Mahabharata · Chapter 3.160

yudhiṣṭhirastamāsādya tapasā dagdhakilbiṣam /
abhyavādayata prītaḥ śirasā nāma kīrtayan //

tataḥ kṛṣṇā ca bhīmaśca yamau ca sutapasvinau /
śirobhiḥ prāpya rājarṣiṃ parivāryopatasthire //

tathaiva dhaumyo dharmajñaḥ pāṇḍavānāṃ purohitaḥ /
yathānyāyamupākrāntastamṛṣiṃ saṃśitavratam //

anvajānātsa dharmajño munirdivyena cakṣuṣā /
pāṇḍoḥ putrānkuruśreṣṭhānāsyatāmiti cābravīt //

kurūṇāmṛpabhaṃ prājñaṃ pūjayitvā mahātapāḥ /
saha bhrātṛbhirasīnaṃ paryapṛcchadanāmayam //

nānṛte kurupe bhāvaṃ kacciddharme pravartase /
mātāpitrośca te vṛttiḥ kaccitpārtha na sīdati //

kaccitte guravaḥ sarve vṛddhā vaidyāśca pūjitāḥ /
kaccinna kurupe bhāvaṃ pārtha pāpeṣu karmasu //

sukṛtampratikartuṃ ca kacciddhātuṃ ca duṣkṛtam /
yathānyāyaṃ kuruśraṣṭha jānāsi na vikatthase //

yathārhaṃ mānitāḥ kaccittvayā nandanti sādhavaḥ /
vaneṣvapi vasankacciddharmamevānuvartase //

kacciddhaumyastvadācārairna pārtha paritapyate /
dānadharmatapaḥśaucairārjavena titikṣayā //

pitṛpaitāmahaṃ vṛttaṃ kaccitpārthānuvartase /
kaccidrājarṣiyātena pathā gacchasi pāṇḍava //

svesve kila kule jāte putre naptari vā punaḥ /
pitaraḥ pitṛlokasthāḥ śocanti ca ramanti ca //

kiṃ tasya duṣkṛte'smābhiḥ samprāptavyaṃ bhaviṣyati /
kiṃ cāsya sukṛte'smābhiḥ prāptavyamiti śobhanaṃ //

pitā mātā tathaivāgnirgururātmā ca pañcamaḥ /
yasyaitepūjitāḥ pārtha tas lokāvubhau jitau //
[yudhiṣṭhira uvāca /

bhagavannārya mā'haitadyathāvaddharmaniścayam /
yathāśakti yathānyāyaṃ kriyate vidhivanmayā //
ārṣṭiṣeṇa uvāca.]

abbhakṣā vāyubhakṣāśca plavamānā vihāyasā /
juṣante parvataśreṣṭhamṛṣayaḥ parvasandhiṣu //

kāminaḥ saha kāntābhiḥ parasparamanuvratāḥ /
dṛśyante śailaśṛṅgasthā yathā kimpuruṣā nṛpa //

arajāṃsi ca vāsāṃsi vasānāḥ kauśikāni ca /
dṛśyante bahavaḥ pārtha gandharvāpsarasāṃ gaṇāḥ //

vidyādharagaṇāścaiva sragviṇaḥ priyadarśanāḥ /
mahoragagaṇāścaiva suparṇāścāraṇādayaḥ //

asya copari śailasya śrūyate parvasandhiṣu /
bherīpaṇavaśaṅkhānāṃ mṛdaṅgānāṃ ca niḥkhanaḥ //

ihasthaireva tatsarvaṃ śrotavyaṃ bharatarṣabhāḥ /
na kāryā vaḥ kathañcitsyāttatrābhigamane matiḥ //

na cāpyataḥ paraṃ śakyaṃ gantuṃ bharatasattamāḥ /
vihārastatra devānāmamānuṣagatistu sā //

īṣaccapalakarmāṇaṃ manuṣyamiha bhārata /
dviṣanti sarvabhūtāni tāḍayanti ca rākṣasāḥ //

asyātikramya śikharaṃ kailāsasya yudhiṣṭhira /
gatiḥ paramasiddhānāṃ devarṣīṇāṃ prakāśate //

cāpalāddhi na gantavyaṃ pārta yānaistataḥ param /
ayaḥśūlādibhirghnanti rākṣasāḥ śatrusūdana //

apsarobhiḥ parivṛtaḥ samṛddhyā naravāhanaḥ /
iha vaiśravaṇastāta parvasandhiṣu dṛśyate //

śikhare taṃ samāsīnamadhipaṃ yakṣarakṣasām /
prekṣante sarvabhūtāni bhānumantamivoditam //

devadānavasiddhānāṃ tathā vaiśravaṇasya ca /
gireḥ śikharamudyānamidaṃ bharatasattama //

upāsīnasya dhanadaṃ tumburoḥ parvasandhiṣu /
gītasāmasvanastāta śrūyate gandhamādane //

etadevaṃvidhaṃ citramiha tāta yudhiṣṭhira /
prekṣante sarvabhūtāni bahuśaḥ parvasandhiṣu //

bhuñjānā munibhojyāni rasavanti phalāni ca /
vasadhvaṃ pāṇḍavaśreṣṭhā yāvadarjunadarśanāt //

na tāta capalairbhāvyamiha prāptaiḥ kathañcana /
capalaḥ sarvabhūtānāṃ dveṣyo bhavati mānavaḥ //

uṣitveha yathākāmaṃ yathāśraddhaṃ vihṛtya ca / tataḥ śastrajitāṃ śreṣṭha pṛthivīṃ pālayiṣyasi //