Mahabharata · Chapter 3.164

tataḥ sūryodaye dhaumyaḥ pāñcālīsahitāṃsca tān /
ārṣṭiṇena sahitaḥ pāṇḍavānabhyavartata //

te'bhivādyārṣṭiṣeṇasya pādau dhaumyasya caiva ha /
tataḥ prāñjalayaḥ sarve brāhmaṇāṃstānapūjayan //

ārṣṭiṣeṇaṃ pariṣvajya putravadbharatarṣabha / dharmarājaṃ spṛśanpāṇau pāṇinā sa mahātapāḥ /
prācīṃ diśamabhiprekṣya maharṣiridamabravīt //

asau sāgaraparyantāṃ bhūmimāvṛtya tiṣṭhati / śailarājo mahārāja mandaro'bhivirājayan /
indravaiśravaṇopetāṃ diśaṃ pāṇḍava rakṣati //

parvataiśca vanāntaiśca kānanaiścaiva śobhitam / etamāhurmahendrasya rājño vaiśravaṇasya ca /
ṛṣayaḥ sarvadharmajñāḥ sarve tāta manīṣiṇaḥ //

ataścodyantamādityamupatiṣṭhanti vai prajāḥ /
ṛṣayaścāpi dharmajñāḥ siddhāḥ sādhyāśca devatāḥ //

yamastu rājā dharmajñaḥ sarvaprāṇabhṛtāṃ prabhuḥ /
pretasatvagatīmetāṃ dakṣiṇāmāśrito diśam //

etatsaṃyamanaṃ puṇyamatīvādbhutadarśanam /
pretarājasya bhavanamṛddhyā paramayā yutam //

yaṃ prāpya savitā rājansatyena pratitiṣṭhati /
astaṃ parvatarājānametamāhurmanīṣiṇaḥ //

evaṃ parvatarājānaṃ samudraṃ ca mahodadhim /
avasanvaruṇo rājā bhūtāni parirakṣati //

udīcīṃ dīpayanneṣa diśaṃ tiṣṭhati kīrtimān /
mahāmerurmahābhāga śivo brahmavidāngatiḥ //

yasminbrahmasadaścaiva bhūtātmā cāvatiṣṭhate /
prajāpatiḥ sṛjansarvaṃ yatkiñcijjaṅgamāgamam //

yānāhurbrahmaṇaḥ putrānmānasāndakṣasaptamān /
teṣāmapi mahāmeruḥ śivaṃ sthānamanāmayam //

atraiva pratitiṣṭhanti punareṣodayanti ca /
sapta devarṣayastāta vasiṣṭhapramukhāstadā //

deśaṃ virajasaṃ paśya meroḥ śikharamuttamam /
yatrātmatṛptairadhyāste devaiḥ saha pitāmahaḥ //

yamāhuḥ sarvabhūtānāṃ prakṛteḥ prakṛtiṃ dhruvam /
anādinidhanaṃ devaṃ prabhuṃ nārāyaṇaṃ param //

brahmaṇaḥ sadanāttasya paraṃ sthānaṃ prakāśate /
devāśca yatnātpaśyanti sarvatejomayaṃ śubham //

atyarkānaladīptaṃ tatsthānaṃ viṣṇormahātmanaḥ /
svayaiva prabhayā rājanduṣprekṣyaṃ devadānavaiḥ //

prācyāṃ nārāyaṇasthānaṃ merāvativirājate //

yatra bhūteśvarastāta sarvaprakṛtirātmabhūḥ /
bhāsayansarvabhūtāni suśriyā'bhivirājate //

nātra brahmarṣayastāta kuta eva maharṣayaḥ /
prāpnuvanti gatiṃ hyetāṃ yatīnāṃ bhāvitātmanām //

na taṃ jyotīmpi sarvāṇi prāpya bhāsanti pāṇḍava /
svayamprabhuracintyātmā tatra hyativirājate //

yatayastatra gacchanti bhaktyā nārāyaṇaṃ harim / pareṇa tapasā yuktā bhāvitāḥ karmabhiḥ śubhaiḥ /
yogasiddhā mahātmānastamomohavivarjitāḥ //

tatra gatvā punarnemaṃ lokamāyānti bhārata /
svayambhuvaṃ mahātmānaṃ devadevaṃ sanātanam //

sthānametanmahābhāva dhruvamakṣayamavyayam /
īśvarasya sadā hyetatpraṇamātra yudhiṣṭhira //

[enaṃ tvaharaharmeruṃ sūryācandramasau dhruvam /
pradakṣiṇamupāvṛtyakurutaḥ kurunandana //

jyotīṃṣi cāpyaśeṣeṇa sarvāṇyanagha sarvataḥ / pariyānti mahārāja girirājaṃ pradakṣiṇam // ]

etaṃ jyotīṃṣi sarvāṇi prakarṣanbhagavānapi /
kurute vitamaskarmā ādityo'bhipradakṣiṇam //

astaṃ prāpya tataḥ sandhyāmatikramya divākaraḥ /
udīcīṃ bhajate kāṣṭhāṃ bahudhā parvasandhiṣu //

sumerumanuvṛttaḥ sa punargacchati pāṇḍava /
prāṅyukhaḥ savitā devaḥ sarvabhūtahite rataḥ //

sa samyagvibhajankālānbahudhā parvasandhiṣu /
tathaiva bhagavānsomo nakṣatraiḥ saha gacchati //

evametaṃ tvatikramya mahāmerumatandritaḥ / somaśca vibhajankālaṃ bahudhā parvasandhiṣu /
bhāsayansarvabhūtāni punargacchati sāgaram //

tathā tamisrahā devo mayūkhairbhāsayañjagat /
mārgametamasambādhamādityaḥ parivartate //

sisṛkṣuḥ śiśirāṇyeva dakṣiṇāṃ bhajate diśam /
tataḥ sarvāṇi bhūtāni kālaṃ śiśiramṛcchati //

sthāvarāṇāṃ ca bhūtānāṃ jaṅgamānāṃ ca tejasā /
tejāṃsi samupādatte nivṛttaḥ sa vibhāvasuḥ //

tataḥ svedaḥ klamastandrī glāniśca bhajate narān /
prāṇibhiḥ satataṃ svapnohyabhīkṣṇaṃ ca nipevyate //

evametamanirdeśyaṃ mārgamāvṛtya bhānumān /
punaḥ sṛjati varṣāṇi bhagavānbhāsayanprajāḥ //

vṛṣṭimārutasantāpaiḥ sukhaiḥ sthāvarajaṅgamān /
vardhayanasumahātejāḥ punaḥ pratinivartate //

evameṣa caranpārtha kālacakramatandritaḥ /
prakarṣansarvabhūtāni savitā parivartate //

santatā gatiretasya naiṣa tiṣṭhati pāṇḍava /
ādāyaiva tu bhūtānāṃ tejo visṛjate punaḥ //

vibhajansarvabhūtānāmāyuḥ karma ca bhārata / ahorātraṃ kalāḥ kāṣṭhāḥ sṛjatyeṣa sadā vibhuḥ //