Mahabharata · Chapter 3.16

tāṃ tūpayāto rājendra sālvaḥ saubhapatistadā /
prabhūtanaranāgena balenopaviveśa ha //

same niviṣṭāṃ sā senā prabhūtasalilāśaye /
caturaṅgabalopetā sālvarājābhipālitā //

varjayitvā śmaśānāni devatāyatanāni ca /
valmīkāṃścaiva caityāṃśca sanniviṣṭamabhūdbalam //

anīkānāṃ vibhāgena panthānaḥ sukṛtāstathā /
prathamā navamāścaiva sālvasya śibire nṛpa //

sarvāyudhasamopetaṃ sarvaśastraviśāradam /
rathanāgāśvakalilaṃ padātijanasankulam //

tuṣṭapuṣṭabalopetaṃ vīralakṣaṇalakṣitam /
vicitradhvajasannāhaṃ vicitrarathakārmukam //

sanniveśya ca kauravya dvārakāyāṃ nararṣabha /
abhisārayāmāsa tadā vegaina patagendravat //

tadāpatantaṃ sandṛśya balaṃ sālvapatestadā /
niryāya yodhayāmāsuḥ kumārā vṛṣṇinandanāḥ //

asahanto'bhiyānaṃ tatsālvarājasya kaurava /
cārudeṣṇaśca sāmbaśca pradyumnaśca ramahārathaḥ //

te rathairdaṃśitāḥ sarvevicitrābharaṇadhvajāḥ /
saṃsaktāḥ sālvarājasya bahubhiryodhapuṅgavaiḥ //

gṛhītvā kārmukaṃ sāmbaḥ sālvasya sacivaṃ raṇe /
yīdhayāmāsa saṃhṛṣṭaḥ kṣemadhūrtiṃ camūpatim //

tasya bāṇamayaṃ varṣaṃ jāmbavatyāḥ suto mahat /
mumoca bharataśreṣṭha yathāvarṣaṃ sahasradṛk //

tadbāṇavarṣaṃ tumulaṃ viṣehe sa camūpatiḥ /
kṣemadhūrtirmahārāja himavāniva niścalaḥ //

tataḥ sāmbāya rājendra kṣemadhūrtirapi svayam /
mumoca māyāvihitaṃ śarajālaṃ mahattaram //

tato māyāmayaṃ jālaṃ māyayaiva vidāryasaḥ /
sāmbaḥ śarasahasreṇa rathamasyābhyavarṣata //

tataḥ sa viddhaḥ sāmbena kṣemadhūrtiścamūpatiḥ /
apāyājjavanairaśvaiḥ sāmbabāṇaprapīḍitaḥ //

tasminvipradrute śare sālvasyātha camūpatau /
vegavānnāma daiteyaḥ sutaṃ me'bhyadravadbalī //

abhipannastu rājendra sāmbo vṛṣṇikulodvahaḥ /
vegaṃ vegavato rājaṃstasthau vīro vidhārayan //

sa vegavati kaunteya sāmbo vegavatīṃ gadām /
cikṣepa tarasā vīro vyāviddhyansatyavikramaḥ //

tayā tvabhihato rājanvegavānnyapatadbhuvi /
vātarugṇaṃ iva kṣuṇṇo jīrṇamūlovanaspatiḥ //

tasminnipatite vīre gadārugṇe mahāsure /
praviśya mahatīṃ senāṃ yodhayāmāsa me sutaḥ //

cārudeṣṇena saṃsakto vivindhyo nāma dānavaḥ /
mahārathaḥ samājñāto mahārāja mahādhanuḥ //

tataḥ sutumulaṃ yuddhaṃ cārudeṣṇavivindhyayoḥ /
vṛtravāsavayo rājanyathāpūrvaṃ tathā'bhavat //

anyonyasyābhisankruddhāvanyonyaṃ jaghnatuḥ śaraiḥ /
vinadantau mahārāja siṃhāviva mahābalau //

raukmiṇeyastato bāṇamagnyarkopamavarcasam /
abhimantrya mahāstreṇa sandadhe śatrunāśanam //

sa vivindhyāya sakrodhaḥ samāhūya mahārathaḥ /
cikṣepa me suto rājansa gatāsurathāpatat //

vivindhyaṃ nihṛtaṃ dṛṣṭvā tāṃ ca vikṣobhitāṃ camūm /
kāmagena sa saubhena sālvaḥ punarupāgamat //

tato vyākulitaṃ sarvaṃ dvārakāvāsi tadbalam /
dṛṣṭvā sālvaṃ mahābāho saubhasthaṃ pṛthivīgatam //

tato niryāya kauravya avasthāpya ca tadbalam /
ānartānāṃ mahārāja pradyumno vākyamabravīt //

sarve bhavantastiṣṭhantu sarve paśyantu māṃ yudhi /
nivārayantaṃ sangrāme balātsaubhaṃ sarājakam //

ayaṃ saubhapateḥ senāmāyasairbhujagairiva /
dhanurbhujavinirmuktairnāśayamyadya yādavāḥ //

āśvasadhvaṃ na bhīḥ kāryā saubharāḍadya naśyati /
mayā'bhipanno duṣṭātmā sasaubho vinaśiṣyati //

evaṃ bruvati saṃhṛṣṭe pradyumne pāṇḍunandana / dhiṣṭitaṃ tadbalaṃ dvāri yuyudhe ca yathāsukham //