Mahabharata · Chapter 3.166

tataḥ kadāciddharisamprayuktaṃ mahendravāhaṃ sahasopayātam /
vidyutprabhaṃ prekṣya mahārathānāṃ harṣo'rjunaṃ cintayatāṃ babhūva //

sa dīpyamānaḥ sahasā'ntarikṣaṃ prakāśayanmātalisangṛhītaḥ /
babhau maholkeva ghanāntarasthā śikheva cāgnerjvalitā vidhūmā //

tamāsthitaḥ sandadṛśe kirīṭī sragvī navānyābharaṇāni bibhrat /
dhanañjayo vajradharaprabhāvaḥ śriyā jvalanparvatamājagām //

sa śailamāsādya kirīṭamālī mahendravāhādavaruhya tasmāt /
dhaumyasya pādāvabhivādya pūrva- majātaśatrostadanantaraṃ ca //

vṛkodarasyāpi ca vandya pādau mādrīsutābhyāmabhivāditaśca /
sametya kṛṣṇāṃ parisāntvya caināṃ prahvo'bhavadbhrāturupahvare saḥ //

babhūva teṣāṃ paramaḥ praharṣa- stenāprameyeṇa sametya tatra /
sa cāpi tānprekṣya kirīṭamālī nananda rājānamabhipraśaṃsan //

yamāsthitaḥ sapta jaghāna pūgān diteḥ sutānāṃ namucernihantā /
tamindravāhaṃ samupetya pārthāḥ pradakṣiṇaṃ cakruradīnasatvāḥ //

te mātaleścakruratīva hṛṣṭāḥ satkāramagryaṃ surarājatulyam /
sarvaṃ yathāvacca divaukasaṅghaṃ papracyurenaṃ kururājaputrāḥ //

tānapyasau mātalirabhyananda- tpiteva putrānanuśiṣya pārthān /
yayau rathenāpratimaprabheṇa punaḥ sakāśaṃ tridiveśvarasya //

gate tu tasminvaradevavāhe śakrātmajaḥ sarvaripupramāthī /
sākṣātsahasrākṣa iva pratītaḥ śrīmānsvadehādavamucya jiṣṇuḥ //

śakreṇa dattānidadau mahātmā mahādhanānyuttamarūpavanti /
divākarābhāṇi vibhūṣaṇāni prītaḥ priyāyai sutasomamātre //

tataṛḥ sa teṣāṃ kurupuṅgavānāṃ teṣāṃ ca sūryāgnisamaprabhāṇām /
viprarṣabhāṇāmupaviśya madhye sarvaṃ yathāvatkathayāmbabhūva //

evaṃ mayā'strāṇyupaśikṣitāni śakrācca vāyośca śivācca sākṣāt /
tathaiva śīlena samādhinā ca prītāḥ surā me sahitāḥ sahendrāḥ //

sankṣepato vai sa viśuddhakarmā tebhyaḥ samākhyāya divaḥpraveśam /
mādrīsutābhyāṃ sahitaḥ kirīṭī suṣvāpa tāmāvasatiṃ pratītaḥ //