāyātsaha sarvaistadā'maraiḥ //

etasminnaiva kāle tu kubero naravāhanaḥ /
darśayāmāsa māṃ rājam̐llakṣmyā paramayā yutaḥ //

dakṣiṇasyāṃ diśi yamaṃ pratyapaśyaṃ vyasthitam /
varuṇaṃ devarājaṃ ca yathāsthānamavasthitam //

te māmūcurmahārāja sāntvayitvā surarṣabhāḥ /
savyasācinnirīkṣāsmām̐llokapālānavasthitān //

surakāryārthasiddhyarthaṃ dṛṣṭavānasi śankaram /
asmatto'pi gṛhāṇa tvamastrāṇīti samantataḥ //

tato'haṃ prayato bhūtvā praṇipatya surarṣabhān /
pratyagṛhṇāṃ tadā'strāṇi mahānti vividhāni ca //

gṛhītāstrastato devairanujñātosmi bhārata /
atha devā yayuḥ sarveyathāgatamarindama //

maghavānapi māṃ devo rathamāropya suprabham /
uvāca bhagavānvākyaṃ smayanniva mahāyaśāḥ //

puraivāgamanādasmādvedāhaṃ tvāṃ dhanañjaya /
ataḥ paraṃ tvahaṃ vai tvāṃ darśaye bharatraṣabha //

tvayā hi tīrtheṣu purā samāplāvaḥ kṛto'sakṛt /
tapaścedaṃ mahattptaṃ svargaṃ gantāsi pāṇḍava //

bhūyaścaiva ca taptavyaṃ tapaścaraṇamuttamam /
duścaraṃ ghoramastrāṇāṃ tapobalakaraṃ tava //

svargastvavaśyaṃ gantavyastvayā śatruniṣūdana /
mātalirmanniyogāttvāṃ tridivaṃ prāpayiṣyati //

viditastvaṃhi devānāṃ munīnāṃ ca mahātmanām /
ihasthaḥ pāṇḍavaśreṣṭha tapaḥ kurvansuduṣkaram //

tato'hamabruvaṃ śakraṃ prasīda bhagavanmama /
ācāryaṃ varaye'haṃ tvāmastrārthaṃ tridaśeśvara //
indra uvāca /

krūrakarmā'stravittāta bhaviṣyasi parantapa /
yadarthamastrāṇīpsustvaṃ taṃ kāmaṃ pāṇḍavāpnuhi //

tato'hamabruvaṃ nāhaṃ divyānyastrāṇi śatruhan /
mānuṣeṣu prayokṣyāmi vinā'strapratighātanāt //

tāni divyāni me'strāṇi prayaccha vibudhādhipa /
lekāṃścāstrajitānpaścāllabheyaṃ surapuṅgava //
indra uvāca /

parīkṣārthaṃ mayaitatte vākyamuktaṃ dhanañjaya /
mamātmajasya vacanaṃ sūpapannamidaṃ tava //

śikṣa me bhavanaṃ gatvāsarvāṇyastrāṇi bhārata /
vāyoragnervasubhyo'pi varuṇātsamarudgaṇāt //

sādhyaṃ paitāmahaṃ caiva gandharvoragarakṣasām /
vaiṣṇavāni ca sarvāṇi nairṛtāni tathaiva ca //

madgatāni ca jānīhi sarvāstrāṇi kurūdvaha /
evamuktvā tu māṃ śakrastatraivāntaradhīyata //

athāpaśyaṃ hariyujaṃ rathamaindramupasthitam /
divyaṃ māyāmayaṃ puṇyaṃ yattaṃ mātalinā nṛpa //

lokapāleṣu yāteṣu māmuvācātha mātaliḥ /
draṣṭumicchati śakrastvāṃ devarājo mahādyute //

saṃsiddhastvaṃ mahābāho kuru kāryamanuttamam /
paśya puṇyakṛtāṃ lokānsaśarīro divaṃ vraja //

devarājaḥ sahasrākṣastvāṃ didṛkṣati bhārata /
ityukto'haṃ mātalinā girimāmantrya śaiśiram //

pradakṣiṇamupāvṛtya samārohaṃ rathottamam /
codayāmāsa sa hayānmanomārutaraṃhasaḥ //

[mātalirhayatattvajño yathāvadbhūridakṣiṇaḥ / avaikṣata ca me vakrṛṃstitasyātha sasārathiḥ /
tathā bhrānte rathe rājanvismitaścedamabravīt //

atyadbhutamidaṃ tvadyavicitraṃ pratibhāti me / yadāsthito rathaṃ divyaṃ padānna calitaḥ padam // ]

devarājo'pihi mayā nityamatropalakṣitaḥ /
vicalanprathamotpāte hayānāṃ bharatarṣabha //

tvaṃ punaḥ sthita evātrarathe bhrānte kurūdvaha /
atiśakramidaṃ sarvaṃ taveti pratibhāti me //

ityuktvā'kāśamāviśya mātalirvibudhālayān /
darśayāmāsa me rājanvimānāni ca bhārata //

[sa ratho haribhiryukto hyūrdhvamācakrame tataḥ /
ṛṣayo devatāścaiva pūjayanti narottama //

tataḥ kāmagamām̐llokānapaśyaṃ vai surarṣiṇām / gandharvāpsarasāṃ caiva prabhāvamamitaujasām // ]

nandanādīni devānāṃ vanānyupavanāni ca /
darśayāmāsa me śīghraṃ mātaliḥ śakrasārathiḥ //

tataḥ śakrasya bhavanamapaśyabhamarāvatīm /
divyaiḥ kāmaphalairvṛkṣai ratnaiśca samalankṛtām //

na tāṃ bhāsayate sūryo na śītoṣṇe na ca klamaḥ /
na bādhate tatrarajastatrāsti na jarā nṛpa //

na tatraśoko dainyaṃ vā vaivarṇyaṃ copalakṣyate / divaukasāṃ mahārāja na glānirarimardana /
na krodhalobhau tatrāstāmaśubaṃ vā viśāmpate //

nityaṃ tuṣṭāś te rājanprāṇinaḥ suraveśmani /
nityapuṣpaphalāstatra pādapā haritacchadāḥ //

puṣkariṇyaśca vividhāḥ padmasaugandhikāyutāḥ /
śītastatravavau vāyuḥ sugandho vījate śubhaḥ //

sarvaratnavicitrā ca bhūmiḥ puṣpavibhūṣitā / mṛgadvijāśca bahavo rucirā madhurasvarāḥ /
vimānagāminaścātradṛśyante bahavo'marāḥ //

tato'paśyaṃ vasūnrudrānsādhyāṃśca samarudgaṇān /
ādityānaśvinau caiva tānsarvānpratyapūjayam //

te māṃ vīryeṇa yaśasā tejasā ca balena ca /
astraiścāpyanvajānanta sangrāme vijayena ca //

praviśya tāṃ purīṃ divyāṃ devagandharvapūjitām /
devarājaṃ sahasrākṣamupātiṣṭhaṃ kṛtāñjaliḥ //

dadāvardhāsanaṃ prītaḥ śakro me dadatāṃvaraḥ /
bahumānācca gātrāṇi pasparśa mama vāsavaḥ //

tatrāhaṃ devagandharvaiḥ sahito bhūridakṣiṇaiḥ /
astrārtamavasaṃ svarge śikṣāṇo'strāṇi bhārata //

viśvāvasośca vai putraścitraseno'bhavatsakhā /
sa ca gāndharvamakhilaṃ grāhayāmāsa māṃ nṛpa //

tatrāhamavasaṃ rājangṛhītāstraḥ supūjitaḥ /
sukhaṃ śakras bhavane sarvakāmasamanvitaḥ //

śṛṇvanvai gītaśabdaṃ ca tūryaśabdaṃ ca puṣkalam /
paśyaṃścāpsarasaḥ śreṣṭhā nṛtyantīrbharatarṣabha //

tatsarvamanavajñāya tathyaṃ vijñāya bhārata /
atyarthaṃ pratigṛhyāhamastreṣveva vyavasthitaḥ //

tato'tuṣyatsahasrākṣastena kāmena me vibhuḥ / evaṃ me vasato rājanneṣa kālo'tyagāddivi //