મહાભારત · અધ્યાય 3.160

યુધિષ્ઠિરસ્તમાસાદ્ય તપસા દગ્ધકિલ્બિષમ્ ।
અભ્યવાદયત પ્રીતઃ શિરસા નામ કીર્તયન્ ॥

તતઃ કૃષ્ણા ચ ભીમશ્ચ યમૌ ચ સુતપસ્વિનૌ ।
શિરોભિઃ પ્રાપ્ય રાજર્ષિં પરિવાર્યોપતસ્થિરે ॥

તથૈવ ધૌમ્યો ધર્મજ્ઞઃ પાણ્ડવાનાં પુરોહિતઃ ।
યથાન્યાયમુપાક્રાન્તસ્તમૃષિં સંશિતવ્રતમ્ ॥

અન્વજાનાત્સ ધર્મજ્ઞો મુનિર્દિવ્યેન ચક્ષુષા ।
પાણ્ડોઃ પુત્રાન્કુરુશ્રેષ્ઠાનાસ્યતામિતિ ચાબ્રવીત્ ॥

કુરૂણામૃપભં પ્રાજ્ઞં પૂજયિત્વા મહાતપાઃ ।
સહ ભ્રાતૃભિરસીનં પર્યપૃચ્છદનામયમ્ ॥

નાનૃતે કુરુપે ભાવં કચ્ચિદ્ધર્મે પ્રવર્તસે ।
માતાપિત્રોશ્ચ તે વૃત્તિઃ કચ્ચિત્પાર્થ ન સીદતિ ॥

કચ્ચિત્તે ગુરવઃ સર્વે વૃદ્ધા વૈદ્યાશ્ચ પૂજિતાઃ ।
કચ્ચિન્ન કુરુપે ભાવં પાર્થ પાપેષુ કર્મસુ ॥

સુકૃતમ્પ્રતિકર્તું ચ કચ્ચિદ્ધાતું ચ દુષ્કૃતમ્ ।
યથાન્યાયં કુરુશ્રષ્ઠ જાનાસિ ન વિકત્થસે ॥

યથાર્હં માનિતાઃ કચ્ચિત્ત્વયા નન્દન્તિ સાધવઃ ।
વનેષ્વપિ વસન્કચ્ચિદ્ધર્મમેવાનુવર્તસે ॥

કચ્ચિદ્ધૌમ્યસ્ત્વદાચારૈર્ન પાર્થ પરિતપ્યતે ।
દાનધર્મતપઃશૌચૈરાર્જવેન તિતિક્ષયા ॥

પિતૃપૈતામહં વૃત્તં કચ્ચિત્પાર્થાનુવર્તસે ।
કચ્ચિદ્રાજર્ષિયાતેન પથા ગચ્છસિ પાણ્ડવ ॥

સ્વેસ્વે કિલ કુલે જાતે પુત્રે નપ્તરિ વા પુનઃ ।
પિતરઃ પિતૃલોકસ્થાઃ શોચન્તિ ચ રમન્તિ ચ ॥

કિં તસ્ય દુષ્કૃતેઽસ્માભિઃ સમ્પ્રાપ્તવ્યં ભવિષ્યતિ ।
કિં ચાસ્ય સુકૃતેઽસ્માભિઃ પ્રાપ્તવ્યમિતિ શોભનં ॥

પિતા માતા તથૈવાગ્નિર્ગુરુરાત્મા ચ પઞ્ચમઃ ।
યસ્યૈતેપૂજિતાઃ પાર્થ તસ્ લોકાવુભૌ જિતૌ ॥
[યુધિષ્ઠિર ઉવાચ ।

ભગવન્નાર્ય માઽહૈતદ્યથાવદ્ધર્મનિશ્ચયમ્ ।
યથાશક્તિ યથાન્યાયં ક્રિયતે વિધિવન્મયા ॥
આર્ષ્ટિષેણ ઉવાચ.]

અબ્ભક્ષા વાયુભક્ષાશ્ચ પ્લવમાના વિહાયસા ।
જુષન્તે પર્વતશ્રેષ્ઠમૃષયઃ પર્વસન્ધિષુ ॥

કામિનઃ સહ કાન્તાભિઃ પરસ્પરમનુવ્રતાઃ ।
દૃશ્યન્તે શૈલશૃઙ્ગસ્થા યથા કિમ્પુરુષા નૃપ ॥

અરજાંસિ ચ વાસાંસિ વસાનાઃ કૌશિકાનિ ચ ।
દૃશ્યન્તે બહવઃ પાર્થ ગન્ધર્વાપ્સરસાં ગણાઃ ॥

વિદ્યાધરગણાશ્ચૈવ સ્રગ્વિણઃ પ્રિયદર્શનાઃ ।
મહોરગગણાશ્ચૈવ સુપર્ણાશ્ચારણાદયઃ ॥

અસ્ય ચોપરિ શૈલસ્ય શ્રૂયતે પર્વસન્ધિષુ ।
ભેરીપણવશઙ્ખાનાં મૃદઙ્ગાનાં ચ નિઃખનઃ ॥

ઇહસ્થૈરેવ તત્સર્વં શ્રોતવ્યં ભરતર્ષભાઃ ।
ન કાર્યા વઃ કથઞ્ચિત્સ્યાત્તત્રાભિગમને મતિઃ ॥

ન ચાપ્યતઃ પરં શક્યં ગન્તું ભરતસત્તમાઃ ।
વિહારસ્તત્ર દેવાનામમાનુષગતિસ્તુ સા ॥

ઈષચ્ચપલકર્માણં મનુષ્યમિહ ભારત ।
દ્વિષન્તિ સર્વભૂતાનિ તાડયન્તિ ચ રાક્ષસાઃ ॥

અસ્યાતિક્રમ્ય શિખરં કૈલાસસ્ય યુધિષ્ઠિર ।
ગતિઃ પરમસિદ્ધાનાં દેવર્ષીણાં પ્રકાશતે ॥

ચાપલાદ્ધિ ન ગન્તવ્યં પાર્ત યાનૈસ્તતઃ પરમ્ ।
અયઃશૂલાદિભિર્ઘ્નન્તિ રાક્ષસાઃ શત્રુસૂદન ॥

અપ્સરોભિઃ પરિવૃતઃ સમૃદ્ધ્યા નરવાહનઃ ।
ઇહ વૈશ્રવણસ્તાત પર્વસન્ધિષુ દૃશ્યતે ॥

શિખરે તં સમાસીનમધિપં યક્ષરક્ષસામ્ ।
પ્રેક્ષન્તે સર્વભૂતાનિ ભાનુમન્તમિવોદિતમ્ ॥

દેવદાનવસિદ્ધાનાં તથા વૈશ્રવણસ્ય ચ ।
ગિરેઃ શિખરમુદ્યાનમિદં ભરતસત્તમ ॥

ઉપાસીનસ્ય ધનદં તુમ્બુરોઃ પર્વસન્ધિષુ ।
ગીતસામસ્વનસ્તાત શ્રૂયતે ગન્ધમાદને ॥

એતદેવંવિધં ચિત્રમિહ તાત યુધિષ્ઠિર ।
પ્રેક્ષન્તે સર્વભૂતાનિ બહુશઃ પર્વસન્ધિષુ ॥

ભુઞ્જાના મુનિભોજ્યાનિ રસવન્તિ ફલાનિ ચ ।
વસધ્વં પાણ્ડવશ્રેષ્ઠા યાવદર્જુનદર્શનાત્ ॥

ન તાત ચપલૈર્ભાવ્યમિહ પ્રાપ્તૈઃ કથઞ્ચન ।
ચપલઃ સર્વભૂતાનાં દ્વેષ્યો ભવતિ માનવઃ ॥

ઉષિત્વેહ યથાકામં યથાશ્રદ્ધં વિહૃત્ય ચ । તતઃ શસ્ત્રજિતાં શ્રેષ્ઠ પૃથિવીં પાલયિષ્યસિ ॥