મહાભારત · અધ્યાય 3.165

તસ્મિન્નગેન્દ્રે વસતાં તુ તેષાં મહાત્મનાં સદ્વ્રતમાસ્થિતાનામ્ ।
રતિઃ પ્રમોદશ્ચ બભૂવ તેષા- માકાઙ્ક્ષતાં દર્શનમર્જુનસ્ય ॥

તાન્વીર્યયુક્તાન્સુવિશુદ્ધસત્વાં- સ્તેજસ્વિનઃ સત્યધૃતિપ્રધાનાન્ ।
સમ્પ્રીયમાણા બહવોઽબિજગ્મુ- ર્ગન્ધર્વસઙ્ઘાશ્ચ મહર્ષયશ્ચ ॥

તં પાદપૈઃ પુષ્પફલૈરુપેતં નગોત્તમં પ્રાપ્ય મહારથાનામ્ ।
મનઃપ્રસાદઃ પરમો બભૂવ યથા દિવં પ્રાપ્ય મરુદ્ગણાનામ્ ॥

મયૂરહંસસ્વનનાદિતાનિ પુષ્પોપકીર્ણાનિ મહાચલસ્ય ।
શૃઙ્ગાણિ સાનૂનિ ચ પશ્યમાના ગિરેઃ પરં હર્ષમવાપ્ય તસ્થુઃ ॥

સાક્ષાત્કુબેરેણ કૃતાશ્ચ તસ્મિ- ન્નગોત્તમે સંવૃતકૂટગુલ્માઃ ।
કાદમ્બકારણ્ડવહંસજુષ્ટાઃ પદ્માકુલાઃ પુષ્કરિણીરપશ્યન્ ॥

ક્રીડાપ્રદેશાંસ્ચ સમૃદ્ધરૂપા- ન્સવેદિકાંસ્તે ન્યવસન્સુવેશાન્ ।
મણિપ્રકીર્ણાંશ્ચ મનોરમાંશ્ચ યથા ભવેયુર્નદસ્ય રાજ્ઞઃ ॥

અનેકવર્ણૈશ્ સુગન્ધિભિશ્ચ મહાદ્રુમૈઃ સન્તતમભ્રજાલૈઃ ।
તપઃપ્રધાનાઃ સતતં ચરન્તઃ શૃઙ્ગં ગિરેશ્ચિન્તયિતું ન શેકુઃ ॥

સ્વતેજસા તસ્ય નગોત્તમસ્ય મહૌષધીનાં ચ તથા પ્રભાવાત્ ।
વિભક્તરૂપઃ સવિતા બભૂવ નિશામુખં પ્રાપ્ય નરર્ષભાણામ્ ॥

યમાસ્થિતઃ સ્થાવરજઙ્ગમાનાં વિભાવસુર્ભાવિતા હરીશઃ ।
તસ્યોદયં ચાસ્તમનં ચ વીર- સ્તત્રસ્થિતાસ્તે દદૃશુર્નૃસિંહાઃ ॥

રવેસ્તમિસ્રાગમનિર્ગમાંસ્તે તથોદયં ચાસ્તમનં ચ વીરાઃ ।
સમાવૃતાઃ પ્રેક્ષ્ય તમોનુદસ્ય ગભસ્તિજાલૈઃ પ્રદિશો દિશશ્ચ ॥

સ્વાધ્યાયવન્તઃ સતતક્રિયાશ્ચ ધર્મપ્રધાનાશ્ચ શુચિવ્રતાશ્ચ ।
સત્યે સ્થિતાસ્તસ્ય મહારથસ્ય સત્યવ્રતસ્યાગમનપ્રતીક્ષાઃ ॥

ઇહૈવ હર્ષોઽસ્તુ સમાગતાનાં ક્ષિપ્રં કૃતાસ્ત્રેણ ધનઞ્જયેન ।
ઇતિ બ્રુવન્તઃ પરમાશિપસ્તે પાર્થાસ્તપોયોગપરા બભૂવુઃ ॥

દૃષ્ટ્વા વિચિત્રાણિ ગિરૌ વનાનિ કિરીટિનં ચિન્તયતામભીક્ષ્ણમ્ ।
બભૂવ રાવિર્દિવસશ્ચ તેષાં સંવત્સરેણૈવ સમાનરૂપઃ ॥

યદૈવ ધૌમ્યાનુમતે મહાત્મા કૃત્વા જટાં પ્રવ્રજિતઃ સ જિષ્ણુઃ ।
તદૈવ તેષાં નબભૂવ હર્ષઃ કુતો રતિસ્તદ્ગતમાનસાનામ્ ॥

ભ્રાતુર્નિયોગાત્તુ યુધિષ્ઠિરસ્ય વનાદસૌ વારણમત્તગામી ।
યત્કામ્યકાત્પ્રવ્રજિતઃ સ જિષ્ણુ- સ્તદૈવ તે શોકહતા બભૂવુઃ ॥

તથૈવ તં ચિન્તયતાં સિતાશ્વ- મસ્ત્રાર્થિનં વાસવમભ્યુપેતમ્ ।
કાલઃ સ કૃચ્છ્રેણ મહાનતીત- સ્તસ્મિન્નગે ભારત ભારતાનામ્ ॥

[ઉષિત્વા પઞ્ચવર્ષાણિ સહસ્રાક્ષનિવેશને ।
અવાપ્ય દિવ્યાન્યસ્ત્રાણિ સર્વાણિ વિબુધેશ્વરાત્ ॥

આગ્નેયં વારુણં સૌમ્યં વાયવ્યમથ વૈષ્ણવમ્ ।
ઐન્દ્રં પાશુપતં બ્રાહ્મં પારમેષ્ઠ્યં પ્રજાપતેઃ ॥

યમસ્ય ધાતુઃ સવિતુસ્ત્વષ્ટુર્વૈશ્રવણસ્ય ચં ।
તાનિ પ્રાપ્ય સહસ્રાક્ષાદભિવાદ્ય શતક્રતુમ્ ॥

અનુજ્ઞાતસ્તદા તેન કૃત્વા ચાપિ પ્રદક્ષિણમ્ । આગચ્છદર્જુનઃ પ્રીતઃ પ્રહૃષ્ટો ગન્ધપાદનમ્ ॥