Mahabharata · Chapter 3.163

yudhiṣṭhira dhṛtirdākṣyaṃ deśakālaparākramāḥ /
lokatantravidhānānāmeṣa pañcavidho vidhiḥ //

dhṛtimantaśca dakṣāśca sve sve karmaṇi bhārata /
parākramavidhānajñā narāḥ kṛtayuge'bhavan //

dhṛtimāndeśakālajñaḥ sarvadharmavidhānavit /
kṣatriyaḥ kṣatriyaśreṣṭha śāsti vai pṛthivīmanu //

ya evaṃ vartate pārtha puruṣaḥ sarvakarmasu /
sa loke labhate vīra yaśaḥ pretya ca sadgatim //

deśakālāntaraprepsuḥ kṛtvā śakraḥ parākramam /
samprāptastridive rājyaṃ vṛtrahā vasubhiḥ saha //

[yastu kevalasaṃrambhātprapātaṃ na nirīkṣate.] pāpātmā pāpabuddhiryaḥ pāpamevānuvartate /
karmaṇāmavibhāgajñaḥ pretya ceha vinaśyati //

akālajñaḥ sudurmedhāḥ kāryāṇāmaviśeṣavit /
vṛthācārasamārambhaḥ pretya ceha vinaśyati //

sāhase vartamānānāṃ nikṛtīnāṃ durātmanām /
sarveṣāmarthalipsūnāṃ pāpo bhavati niścayaḥ //

adharmajño'valiptaśca bālabuddhiramarṣaṇaḥ /
nirbhayo bhīmaseno'yaṃ taṃ śādhi puruṣarṣabha //

ārṣṭiṣeṇas rājarṣeḥ prāpya bhūyastvamāśramam /
tamisrāṃ prathamāṃ tatra vītaśokabhayo vasa //

alakāṃ saha gandharvairyakṣaiśca saha kinnaraiḥ /
gamiṣyāmi mahābāho tvaṃ cāpi badarīṃ vraja //

manniyuktā manuṣyendra sarve ca girivāsinaḥ /
rakṣantu tvāṃ mahābāho sahitaṃ dvijasattamaiḥ //

sāhaseṣu ca santiṣṭhaṃstvayā śaile vṛkodaraḥ /
vāryatāṃ sādhvayaṃ rājaṃstvayā dharmabhṛtāṃvara //

itaḥ paraṃ ca vo rājandrakṣyanti vanagocarāḥ /
upaśthāsyanti vo rājanrakṣiṣyante ca vaḥ sadā //

tathaiva cānnapānāni svādūni ca babūni ca /
āhariṣyanti matpreṣyāḥ sadā vaḥ puruṣarṣabhāḥ //

yathā jiṣṇurmahendrasya yathā vāyorvṛkodaraḥ /
dharmasya tvaṃ yathā tāta yogotpanno nijaḥ sutaḥ //

ātmajāvātmasampannau yamau cobhau yathāśvinoḥ /
rakṣyāstadvanmamāpīha yūyaṃ sarve yudhiṣṭhira //

arthatattvavidhānajñaḥ sarvadharmavidhānavit /
bhīmasenādavarajaḥ palgunaḥ kuśalī divi //

yāḥ kāścana matā loke svargyāḥ paramasampadaḥ /
janamaprabhṛti tāḥ sarvāḥ sthitāstāta dhanañjaye //

dramo dānaṃ balaṃ buddhirhrīrdhṛtisteja uttamam /
etānyapi mahāsatve sthitānyamitatejasi //

na mohātkurute jiṣṇuḥ karma pāṇḍava garhitam /
na pārthas mṛṣoktāni kathayanti narā nṛṣu //

sa devapitṛgandharvaiḥ kurūṇaāṃ kīrtivardhanaḥ /
ānītaḥ kurute'strāṇi śakrasadmani bhārata //

yo'sau sarvānmahīpālāndharmeṇa vaśamānayat /
sa śantanurmahātejāḥ pitustava pitāmahaḥ //

prīyate pārtha pārthena divi gāṇḍīvadhanvanā /
samyakvāsau mahāvīryaḥ kuladhurya iva sthitaḥ //

pitṝndevānṛṣīnviprānpūjayitvā mahāyaśāḥ /
sapta mukhyānmahāmedhānāharadyamunāṃ prati //

adhirājaḥ sa rājaṃstvāṃ śantanuḥ prapitāmahaḥ /
svargajicchakralokasthaḥ kuśalaṃ paripṛcchati //
vaiśampāyana uvāca /

etacchrutvā tu vacanaṃ dhanadena prabhāṣitam /
pāṇḍavāśca tatastena babhūvaḥ sampraharṣitāḥ //

tataḥ śaktiṃ gadāṃ khaṅgaṃ dhanuśca bharatarṣabhaḥ /
prādhvankṛtvā namaścakre kuberāya vṛkodaraḥ //

tato'bravīddhanādhyakṣaḥ śaraṇyaḥ śaraṇāgatam /
mānahā bhava śatrūṇāṃ suhṛdāṃ nandivardhanaḥ //

vibhayastāpa śailāgre vasānaḥ saha bandhubhiḥ /
suparṇapitṛdevānāṃ satataṃ mānakṛdbhava //

ṛjuṃ paśyata mā vakraṃ satyaṃ vadata mā'nṛtam /
dīrghaṃ paśyata mā hrasvaṃ paraṃ paśyata mā'param //

sveṣu veśmasu ramyeṣu vasatāmitratāpanāḥ /
kāmānna parihāsyanti yakṣā vobharatarṣabhāḥ //

śīghrameva guḍākeśaḥ kṛtāstraḥ puruṣarṣabhaḥ /
sākṣānmaghavatotsṛṣṭaḥ samprāpsyati dhanañjayaḥ //

evamuttamakarmāṇamanuśiṣya yudhiṣṭhiram /
astaṃ girimivādityaḥ prayayau guhyakādhipaḥ //

taṃ paristomasankīrṇairnānāratnavibhūṣitaiḥ /
yānairanuyayuryakṣā rākṣasāśca sahasraśaḥ //

pakṣiṇāmiva kanirghoṣaḥ kuberasadanaṃ prati /
babhūva paramāśvānāmairāvatapathe yathā //

te jagmustūrṇamākāśaṃ dhanādhipativājinaḥ /
prakarṣanta ivābhrāṇi pibanta ivamārutam //

tatastāni śarīrāṇi gatasatvāni rakṣasām /
apākṛṣyanta śailāgrāddhanādhipatiśāsanāt //

teṣāṃ hi śāpakālaḥ sa kṛto'gastyena dhīmatā /
samare nihatāstasmācchāpasyānto'bhavattadā //

pāṇḍavāśmahātmānasteṣu veśmasu tāṃ kṣapām / sukhamūṣurgatodvegāḥ pūjitāḥ saha rākṣasaiḥ //