Mahabharata · Chapter 3.156

tatastāni mahārhāṇi divyāni bharatarṣabha /
bahūni bahurūpāṇi virajāṃsi samādade //

tato vāyurmahāñśīghro nīcaiḥ śarkarakarṣaṇaḥ /
prādurāsīdvarasparśaḥ sangrāmamabhicodayan //

papāta mahatī colkā sanirghātā mahābhayā /
niṣprabhaścābhavatsūryaṃśchannaraśmistamovṛtaḥ //

nirghātaścābhavadbhīmo bhīme vikramamāsthite /
cacāla pṛthivī cāpi pāṃsuvarṣaṃ papāta ca //

salohitā diśaścāsankharavāco mṛgadvijāḥ / tamovṛtamabhūtsarvaṃ na prājñāyata kiñcana /

[anye ca bahavo bhīmā utpātāstatra jajñire // ] tadadbhutamabhiprekṣya dharmaputro yudhiṣṭhiraḥ /
uvāca vadatāṃ śreṣṭhaḥ ko'smānabhibhaviṣyati //

sajjībhavata bhadraṃ vaḥ pāṇḍavā yuddhadurmadāḥ /
yathā rūpāṇi paśyāmi suvyakto naḥ parākramaḥ //

evamuktvā tato rājā vīkṣāñcakre samantataḥ /
apaśyamāno bhīmaṃ tu dharmaputro yudhiṣṭhiraḥ //

tataḥ kṛṣṇāṃ yamau cāpi samīpasthānarindamaḥ /
papraccha bhrātaraṃ bhīmaṃ bhīmakarmāṇamāhave //

kaccinna bhīmaḥ pāñcāli kiñca kṛtyaṃ cikīrṣati /
kṛtavānapi vā vīra sāhasaṃ sāhasapriyaḥ //

ime hyakasmādutpātā mahāsamaraśaṃsinaḥ /
darśayanto bhayaṃ tīvraṃ prādurbhūtāḥ samantataḥ //

taṃ tathāvādinaṃ kṛṣṇā pratyuvāca manasvinī /
priyā priyaṃ cikīrṣantī mahiṣī cāruhāsinī //

yattatsaugandhikaṃ rājannāhṛtaṃ mātariśvanā /
tanmayā bhīmasenasya prītayā'dyopapāditam //

api cokto mayā vīro yadipaśyerbahūnyapi /
tāni sarvāṇaayupādāya śīghramāgamyatāmiti //

sa tu nūnaṃ mahābāhuḥ priyārthaṃ mama pāṇḍavaḥ /
prāgudīcīṃ diśaṃ rājaṃstānyāhartumito gataḥ //

uktastvevaṃ tayā rājā yamāvidamathābravīt /
gacchāma sahitāstūrṇaṃ yena yāto vṛkodaraḥ //

vahantu rākṣasā viprānyathāśrāntānyathākṛśān /
tvamapyamarasankāśa vaha kṛṣṇāṃ ghaṭotkaca //

vyaktaṃ dūramito bhīmaḥ praviṣṭa itime matiḥ /
ciraṃ catasya kālo'yaṃ sa ca vāyusamo jave //

tarasvī vainateyasya sadṛśo bhuvi laṅghane /
utpatedapicākāśaṃ nipateccayathecchakam //

tamanviyāma bhavatāṃ prabhāvādrajanīcarāḥ /
purā sa nāparādhnoti siddhānāṃ brahmavādinām //

tathetyuktvā tu te sarvehaiḍimbapramukhāstadā /
uddeśajñāḥ kuberasya nalinyā bharatarṣabha //

ādāya pāṇḍavāṃścaiva tāṃśca viprānanekaśaḥ /
lomaśenaiva sahitāḥ prayayuḥ prītamānasāḥ //

te sarve tvaritā gatvā dadṛśustatra kānane /
padmasaugandhikavatīnnalinīṃ sumanoramām //

taṃ ca bhīmaṃ mahātmānaṃ tasyāstīre vyavasthitam /
dadṛśurnihatāṃścaiva yakṣāṃśca vipulekṣaṇān //

bhinnakāyākṣibāhūrunsañcūrṇitaśirodharān /
taṃ ca bhīmaṃ mahātmānaṃ tasyāstīre vyavasthitam //

sakrodhaṃ stavdhanayanaṃ sandaṣṭadaśanacchadam /
udyamya ca gadāṃ dorbhyāṃ nadītīre vyavasthitam //

prajāsankṣepasamaye daṇḍahastamivāntakam /
taṃ dṛṣṭvā dharmarājastu pariṣvajyātha bhārata //

uvāca ślakṣṇayā vācā kaunteya kimidaṃ kṛtam / sāhasaṃ vata bhadraṃ te devānāmapi cāpriyam /
punarevaṃ na kartavyaṃ mama cedicchasi priyam //

anuśiṣya tu kaunteyaṃ padmāni parigṛhya ca /
tasyāmeva nalinyāṃ tu vijahraramaropamāḥ //

etasminnaiva kāle tu pragṛhītaśilāyudhāḥ /
prādurāsanmahākāyāstasyodyānasya rakṣiṇaḥ //

te dṛṣṭvādharmarājānaṃ maharṣiṃ cāpi lomaśam /
nakulaṃ sahadevaṃ ca tathā'nyānbrāhmaṇarṣabhān //

vinayena natāḥ sarvepraṇipatya ca bhārata /
sāntvitā dharmarājena praseduḥ kṣaṇadācarāḥ //

viditāścakuberasya tatrate kurupuṅgavāḥ / ūṣurnāticiraṃ kālaṃ ramamāṇāḥ kurūdvahāḥ /
pratīkṣamāṇaā bībhatsuṃ gandhamādanasānuṣu //