Mahabharata · Chapter 3.162

śrutvā bahuvidhaiḥ śabdairnādyamānāṃ girerguhām /
ajātaśatruḥ kaunteyo mādrīputrāvubhāvapi //

dhaumyaḥ kṛṣṇā ca viprāśca sarve ca suhṛdastathā /
bhīmasenamapaśyantaḥ sarve vimanaso'bhavan //

draupadīmārṣṭiṣeṇāya sampradhārya mahārathāḥ /
sahitāḥ sāyudhāḥ śūrāḥ śailamāruruhustadā //

tataḥ samprāpya śailāgraṃ vīkṣamāṇā mahārathāḥ /
dadṛśuste maheṣvāsā bhīmasenamarindamam //

sphurataśca mahākāyāngatasatvāṃśca rākṣasān /
mahābalānmahāsatvānbhīmaseneva pātitān //

śuśurataśca mahākāyāngatasatvāṃśca rākṣasān /
mahābalānmahāsatvānbhīmasenena pātitān //

tataste samatikramya pariṣvajya vṛkodaram /
tatropaviviśuḥ pārthāḥ prāptā gatimanuttamām //

taiścaturbhirmaheṣvāsairgiriśṛṅgamaśobhata /
lokapālairmahābhāgairdivaṃ devavarairiva //

kuberasadanaṃ dṛṣṭvā rākṣasāṃśca nipātitān /
bhrātā bhrātaramāsīnamathovāca yudhiṣṭhiraḥ //

sāhasādyadivā mohādbīma pāpamidaṃ kṛtam /
naitatte sadṛśaṃ vīra muneriva mṛṣā vadhāḥ //

rājadviṣṭaṃ na kartavyamiti dharmavido viduḥ /
tridaśānāmidaṃ dviṣṭaṃ bhīmasena tvayā kṛtam //

arthadharmāvanādṛtya yaḥ pāpe kurute manaḥ /
karmaṇāṃ pārtha pāpānāṃ sa phalaṃ vindate dhruvam //

sāhasaṃvata bhadraṃ te devānāmapi cāpriyam /
punarevaṃ na kartavyaṃ mama cedicchasi priyam //
vaiśampāyana uvāca /

evamuktvā sa dharmātmā bhrātā bhrātaramacyutam /
bhīmasenaṃ mahābāhumapradhṛṣyaparākramam //

arthatattvavibhāgajñaḥ kuntīputro yudhiṣṭhiraḥ /
virāma mahātejāstamevārthaṃ vicintayan //

tataste hataśiṣṭā ye bhīmasenena rākṣasāḥ /
sahitāḥ pratyapadyanta kuberasadanaṃ prati //

te javena mahāvegāḥ prāpya vaiśravaṇālayam /
bhīmamārtasvaraṃ cakrurbhīmasenabhayārditāḥ //

nyastaśastrāyudhāḥ klāntāḥ śoṇitāktaparicchadāḥ /
prakīrṇamūrdhajā rājanyakṣādhipatimabruvan //

gadāparighanistriṃsatomaraprāsayodhinaḥ /
rākṣasā nihatāḥ sarve tava devapuraḥsarāḥ //

pramṛdyatarasā śailaṃ mānuṣeṇa dhaneśvara /
ekena nihatāḥ saṅkhye gatāḥ krodhavaśā gaṇāḥ //

pravarā rākṣasendrāṇāṃ yakṣāṇāṃ ca narādhipa /
śerate nihatā deva gatasatvāḥ parāsavaḥ //

bhagnaḥ śailo vayaṃ bhagnā maṇimāṃste sakhā hataḥ /
mānuṣeṇaṃ kṛtaṃ karma vidhatsva yadanantaram //

sa tacchrutvā tu sankruddhaḥ sarvayakṣagaṇādhipaḥ /
kopasaṃraktanayanaḥ kathamityabravīdvacaḥ //

dvitīyamaparādhyantaṃ bhīmaṃ śrutvā dhaneśvaraḥ /
cukrodha yakṣādhipatiryujyatāmiti cābravīt //

athābhraghanasankāśaṃ girikūṭamivocchritam /
rathaṃ saṃyojayāmāsurgarndhaivarhemamālibhiḥ //

tasya sarvaguṇopetā vimalākṣā hayottamāḥ / tejobalaguṇopetā nānāratnavibhūṣitāḥ /
śobhamānā rathe yuktāstariṣyanta ivāśugāḥ //

tataste tu mahāyakṣāḥ kruddhaṃ dṛṣṭvā dhaneśvaram /
harṣayāmāsuranyonyamiṅgitairvijayāvahaiḥ //

sa tamāsthāya bhagavānrājarājo mahāratham /
prayayau devaganadharvaiḥ stūyamāno mahādyutiḥ //

taṃ prayāntaṃ mahātmānaṃ sarve yakṣā dhanādhipam /
anujagmurmahātmānaṃ dhanadaṃ ghoradarśanāḥ //

raktākṣā hemasankāśā mahākāyā mahābalāḥ /
sāyudhā baddhanistriṃśā yakṣā bahuśatāyudhāḥ //

te javena mahāvegāḥ plavamānā vihāyasā /
gandhamādanamājagmuḥ prakarṣanta ivāmbaram //

tatkesarimahājālaṃ dhanādhipatipālitam /
ramyaṃ caiva gireḥ śṛṅgamāseduryatrapāṇḍavāḥ //

kuberaṃ ca mahātmānaṃ yakṣarakṣogaṇāvṛtam /
dadṛśurhṛṣṭaromāṇaḥ pāṇḍavāḥ priyadarśanam //

kuberastu mahāsatvānpāṇḍoḥ putrānmahārathān /
āttakārmukanistriṃśāndṛṣṭvā prīto'bhavattadā //

sarve ceme naravyāghrāḥ purandarasamaujasaḥ / devakāryaṃ kariṣyanti hṛdayena tutoṣa ha //

te pakṣiṇa ivāpeturgiriśṛṅgaṃ mahājavāḥ /
tasthusteṣāṃ sakāśe vai dhaneśvarapuraḥsarāḥ //

tatastaṃ hṛṣṭamanasaṃ pāṇḍavānprati bhārata /
samīkṣyayakṣagandharvā nirvikāramavasthitāḥ //

pāṇḍavāśca mahātmānaḥ praṇamya dhanadaṃ prabhum /
nakulaḥ sahadevaś dharmaputraśca dharmavit //

aparāddhamivātmānaṃ manyamānā mahārathāḥ /
tasthuḥ prāñjalayaḥ sarve parivārya dhaneśvaram //

śayyāsanayutaṃ śrīmatpuṣpakaṃ viśvakarmaṇā /
vihitaṃ citraparyantamātiṣṭhata dhanādhipaḥ //

tamāsīnaṃ mahākāyāḥ śaṅkukarṇā mahājavāḥ /
upopaviviśuryakṣā rākṣasāś sahasraśaḥ //

śataśaścāpi gandharvāstathaivāpsarasāṃ gaṇāḥ /
parivāryopatiṣṭhanti yathā devāḥ śatakratum //

kāñjanīṃ śirasā bibhradbhīmasenaḥ srajaṃ śubhām /
bāṇakhaṅgadhanuṣpāṇirudaikṣata dhanādhipam //

na bhīrbhīmasya na glānirvikṣatasyāpi rākṣasaiḥ /
āsīttasyāmavastāyāṃ kuberamapi paśyataḥ //

ādadānaṃ śitānbāṇānyoddhukāmamavasthitam /
dṛṣṭvā bhīmaṃ dharmasutamabravīnnaravāhanaḥ //

vidustvāṃ sarvabhūtāni pārtha bhūtahite ratam /
nirbhayaścāpiśailāgre vasa tvaṃ saha bandhubhiḥ //

na ca manyustvayā kāryo bhīmasenasya pāṇḍava /
kālenaite hatāḥ pūrvaṃ nimittamanujastava //

vrīḍā cātrana kartavyā sāhasaṃ yadidaṃ kṛtam /
dṛṣṭaścāpi suraiḥ pūrvaṃvināśo yakṣarakṣasām //

na bhīmasene kopo me prītosmi bharatarṣabha /
karmaṇā bhīmasenasya mama tuṣṭirabhūtpurā //
vaiśampāyana uvāca /

sa evamuktvā rājānaṃ bhīmasenamabhāṣata /
naitanmanasi me tāta vartate kurusattama //

yadidaṃ sāhasaṃ bhīma kṛṣṇārthe kṛtavānasi /
māmanādṛtya devāṃśca vināśaṃ yakṣarakṣasām //

svabāhubalamāśritya tenāhaṃ prītimāṃstvayi /
śāpādadya vinirmukto ghorādasmādvṛkodara //

ahaṃ pūrvamagastyena kruddhena paramarṣiṇā /
śapto'parādhe kasmiṃścittasyaiṣā niṣkṛtirdhruvam //

dṛṣṭo hi mama sankleśaḥ purā pāṇḍavanandana /
na tavātrāparādhosti kathañcidapi pāṇḍava //
yudhiṣṭhira uvāca /

kathaṃ śaptosi bhagavannagastyena mahātmanā /
śrotumicchāmyahaṃ deva yathaitacchāpakāraṇam //

idaṃ cāścaryabhūtaṃ me yatkrodhāttas dhīmataḥ /
tadaiva tvaṃ na nirdagdhaḥ sabalaḥ sapadānugaḥ //
dhaneśvara uvāca /

devatānāmabhūnmantraḥ kuśāvatyāṃ nareśvara //

vṛtastatrāhamagamaṃ mahāpadmaśataistribhiḥ /
yakṣāṇaāṃ ghorarūpāṇāṃ vividhāyudhadhāriṇām //

adhvanyahamathāpaśyamagastyamṛpisattamam / ugraṃ tapastapyabhānaṃ yamunātīramāśritam /
nānāpakṣigaṇākīrṇaṃ puṣpitadrumaśobhitam //

tamūrdvabāhuṃ dṛṣṭvaiva sūryasyābhimukhe sthitam /
tejorāśiṃ dīpyamānaṃ hutāśanamivaidhitam //

rākṣasādhipatiḥ śrīmānmaṇimānnāma me sakhā /
maurkyādajñānabhāvācca darpānmohācca pārthiva //

nyaṣṭhīvadākāśagato maharṣestasya mūrdhani /
tataḥ kruddhaḥ sa bhagavānuvācedaṃ tapodhanaḥ //

māmavajñāya duṣṭātmā yasmādeṣa sakhā tava /
dharṣaṇāṃ kṛtavānetāṃ paśyataste dhaneśvara //

tvaṃ cāpyebhirhataiḥ sainyaiḥ kleśaṃ prāpnuhi durbhate /
tameva mānuṣaṃ dṛṣṭvākilviṣādvipramokṣyase //

sainyānāṃ tu tavaiteṣāṃ putrapautrabalānvitam /
na śāpaṃ prāpyate ghoraṃ gaccha te'jñāṃ kariṣyati //

eṣa śāpo mayā prāptaḥ prāktasmādṛṣisattamāt / sa bhīmena mahārāja bhrātrā tava vimokṣitaḥ //