Mahabharata · Chapter 3.17

evamuktvā raukmiṇeyo yādavānyādavarṣabha /
daṃśitairharibhiryuktaṃ rathamāsthāya kāñcanam //

ucchritya makaraṃ ketuṃ vyāttānanamalaṅkṛtam /
utpatadbhirivākāśaṃ tairhayairanvayātparān //

vikṣipannādayaṃścāpi dhanuḥ śreṣṭhaṃ mahābalaiḥ /
tūṇakhaṅgadharaḥ śūro baddhagodhāṅgulitravān //

savidyucchuritaṃ cāpaṃ viharanvai talāttalam /
mohayāmāsa daiteyānsarvānsaubhanivāsinaḥ //

tasya vikṣipataścāpaṃ sandadhānasya cāsakṛt /
nāntaraṃ dadṛśe kaścinnaghnitaḥ śātravānraṇe //

mukhasya varṇo na vikalpate'sya celuśca gātrāṇi na cāpi tasya /
siṃhonnataṃ cāpyabhigarjato'sya śuśrāva loko'dbhutavīryamagryam //

jalecaraḥ kāñcanayaṣṭisaṃstho vyāttānanaḥ śatrubalapramāthī /
vitrāsayanrājati vāhamukhye sālvasya senāpramukhe dhvajāgryaḥ //

tatastūrṇaṃ viniṣpatya pradyumnaḥ śatrukarśanaḥ /
sālvamevābhidudrāva vidhitsuḥ kalahaṃ nṛpa //

abhiyānaṃ tu vīreṇa pradyumnena mahāraṇe /
nāmarṣayata sankrudvaḥ sālvaḥ kurukulodvaha //

saroṣamahamatto vai kāmagādavaruhya ca /
pradyumnaṃ yodhayāmāsa sālvaḥ parapurañjayaḥ //

tayoḥ sutumulaṃ yuddhaṃ sālvavṛṣṇipravīrayoḥ /
sametā dadṛśurlokā balivāsavayoriva //

tasya māyāmayo vīra ratho hemapariṣkṛtaḥ /
sapatākaḥ sadhvajaśca sānukarṣaḥ sa tūṇavān //

sa taṃ rathavaraṃ śrīmānsamāruhya kila prabho /
mumoca bāṇānkaukhya pradyumnāya mahābalaḥ //

tato bāṇamayaṃ varṣaṃ vyasṛjattarasā raṇe /
pradyumno bhujavegena sālvaṃ sammohayanniva //

sa tairabhihataḥ saṅkhye nāmaryata saubharāṭ /
śarāndīptāgnisankāśānmumoca tanaye mama //

tamāpatantaṃ bāṇaudhaṃ sa ciccheda mahābalaḥ /
tataścānyāñśarāndīptānpracikṣepa sute mama //

sa sālvabāṇai rājendra viddho rukmiṇinandanaḥ /
mumoca bāṇaṃ tvarito marmabhedinamāhave //

tasya varma vibhidyāśu sa bāṇo matsuteritaḥ /
viveśa hṛdayaṃ patrī sa papāta bhṛśahataḥ //

tasminnipatite vīre sālvarāje vicetasi /
sampradrabandānavendrā dārayanto vasundharām //

hāhākṛtamabhūtsainyaṃ sālvasya pṛthivīpate /
naṣṭasañjñe nipatite tadā saubhapatau nṛpe //

tata utthāya rājendra pratilabhya ca cetanām /
mumoca bāṇānsahasā pradyumnāya mahābalaḥ //

tena bāṇena mahatā pradyumnaḥ samare sthitaḥ /
jatrudeśe bhṛśaṃ viddho vyathito dadṛśe tadā //

taṃ sa viddhvā mahārāja sālvo rukmiṇinandanam /
nanāda siṃhanādaṃ vai nādenāpūrayanmahīm //

tato mohaṃ samāpanne tanaye mama bhārata /
mumoca bāṇāṃstvaritaḥ punaranyāndurātmavān //

sa tairabhihato bāṇairbahubhistena mohitaḥ / niśceṣṭaḥ kauravaśreṣṭha pradyumno'bhūdraṇājire //