Mahabharata · Chapter 3.165

tasminnagendre vasatāṃ tu teṣāṃ mahātmanāṃ sadvratamāsthitānām /
ratiḥ pramodaśca babhūva teṣā- mākāṅkṣatāṃ darśanamarjunasya //

tānvīryayuktānsuviśuddhasatvāṃ- stejasvinaḥ satyadhṛtipradhānān /
samprīyamāṇā bahavo'bijagmu- rgandharvasaṅghāśca maharṣayaśca //

taṃ pādapaiḥ puṣpaphalairupetaṃ nagottamaṃ prāpya mahārathānām /
manaḥprasādaḥ paramo babhūva yathā divaṃ prāpya marudgaṇānām //

mayūrahaṃsasvananāditāni puṣpopakīrṇāni mahācalasya /
śṛṅgāṇi sānūni ca paśyamānā gireḥ paraṃ harṣamavāpya tasthuḥ //

sākṣātkubereṇa kṛtāśca tasmi- nnagottame saṃvṛtakūṭagulmāḥ /
kādambakāraṇḍavahaṃsajuṣṭāḥ padmākulāḥ puṣkariṇīrapaśyan //

krīḍāpradeśāṃsca samṛddharūpā- nsavedikāṃste nyavasansuveśān /
maṇiprakīrṇāṃśca manoramāṃśca yathā bhaveyurnadasya rājñaḥ //

anekavarṇaiś sugandhibhiśca mahādrumaiḥ santatamabhrajālaiḥ /
tapaḥpradhānāḥ satataṃ carantaḥ śṛṅgaṃ gireścintayituṃ na śekuḥ //

svatejasā tasya nagottamasya mahauṣadhīnāṃ ca tathā prabhāvāt /
vibhaktarūpaḥ savitā babhūva niśāmukhaṃ prāpya nararṣabhāṇām //

yamāsthitaḥ sthāvarajaṅgamānāṃ vibhāvasurbhāvitā harīśaḥ /
tasyodayaṃ cāstamanaṃ ca vīra- statrasthitāste dadṛśurnṛsiṃhāḥ //

ravestamisrāgamanirgamāṃste tathodayaṃ cāstamanaṃ ca vīrāḥ /
samāvṛtāḥ prekṣya tamonudasya gabhastijālaiḥ pradiśo diśaśca //

svādhyāyavantaḥ satatakriyāśca dharmapradhānāśca śucivratāśca /
satye sthitāstasya mahārathasya satyavratasyāgamanapratīkṣāḥ //

ihaiva harṣo'stu samāgatānāṃ kṣipraṃ kṛtāstreṇa dhanañjayena /
iti bruvantaḥ paramāśipaste pārthāstapoyogaparā babhūvuḥ //

dṛṣṭvā vicitrāṇi girau vanāni kirīṭinaṃ cintayatāmabhīkṣṇam /
babhūva rāvirdivasaśca teṣāṃ saṃvatsareṇaiva samānarūpaḥ //

yadaiva dhaumyānumate mahātmā kṛtvā jaṭāṃ pravrajitaḥ sa jiṣṇuḥ /
tadaiva teṣāṃ nababhūva harṣaḥ kuto ratistadgatamānasānām //

bhrāturniyogāttu yudhiṣṭhirasya vanādasau vāraṇamattagāmī /
yatkāmyakātpravrajitaḥ sa jiṣṇu- stadaiva te śokahatā babhūvuḥ //

tathaiva taṃ cintayatāṃ sitāśva- mastrārthinaṃ vāsavamabhyupetam /
kālaḥ sa kṛcchreṇa mahānatīta- stasminnage bhārata bhāratānām //

[uṣitvā pañcavarṣāṇi sahasrākṣaniveśane /
avāpya divyānyastrāṇi sarvāṇi vibudheśvarāt //

āgneyaṃ vāruṇaṃ saumyaṃ vāyavyamatha vaiṣṇavam /
aindraṃ pāśupataṃ brāhmaṃ pārameṣṭhyaṃ prajāpateḥ //

yamasya dhātuḥ savitustvaṣṭurvaiśravaṇasya caṃ /
tāni prāpya sahasrākṣādabhivādya śatakratum //

anujñātastadā tena kṛtvā cāpi pradakṣiṇam / āgacchadarjunaḥ prītaḥ prahṛṣṭo gandhapādanam //