Mahabharata · Chapter 3.168

yathāgataṃ gate śakre bhrātṛbhiḥ saha sangataḥ /
kṛṣṇayā caiva bībhatsurdharmarājamapūjayat //

abhivādayamānaṃ taṃ mūrdhnyupāghrāya pāṇḍavam /
harṣagadgadayā vācā prahṛṣṭo'rjunamabravīt //

kathamarjuna kālo'yaṃ svarge ravyatigatastava /
kathaṃ cāstrāṇyavāptāni devarājaśca toṣitaḥ //

samyagvā te gṛhītāni kaccidastrāṇi pāṇḍava /
kaccitsurādhipaḥ prīto rudraścāstrāṇyadāttava //

yathā dṛṣṭaśca te śakro bhagavānvā pinākadhṛt /
yathaivāstrāṇyavāptāni yathaivārādhitāśca te //

yathoktavāṃstvāṃ bhagavāñśatakraturarindama /
kṛtapriyastvayā'smīti tasya te kiṃ priyaṃ kṛtam //

etadicchāmyahaṃ śrotuṃ vistareṇa mahādyute /
yathā tuṣṭo mahādevo devarājastathā'nagha //

yaccāpi vajrapāṇestu priyaṃ kṛtamarindama /
etadākhyāhi me sarvamakhilena dhanañjaya //
arjuna uvāca /

śṛṇu hanta mahārāja vidhinā yena dṛṣṭavān /
śatakratumahaṃ devaṃ bhagavantaṃ ca śankaram //

vidyāmadhītya tāṃ rājaṃstvayoktāmarimardana /
bhavatā ca samādiṣṭastapase prasthito vanam //

bhṛgutundamatho gatvā kāmyakādāsthitastapaḥ /
ekarātroṣitaḥ kañcidapaśyaṃ brāhmaṇaṃ pathi //

sa māmapṛcchatkaunteya kvāsi gantā bravīhi me /
tasmā avitathaṃ sarvamabravaṃ kurunandana //

sa tathyaṃ mama tacchrutvā brāhmaṇo rājasattama /
apūjayata māṃ rājanprītimāṃścābhavanmayi //

tato māmabravītprītastapa ātiṣṭha bhārata /
tapasvī nacireṇa tvaṃ drakṣyase vibudhādhiṣam //

tato'haṃ vacanāttasya girimāruhya śaiśiram /
tapo'tapyaṃ mahārāja māsaṃ mūlaphalāśanaḥ //

dvitīyaścāpi me māso jalaṃ bhakṣayato gataḥ /
nirāhārastṛtīye'tha māse pāṇḍavanandana //

ūrdhvabāhuścaturthaṃ tu māsamasmi sthitastadā /
na ca me hīyate prāṇastadadbhutamivābhavat //

pañcame tvatha samprāpte prathame divase gate /
varāhasaṃsthitaṃ bhūtaṃ matsamīpaṃ samāgamat //

nighnanprothena pṛthivīṃ vilikhaṃścaraṇairapi /
sammārjañjaṭhareṇorvīṃ vivartaṃśca muhurmuhuḥ //

anu tasyāparaṃ bhūtaṃ mahatkairātasaṃsthitam /
dhanurbāṇāsimatprāptaṃ strīgaṇānugataṃ tadā //

tato'haṃ dhanurādāya tathā'kṣayye maheṣudhī /
atāḍayaṃ śareṇātha tadbhūtaṃ romaharṣaṇam //

yupattaṃ kirātastu vikṛṣya balavaddhanuḥ /
abhyājaghne dṛḍhataraṃ kampayanniva medinīm //

satu māmabravīdrājanmama pūrvaparigrahaḥ /
mṛgayādharmamutsṛjya kimarthaṃ tāḍitastvayā //

eṣa te niśitairbāṇairdarpaṃ hanmi sthiro bhava /
sangharṣavānmahākāyastato māmabhyadhāvata //

tato girimivātyarthamāvṛṇonmāṃ mahāśaraiḥ /
taṃ cāhaṃ śaravarṣeṇa mahatā samavākiram //

tataḥ śarairdīptamukhairyantritairanu yantritaiḥ /
pratyavidhyamahaṃ taṃ tu vajrairiva śiloccayam //

tasya tacchatadhā rūpamabhavacca sahasradhā /
tāni cāsya śarīrāṇi śarairahamatāḍayam //

punastāni śarīrāṇi ekībhūtāni bhārata /
adṛśyanta mahārāja tānyahaṃ vyadhamaṃ punaḥ //

aṇurbṛhacchirā bhūtvā bṛhaccāṇuśirāḥ punaḥ /
ekībhūtastadā rājanso'bhyavartata māṃ yudhi //

yadā'bhibhavituṃ bāṇairna ca śaknomi taṃ raṇe /
tato mahāstramātiṣṭhaṃ vāyavyaṃ bharatarṣabha //

na cainamaśakaṃ hantuṃ tadadbhutamivābhavat /
tasminpratihate cāstre vismayo me mahānabhūt //

tatrāpi ca mahārāja saviśeṣamahaṃ tataḥ /
astrapūgena mahatā raṇe bhūtamavākiram //

sthūṇākarṇamatho jālaṃ śaravarṣaṃ śarolvaṇam /
śalabhāstramaśmavarṣaṃ samāsthāyāhamabhyayām //

jagrāsa prasabhaṃ tāni sarvāṇyastrāṇi me nṛpa /
teṣu sarveṣu jagdheṣu brahmāstraṃ mahadādiśam //

tataḥ prajvalitairbāṇaiḥ sarvataścopacīyata /
upacīyamānaśca tadā mahāstreṇa vyavardhata //

tataḥ santāpitā lokā matprasūtena tejasā /
kṣaṇaena hi diśaḥ svaṃ ca sarvato hi vidīpitaṃ //

tadapyastraṃ mahātejāḥ kṣaṇenaiva vyaśāmayat /
brhamāstre tu hate rājanbhayaṃ māṃ mahadāviśat //

tato'haṃ dhanurādāya tathā'kṣayye maheṣudhī /
sahasā'bhyahanaṃ bhūtaṃ tānyapyastrāṇyabhakṣayat //

eteṣvastreṣu bhūtena bhakṣiteṣvāyudheṣu ca /
mama tas ca bhūtasya bāhuyuddhamavartata //

vyāyāmaṃ muṣṭibhiḥ kṛtvā talairabhisamāhatau /
apāyacca tadbhūtamahaṃ cāpātayaṃ mahīm //

tataḥ prahasya tadbhūtaṃ tatraivāntaradhīyata /
saha strībhirmahārāja paśyato me'dbhutopamam //

mukhyaṃ kṛtvā sa bhagavāṃstato'nyadrūpamātmanaḥ /
divyameva mahārāja varāno'dbhutamambaram //

hitvā kirātarūpaṃ ca bhagavāṃstridaśeśvaraḥ /
svarūpaṃ divyamāsthāya tasyau maheśvaraḥ //

so'dṛśyata tataḥ sākṣādbhagavāngovṛṣadhvajaḥ /
dhanurgṛhyatadā pāṇau bahurūpaḥ pinākadhṛt //

sa māmabhyetya samare tathaivābhimukhaṃ sthitam /
śūlapāṇirathovāca tuṣṭosmīti parantapa //

tatastaddhanurādāya tūṇau cākṣayyasāyakau /
prādānmamaiva bhagavānvarayasveti cābravīt //

tuṣṭosmi tava kaunteya brūhi kiṃ karavāṇi te / manogataṃ vīra yatte tadbrūhi vitarāmyaham /
amaratvamapāhāya brūhi yatte manogatam //

tataḥ prāñḍalirevāhamastreṣu kṛtamānasaḥ /
praṇamya śirasā śarvaṃ tato vacanamādade //

bhagavāname prasannaścedīpsito'yaṃ varo mama /
astrāṇīcchāmyahaṃ jñātuṃ yāni deveṣu kānicit //

dadānītyeva bhagavānabravītryambakaśca mām /
raudramastraṃ madīyaṃ tvāmupasthāsyati pāṇḍava //

pradadau ca mama prītaḥ so'straṃ pāśupataṃ prabhuḥ /
uvāca ca mahādevo dattvā me'straṃ sanātanam //

na prayojyambhavedetanmānuṣeṣu kathañcana /
[jagadvinirdahedevamalpatejasi pātitam //

pīḍyamānana balavatprayojyaṃsyāddhanañjaya /
astrāṇāṃ pratighāte ca sarvathaiva prayojayeḥ //

tato'pratihataṃ divyaṃ sarvāstrapratiṣedhanam /
mūrtimanme sthitaṃ pārśve prasanne govṛṣadhvaje //

utsādanamamitrāṇāṃ parasenānikartanam /
durāsadaṃ duṣprasahaṃ suradānavarākṣasaiḥ //

anujñātastvahaṃ tena tatraiva samupāviśam / prekṣataścaivame devastatraivāntaradhīyata //