Mahabharata · Chapter 3.167

[tato rajanyāṃ vyuṣṭāyāṃ dharmarājaṃ yudhiṣṭhiram / bhrātṛbhiḥ sahitaḥ sarvairavandata dhanañjayaḥ // ]

etasminneva kāle tu sarvavāditraniḥkhanaḥ /
babhūva tumulaḥ śabdastvantarikṣe divaukasām //

rathanemikhanaścaiva ghaṇṭāśabdaśca bhārata /
pṛthagvyālamṛgāṇāṃ ca pakṣiṇāṃ caiva sarvaśaḥ //

ravonmukhāste dadṛśuḥ prīyamāṇāḥ kurūdvaha /
marudbhiranvitaṃ śakramāpatantaṃ vihāyasā //

te samantādanuyayurgandharvāpsarasastathā /
vimānaiḥ sūryasankāśairdevarājamarindamam //

tataḥ sa haribhiryuktaṃ jāmbūnadapariṣkṛtam /
meghanādinamāruhya śriyā paramayā jvalan //

pārthānabhyājapāmāśu devarājaḥ purandaraḥ /
āgatya ca sahasrākṣo rathādavaruroha vai //

taṃ dṛṣṭvaiva mahātmānaṃ dharmarājo yudhiṣṭhiraḥ /
bhrātṛbhiḥ sahitaḥ śrīmāndevarājamupāgamat //

pūjayāmāsa caivātha vidhivadbhūridakṣiṇaḥ /
yathārhamamitātmānaṃ vidhidṛṣṭena karmaṇā //

dhanañjayaśca tejasvī praṇipatya purandaram /
bhṛtyavatpraṇatastasthau devarājasamīpataḥ //

āghrāya taṃ mahātejāḥ kuntīputro yudhiṣṭhiraḥ /
dhanañjayabhiprekṣyavinītaṃ sthitamantike //

jaṭilaṃ devarājasya tapoyuktamakalmaṣam / harṣeṇa mahatā'viṣṭaḥ phalgunasyātha darśanāt /
babhūva paramaprīto devarājaṃ ca pūjayan //

taṃ tathā'dīnamanasaṃ rājānaṃ har,samplutam /
uvāca vacanaṃ dhīmāndharmarājaṃ purandaraḥ //

tvamimāṃ pṛthivīṃ rājanpraśāsiṣyasi pāṇḍava /
svasti prāpnuhi kaunteya kāmyakaṃ punarāśramam //

astrāṇi labdhāni ca pāṇḍavena sarvāṇi mattaḥ prayatena rājan /
kṛtapriyaścāsmi dhanañjayena jetuṃ na śakyastribhireṣa lokaiḥ //

evamuktvā sahasrākṣaḥ kuntīputraṃ yudhiṣṭhiram /
jagāma tridivaṃ hṛṣṭaḥ stūyamāno maharṣibhiḥ //

dhaneśvaragṛhasthānāṃ pāṇḍavānāṃ samāgamam /
śakreṇa ya idaṃ vidvānadhīyīta samāhitaḥ //

saṃvatsaraṃ brahmacārī niyataḥ saṃśitavrataḥ / sa jīveddhi nirābādhaḥ susukhī śaradāṃ śatam //