Mahabharata · Chapter 3.159

nihate rākṣase tasminpunarnārāyaṇāśramam /
abhyetya rājā kaunteyo nivāsamakarotprabhuḥ //

sa samānīya tānsarvānbhrātṝnityabravīdvacaḥ /
draupadyā sahitaḥ kāle saṃsmaranbhrātaraṃ jayam //

samāścatasro'bhigatāḥ śivena caratāṃ vane /
kṛtoddeśaḥ sa bībhatsuṛ pañcamīmabhitaḥ samām //

prāpya parvatarājānaṃ śvetaṃ śikhariṇāṃvaram /
[puṣpitairdrumaṣaṇḍaiśca mattakokilāṣaṭpadaiḥ //

mayūraiścātakaiścāpi nityotsavavibhūṣitam /
vyāghrairvarahairmahiṣairgavayairhariṇaistathā //

śvāpadairvyālarūpaiśca rurubhiśca niṣevitam /
phullaiḥ sahasrapatraiśca śatapatraistathotpalaiḥ //

praphullaiḥ kamalaiścaiva tathā nīlotpalairapi / mahāpuṇaayaṃ pavitraṃ ca surāsuraniṣevitam.]
tatrāpi ca kṛtoddeśaḥ samāgamadidṛkṣubhiḥ //

kṛtaśca samayastena pārthenāmitatejasā /
pañcavarṣāṇi vatsyābhi vidyārthīti purā mayi //

atragāṇḍīvadhanvānamavāptāstramarindamam /
devalokādimaṃ lokaṃ drakṣyāmaḥ punarāgatam //

ityuktvā brāhmaṇānsarvānāmantrayata pāṇḍavaḥ /
kāraṇaṃ caiva tattevāmācacakṣe tapasvinām //

tamugratapasaḥ prītāḥ kutvāpārthaṃ pradakṣiṇam /
brāhmaṇāste'nvamodanta śivena kuśalena ca //

sukhodarkamimaṃ kleśamacirādbharatarṣabha /
kṣatradharmeṇa dharmajña tīrtvā gāṃ pālayiṣyasi //

tattu rājā vacasteṣāṃ pratigṛhya tapasvinām /
pratasthe saha vipraistairbhrātṛbhiśca parantapaḥ //

draupadyā sahitaḥ śrīmānhaiḍimbeyādibhistadā /
rākṣasairanuyāto vai lomaśenābhirakṣitaḥ //

kvacitpadbhyāṃ tato'gacchadrākṣasairudahyate kvacit /
tatratatra mahātejā bhrātṛbhiḥ saha suvrataḥ //

tato yudhiṣṭhiro rājā bahunkleśānvicintayan /
siṃhavyāghragajākīrṇāmudīcīṃ prayayau diśam //

avemāṇa kailāsaṃ mainākaṃ caiva parvatam /
gandhamādanapādāṃśca meruṃ cāpi śiloccayam //

uparyupari śailasya bahīśca saritaḥ śivāḥ /
pṛṣṭhaṃ himavataḥ puṇyaṃ yayau saptadaśe'hani //

dadṛśuḥ pāṇḍavā rājangandhamādanamantikam /
pṛṣṭhe himavataḥ puṇye nānādrumalatāvṛte //

salilāvartasañjātaiḥ puṣpitaiśca mahīruhaiḥ /
samāvṛtaṃ puṇyatamamāśramaṃ vṛṣaparvaṇaḥ //

tamupakramya rājarṣiṃ dharmātmānamarindamāḥ /
pāṇḍavā vṛṣaparvāṇamavadanta gataklamāḥ //

abhyanandatsa rājarṣiḥ putravadbharatarṣabhān /
pūjitāścāvasaṃstatrasaptarātramarindamāḥ //

aṣṭame'hani samprāpte tamṛṣiṃ lokaviśrutam /
āmantrya vṛṣaparvāṇaṃ prasthānaṃ pratyarocayan //

ekaikaśaśca tānviprānnivedya vṛṣaparvaṇi / nyāsabhūtānyathākālaṃ bandhūniva susatkṛtān /
pāribarhaṃ cataṃ śeṣaṃ paridāya mahātmane //

tataste yajñapātrāṇi ratnānyābharaṇāni ca /
nyadadhuḥpāṇḍavā rājannāśrame vṛṣaparvaṇaḥ //

atītānāgate vidvānkuśalaḥ sarvadharmavit /
anvaśāsatsa dharmajñaḥ putravadbharatarṣabhān //

te'nujñātā mahātmānaḥ prayayurdiśamuttarām / kuṣṇayā sahitā vīrā brāhmaṇaiśca mahātmabhiḥ

tānprasthitānanvagacchadvṛṣaparvā mahīpatīn /
upanyas mahātejā viprebhyaḥ pāṇḍavāṃstadā //

anusaṃsārya kaunteyānāśīrbhirabhinandya ca /
vṛṣaparvā nivavṛtepanthānamupadiśya ca //

nānāmṛgagaṇairjuṣṭaṃ kaunteyaḥ satyavikramaḥ /
padātirbhrātṛbhiḥ sārdhaṃ prātiṣṭhata yudhiṣṭhiraḥ //

nānādrumanirodheṣu vasantaḥ śailasānuṣu /
parvataṃ viviśuste taṃ caturthe'hani pāṇḍavāḥ //

mahābhraghanasankāśaṃ salilopahitaṃ śubham /
maṇikāñcanaramyaṃ ca śailaṃ nānāsamucchrayam //

ramyaṃ himavataḥ prasthaṃ bahukandaranirjharam /
śilāvibhaṅgavikaṭaṃ latāpādapasaṅkulam //

te samāsādyapanthānaṃ yatoktaṃ vṛṣaparvaṇā /
anusasruryathoddeśaṃ paśyanto vividhānnagān //

uparyupari śailasya guhāḥ paramadurgamāḥ /
sudurgamāṃste subahūnsukhenaivābhicakramuḥ //

dhaumyaḥ kṛṣṇā ca pārtāśca lomaśaśca mahānṛṣiḥ /
āgacchansahitāstatrana kaścidapi hīyate //

te mṛgadvijasanghuṣṭaṃ nānādrumalatāyutam /
śākhāmṛgagaṇaiścaiva sevitaṃ sumanoramam //

puṇyaṃ padmasaropetaṃ sapalvalamahāvanam /
upatasthurmahābhāgā mālyavataṃ mahāgirim //

tataḥ kimpuruṣāvāsaṃ siddhacāraṇasevitam /
dadṛśurhṛṣaromāṇāḥ parvataṃ gandhamādanam //

vidyādharānucaritaṃ kinnarībhistathaiva ca /
gajasaṅghasamāvāsaṃ siṃhavyāghragaṇāyutam //

śarabhonnādasanghuṣṭaṃ nānamṛganiṣevitam //

te gandhamādanavanaṃ tannandanavanopamam /
muditāḥ pāṇḍutanayā manonayananandanam //

viviśuḥ kramaśo vīrā araṇyaṃ śubhakānanam /
draupadīsahitā vīrāstaiśca viprairmahātmabhiḥ //

śṛṇvantaḥ prītijananānvalgūnmandakalāñśubhān /
śrotraramyānsumadhurāñśabdānkhagamukheritān //

sarvartuphalabhārāñyānsarvartukusumojjvalām /
paśyantaḥ pādapāṃscāpi phalabhārāvanāmitān //

āmrānāmrātakānphullānnārikelānsatindukān /
muñjātakāṃstathāñjīrāndāḍimānbījapūrakān //

panasām̐llikucānmocāḥ kharjūrānamlavetasān /
parāvatāṃstathā kṣaudrānīpāṃścāpi manoramān //

belvānkapitthāñjambūśca kāśmarīrbradarīstathā /
pukṣānudumbaravaṭānaśvatthānkṣīrikāstathā //

mallātakānāmalakīrharītakabibhītakān /
iṅgudānkaramardāṃśca tindukāṃś mahāphalān //

etānanyāṃśca vividhāngandhamādanasānuṣu /
phalairamṛtakalpaistānācitānsvādubhistarūpan //

tathaiva campakāśokānketakānbakulāṃstathā / punnāgānsaptaparṇāṃśca karṇikārānsaketakān /
pāṭalānkuṭajānramyānmandārendīvarāṃstathā //

pārijātānkovidārāndevadārudrumāṃstathā / pārijātānkovidārāndevadārudrumāṃstathā /
śālāṃstālāṃstamālāṃśca pippalānhiṅgukāṃstathā //

cakoraiḥ śatapatraiś bhṛṅgarājaistathā śukaiḥ /
kokilaiḥ kalaviṅkaiśca hāritairjīvajīvakaiḥ //

priyakaiścātakaiścaiva tathā'nyairvividhaiḥ khagaiḥ /
śrotraramyaṃ sumadhuraṃ kūjadbhiścāpyadhiṣṭhitān //

sarāṃsi ca manojñāni samantājjalacāribhiḥ / kumudaiḥ puṇḍarīkaiśca tṛthā kokanadotpalaiḥ /
kahāraiḥ kamalaiścaiva ācitāni samantataḥ //

kādambaiścakravākaiśca kurarairjalakukkuṭaiḥ /
kāraṇḍavaiḥ plavairhaṃsairbakairmadgubhireva ca //

etaiścānyaiśca kīrṇāni samantājjalacāribhiḥ /
hṛṣṭaistathā tāmarasarasāsavamadālasaiḥ //

padmodaracyutarajaḥkiñjalkāruṇarañjitaiḥ /
mañjusvarairmadhukarairvirutānkamalākarān //

apaśyaṃste naravyāghrā gandhamādanasānuṣu /
tathaiva padmaṣaṇḍaiśca maṇḍitāṃśca samantataḥ //

śikhaṇḍinībhiḥ sahitām̐llatāmaṇḍalakeṣu ca /
meghatūryaravoddāmamadanākulitānbhṛśam //

kṛtvaiva kekāmadhuraṃ sangītaṃ madhurasvaram /
citrānkalāpānvistīrya savilāsānmadālasān //

mayūrāndadṛśurhṛṣṭānnṛtyato vanalālasān /
kāṃścitpriyābhiḥ sahitānramamāṇānkalāpinaḥ //

vallīlatāsankaṭeṣu kuṭajeṣu sthitāṃstathā /
kāṃścicca kuṭajānāṃ tu viṭapeṣūtkaṭāniva //

kalāparucirāṭopanicitānmukuṭāniva /
vivareṣu tarūṇāṃ ca rucirāndadṛśuśca te //

sindhuvārāṃstathodārānmanmathasyeva tomarān / suvarṇavarṇakusumāngirīṇāṃ sikhareṣu ca /
karṇikārānvikasitānkarṇapūrānivottamān //

tathā'paśyankurabakānvanarājiṣu puṣpitān /
kāmavaśyautsukyakarānkāmasyeva śarotkarān //

tathaiva vanarājīnāmudārānracitāniva /
virājamānāṃste'paśyaṃstilakāṃstilakāniva //

tathānaṅgaśarākārānsahakārānmanoramān /
apaśyanbhrāmarānrājanmañjarībhirvirājitān //

hiraṇyasadṛśaiḥ puṣyairdāvāgnisadṛśairapi / lohitairañjanābhaiśca vaidūryasadṛśairapi /
atīva vṛkṣā rājante puṣpitāḥ śailasānuṣu //

tathā sālāṃstamālāṃśca pāṭalābakulānapi /
mālā iva samāsaktāḥ śailānāṃ śikhareṣu ca //

vimalasphāṭikābhāni pāṇḍuracchadanairdvijaiḥ /
kalahaṃsairupetāni sārasābhirutāni ca //

sarāṃsi bahuśaḥ pārthā paśyantaḥ śailasānuṣu /
padmotpalavimiśrāṇi sukhaśītajalāni ca //

evaṃ krameṇa te vīrā vīkṣamāṇāḥ samantataḥ /
ganvantyatha mālyāni rasavanti phalāni ca //

sarāṃsi ca manojñāni vṛkṣāṃścātimanoramān /
viviśuḥ pāṇḍavāḥ sarvevismayotphullalocanāḥ //

kamalotpalakahlārapuṇḍarīkasugandhinā /
sevyamānā vane tasmansukhasparśena vāyunā //

tato yudhiṣṭhiro bhīmamāhedaṃ prītimadvacaḥ /
aho śrīmadidaṃ bhīma gandhamādanakānanam //

vane hmasminmanoramye divyā kānanajā drumāḥ / latāśca vividhākārāḥ patrapuṣpaphalopagāḥ /
bhāntyete puṣpavikacāḥ puṃskokilakulākulāḥ //

nātra kaṇṭakinaḥ kecinna ca vidyantyapuṣpitāḥ /
snigdhapatraphalā vṛkṣā gandhamādanasānuṣu //

bhramarārāvamadhurā nalinīḥ phullapaṅkajāḥ /
viloḍyamānā paśyemāḥ karibhiḥ sakareṇubhiḥ //

paśyemāṃ nalinīṃ cānyāṃ kamalotpalamālinīm /
sragdharāṃ vigrahavatīṃ sākṣācchriyamivāparām //

nānākusumagandhāḍhyāstasyemāḥ kānanottame /
upagīyamānā bhramarai rājante vanarājayaḥ //

paśya bhīma śubhāndeśāndevākrīḍānsamantataḥ /
amānuṣagatiṃ prāptāḥ saṃsiddhāḥ sma vṛkodara //

latābhiḥ puṣpitāgrābhiḥ puṣpitāḥ pādapottamāḥ /
saṃśliṣṭāḥ pārtha śobhante gandhamādanasānuṣu //

śikhaṇḍinībhiścaratāṃ sahitānāṃ śikhaṇḍinām /
nadatāṃ śṛṇu nirghoṣaṃ bhīma parvatasānuṣu //

cakorāḥ śatapatrāśca mattakokilaśārikāḥ /
patriṇaḥ puṣpitānetānsampatanti mahādrumān //

raktapītāruṇāḥ pārtha pādapāgragatāḥ khagāḥ /
parasparamudīnte bahavo jīvajīvakāḥ //

haritāruṇavarṇānāṃ śāḍvalānāṃ samīpataḥ /
sārasāḥ pratidṛśyante śailaprasravaṇeṣvapi //

vadanti madhurā vācaḥ sarvabhūtamanoramāḥ /
bhṛṅgarājopacakrāśca lohapṛṣṭhāḥ patatriṇaḥ //

caturviṣāṇāḥ padmābhāḥ kuñjarāḥ sakareṇavaḥ /
ete vaiḍūryavarṇābhaṃ kṣobhayanti mahatsaraḥ //

bahutālasamutseghāḥ śailaśṛṅgaparicyutāḥ /
nānāprasravaṇebhyaśca vāridhārāḥ patanti ca //

bhāskarābhaprabhā bhīmāḥ śāradābhraghanopamāḥ /
śobhayanti mahāśailaṃ nānārajatadhātavaḥ //

kvacidañjanavarṇābhāḥ kvacitkāñcanasannibhāḥ /
dhātavo haritālasya kvaciddhiṅgulakasya ca //

manaḥśilāguhāścaiva sandhyābhranikaropamāḥ /
śaśalohitavarṇābhāḥ kvacidgairikadhātavaḥ //

sitāsitābhrapratimā bālasūryasamaprabhāḥ /
ete bahuvidhāḥ śailaṃ śobhayanti mahāprabhāḥ //

gandharvāḥ saha kāntābhiryatheṣṭaṃ bhīmavikramāḥ /
dṛśyante śailaśṛṅgeṣu pārtha kimpuruṣaiḥ saha //

gītānāṃ samatālānāṃ tathāsāmnāṃ ca niḥkhanaḥ /
śrūyate bahudhā bhīma sarvabhūtamanoharaḥ //

mahāgaṅgāmudīkṣakha puṇyāṃ devanadīṃ śubhām /
kalahaṃsagaṇairjuṣṭāmṛṣikinnarasevitām //

dhātubhiśca saridbhiśca kinnarairmṛgapakṣibhiḥ /
gandharvairapsarobhiśca kānanaiśca manoramaiḥ //

vyālaiśca vividhākāraiḥ śataśīrṣaiḥ samantataḥ /
upetaṃ paśya kaunteya śailarājamarindama //
vaiśampāyana uvāca /

te prītamanasaḥ śūrāḥ prāptā gatimanuttamām /
nātṛpyanparvatendrasya darśanena parantapāḥ //

upetamatha mālyaiśca phalavadbhiśca pādapaiḥ /
ārṣṭipeṇas rājarṣerāśramaṃ dadṛśustadā //

tataste tigmatapasaṃ kṛśaṃ dhamanisantatam / pāragaṃ sarvavidyānāmārṣṭiṣeṇamupāgaman //